قوسىمشانى PlayMarket پەن AppStore ارقىلى جۇكتەۋگە بولادى.
اينالىمداعى، كوللەكسيالىق جانە ينۆەستيسيالىق مونەتالاردىڭ ەلەكتروندىق كاتالوگى ينتەراكتيۆتى پرەزەنتاسيا تۇرىندە ازىرلەنىپ، وندا قۇب پەن قازاقستان تەڭگە سارايى ماماندارىنىڭ جۇمىستارى جيناقتالعان، دەپ حابارلايدى Almaty-akshamy.kz.
ءموبيلدى قوسىمشادا شىعارىلعان بارلىق مونەتانىڭ تاقىرىپتىق بولىمدەرى سيپاتتالعان، بەينەجازبالار، مونەتالاردىڭ 3D بەينەسى، سونداي-اق تولىقتىرىلعان شىنايىلىق ەلەمەنتتەرى قامتىلعان (قوسىمشادان تولىقتىرىلعان شىنايىلىق ەلەمەنتتەرىن كورۋ ءۇشىن IOS جۇيەسى – 15.6 نۇسقاسىنان، Android جۇيەسى – 11 نۇسقاسىنان تومەن بولماۋى شارت).
كاتالوگ – قازاقستاننىڭ نۋميزماتيكا تاريحىنا ساياحات جاساپ قانا قويماي، ءتۇرلى داۋىرلەر مەن كەزەڭدەردەگى ساۋلەت جانە مادەني ەسكەرتكىشتەردەن، ماڭىزدى تاريحي وقيعالار مەن ونىڭ باي مادەنيەتىنەن، داستۇرىنەن سىر شەرتىپ، قازاق حالقىنىڭ كورنەكتى قايراتكەرلەرى جايىندا قۇندى دەرەكتەر ۇسىنادى.
قوسىمشادا ءوزىڭنىڭ جەكە ەلەكتروندىق بازاڭدى (كوللەكسيانى) جاساۋعا مۇمكىندىك بەرەتىن قولدانۋشى وپسياسى دا قاراستىرىلعان. كوللەكسيالىق مونەتالار بۇرىنعىشا قۇب-تىڭ ينتەرنەت-دۇكەنى ارقىلى ساتىلادى.
ۇلتتىق بانك كوللەكسيالىق مونەتالاردى شىعارۋ ارقىلى قازاقستاندى، تۇمسا تابيعاتتىڭ سۇلۋلىعىن، ءداستۇرىن، باي تاريحىن تانىستىرادى. مونەتا ءوندىرىسىنىڭ جوعارى دەڭگەيى مەن مامانداردىڭ كاسىبي شەبەرلىگىن پاش ەتەدى.
قازاقستان تەڭگە سارايى حالىقارالىق نارىقتا وزىق ءوندىرىس ستاندارتتارى بار كوللەكسيالىق مونەتالاردى ۇزدىك وندىرۋشىلەردىڭ ءبىرى سانالادى. 2000 جىلدان باستاپ قازاقستان مونەتالارى دايىنداۋ ساپاسى، ديزاينى مەن تەحنولوگيا سالاسىنداعى جاڭاشىلدىعى ءۇشىن حالىقارالىق نوميناسيالار مەن بايقاۋلاردا 23 ناگرادامەن ماراپاتتالدى.