قوستانايدا تۇرعىنداردان ءىرى كولەمدە اقشا بوپسالاعان كۇدىكتى ۇستالدى، — دەپ حابارلايدى اqshamnews.kz ءتىلشىسى Polisia.kz-كە سىلتەمە جاساپ.
پوليسيا 2024 جىلعى جەلتوقساننان 2025 جىلعى اقپانعا دەيىن جاسالعان بىرنەشە قىلمىستىق وقيعانى تەرگەپ جاتىر. قوستاناي وبلىسى پد-نىڭ ۇيىمداسقان قىلمىسقا قارسى كۇرەس باسقارماسى قوستاناي قالاسىنىڭ 22 جاستاعى تۇرعىنىن ۇستادى.
ول ەكى ستۋدەنتتەن ءىرى كولەمدە اقشا بوپسالادى دەگەن كۇدىككە ءىلىندى. قۇقىق قورعاۋ ورگاندارىنىڭ مالىمەتىنشە، كۇدىكتى جابىرلەنۋشىلەرگە پسيحولوگيالىق قىسىم كورسەتىپ، كۇش قولدانامىن دەپ قورقىتقان. سونىڭ سالدارىنان زارداپ شەككەندەر وعان 1 ميلليون تەڭگەدەن استام قاراجات بەرگەن.
ءقازىر كۇدىكتىگە تۇرعىلىقتى جەردەن شىقپاۋ تۋرالى قولحاتپەن بۇلتارتپاۋ شاراسى قولدانىلدى. وعان قاتىستى قىلمىستىق ءىس قوزعالدى، سوتالدى تەرگەۋ امالدارى جۇرگىزىلىپ جاتىر. ق ر قىلمىستىق كودەكسىنىڭ 194-بابى 2-بولىگىنە سايكەس، وعان جەتى جىلعا دەيىن باس بوستاندىعىنان ايىرۋ جانە مۇلكىن تاركىلەۋ جازاسى قولدانىلۋى مۇمكىن.
تەرگەۋ ارەكەتتەرى جالعاسىپ جاتىر: پوليسيا وقيعانىڭ بارلىق ءمان-جايىن انىقتاپ، كۇدىكتىنىڭ باسقا دا بوپسالاۋ دەرەكتەرىنە قاتىسى بار-جوعىن تەكسەرىپ جاتىر.