قازاق ۇلتتىق ونەر ۋنيۆەرسيتەتىنىڭ ستۋدەنتتەرى رەسەي تەاترى ونەرى ينستيتۋتىندا قازاق داستانىن كوزى قاراقتى كورەرمەننىڭ نازارىنا ۇسىندى.
كونە تۋىندى جاڭعىرتىلىپ، جاڭارعان. كوپتىڭ ىقىلاسىنا بولەنگەن پەسا تەاتر سىنشىلارىن تاڭداندىرماي قويمادى، دەپ حابارلايدى Almaty-akshamy.kz.
سەرىك ماقسۇتوۆ ونەر ۋنيۆەرسيتەتىنىڭ ءتورتىنشى كۋرس ستۋدەنتى. باستى ءرولدى، ياعني قوزىنى سومدايدى. «قويىلىمنىڭ جاڭا ينتەرپرەتاسياسى، دەكوراسيا مەن اكتەرلاردىڭ كيىم ۇلگىسىنە ەرەكشە ءمان بەرىلگەن»،- دەيدى.
«جاڭاشا كوزقاراسپەن قويدىق وسى «قوزى كورپەش-بايان سۇلۋ» سپەكتاكلىن. بۇل سپەكتاكلدە ماعان قوزىنىڭ ءرولىن ويناۋ قاتتى قيىن دەپ ايتا المايمىن، ءبىراق ىشىندە ەكى نەمەسە ءۇش ساحنا بار وزىمە اۋىر كەلەتىن. وسى ساحنانىڭ ىشىندە مەن ەكى، ءۇش رەت جىلاپ الام دەپ ايتساق تا بولادى»، - دەيدى قازاق ۇلتتىق ونەر ۋنيۆەرسيتەتىنىڭ ستۋدەنتى سەرىك ماقسۇتوۆ.
كونەنىڭ كوزىندەي بولعان ماحاببات حيكاياسى ەموسياعا تولى. تەاتر سىنشىلارى ستۋدەنتتەردىڭ كاسىبي شەبەرلىگىن ەرەكشە اتاپ ءوتتى. دايىندىققا التى ايدان استام ۋاقىت كەتكەن.
«بۇل كلاسسيكالىق پەسا بولعاندىقتان، ءوزىنىڭ ستيليستيكاسى بار. عابيت مۇسىرەپوۆتىڭ ستيليستيكاسى. سونى جوعالتپاۋ ءۇشىن، ءوزىمىزدىڭ ۇلتتىق ءتىلىمىزدىڭ مەلوديكاسىن ءبىلدىرتۋ ءۇشىن كورەرمەنگە قازاق تىلىندە وسى پەسانى ۇسىنامىز»، - دەيدى قازاقستاننىڭ ەڭبەك سىڭىرگەن قايراتكەرى، پروفەسسور قىمبات تىلەۋوۆا.
«قوزى كورپەش-بايان سۇلۋ» بىرنەشە تىلگە اۋدارىلعان داستان. XIX عاسىردىڭ ورتاسىندا قاعازعا تۇسكەن ليرو-ەپوستىق جىر بۇگىندە حالىقارالىق دەڭگەيدە مويىندالعان قۇندى مۇرا. رەسەي تەاترتى ينستيتۋتىندا قويىلعان قازاق تىلىندەگى سپەكتاكل كوپتىڭ كوڭىلىنەن شىقتى. ءدال وسى نۇسقانى جاس اكتەرلەر ەۋروپانىڭ تالعامپاز كورەرمەنىنىڭ نازارىنا ۇسىنساق دەيدى.