7 جانە 8 ماۋسىم كۇندەرى الماتىداعى اباي الاڭىندا ساعات 17:30-دان 22:30-عا دەيىن زاماناۋي ەتنيكالىق مۋزىكاعا ارنالعان جىل سايىنعى حالىقارالىق The Spirit of Tengri فەستيۆالى وتەدى، دەپ حابارلايدى aqshamnews.kz ءتىلشىسى.
الماتىنىڭ يميدجدىك مادەني جوبالارىنىڭ بىرىنە اينالعان بۇل فەستيۆال تاعى دا مىڭداعان كورەرمەندى جيناپ، ءداستۇر مەن زاماناۋي مۋزىكانى، ۇلتتىق تامىر مەن جاھاندىق ترەندتەردى بىرىكتىرەدى. بيىل ساحنادا قازاقستاننان، يتاليادان، كولۋمبيادان، وڭتۇستىك كورەيادان، وزبەكستاننان، تاجىكستاننان جانە باشقۇرتستاننان كەلگەن تانىمال مۋزىكانتتار ونەر كورسەتەدى. قوناقتاردى قولونەر جارمەڭكەسى، ءتۇرلى حالىقتاردىڭ ەتنيكالىق تاعامدارى جانە اسىق اتۋ جارىستارى كۇتەدى. 8 ماۋسىم كۇنى AY YOLA جانە OTYKEN فەستيۆالدىڭ باستى حەدلاينەرلەرى بولادى. ارتيستەردىڭ ناقتى ونەر كورسەتۋ باعدارلاماسىن فەستيۆالدىڭ رەسمي اككاۋنتتارىنان كورۋگە بولادى.
سونىمەن قاتار، 8 ماۋسىم كۇنى The Spirit of Tengri فەستيۆالىنىڭ كونسەرتتىك بولىگىنەن كەيىن، اباي الاڭىندا رەسپۋبليكا سارايىنىڭ الدىندا ۇلكەن درون شوۋ وتەدى. جارىق شوۋى ساعات 22:00-دە باستالادى.
كورەرمەندەردى تۇنگى اسپاندا ۇلى دالا مادەنيەتى، تۇركى حالىقتارىنىڭ ميفتەرى مەن زاماناۋي مەگاپوليس اتموسفەراسىنان شابىتتانعان بەينەلەردى جاسايتىن جۇزدەگەن دروننىڭ تاڭعاجايىپ كورىنىسى كۇتەدى. بۇل جوعارى تەحنولوگيا مەن تەرەڭ سيمۆوليكانىڭ ۇيلەسىمى، ءتۇپ-تامىر، ساباقتاستىق پەن دامۋ جايلى كوركەم ۆيزۋالدى پوەما.
اسپاندى وتباسى قۇندىلىقتارىنىڭ سيمۆولى رەتىندە شانىراق، قوبىز ۇستاعان قورقىت، كىتاپ ۇستاعان اباي مەن دومبىرا ۇستاپ تۇرعان قۇرمانعازى بەينەلەرى جارقىراتادى. سونداي-اق، قالىقتاعان بۇركىتپەن بىرگە كوتەرىلگەن كۇن، «الماتى، سەنى جاقسى كورەمىن» دەگەن جازۋى بار جۇرەك جانە باسقا دا بەينەلەر پايدا بولادى.
بۇل جارىق شوۋىنا كەز كەلگەن ادام قاتىسا الادى – كىرۋ تەگىن.