زيانكەستەرمەن كۇرەسكە 31 ارنايى تەحنيكا جۇمىلدىرىلعان.
قوستاناي وبلىسىندا شەگىرتكەدەن 500 گەكتارعا جۋىق ارپا ەگىستىگىنە زالال كەلدى، دەپ حابارلايدى Almaty-akshamy.kz
قوستاناي وبلىسى جانگەلدين اۋدانىنداعى «الماس» شق باسشىسى قايرات رايسوۆ شەگىرتكەلەردىڭ شاپقىنشىلىعى تۋرالى اقپاراتتى الەۋمەتتىك جەلىلەر ارقىلى ءبىرىنشى بولىپ تاراتتى. بۇگىن ول اۋىل شارۋاشىلىعى ۆيسە-مينيسترى ءابىلقايىر تامابەكپەن بىرگە ەگىستىكتەردى حيميالىق وڭدەۋ بويىنشا ءىس-شارالار وتكىزىلەتىن اۋدان اۋماعىن ارالاپ شىقتى.
قايرات رايسوۆتىڭ حابارلاۋىنشا، بۇعان دەيىن ايتىلعانداي، 10 مىڭ گەكتار ەمەس، 500 گەكتارعا جۋىق ارپا ەگىستىگىنە زالال كەلگەن. ونىڭ شارۋا قوجالىعىنىڭ ەگىستىكتەرىندە وڭدەۋ جۇمىستارى اياقتالىپ جاتىر.
ايتا كەتەيىك، شەگىرتكەلەردىڭ تارالۋ وشاقتارى اوك مەملەكەتتىك ينسپەكسيا كوميتەتىنىڭ وڭىرلىك بولىمشەلەرىنىڭ ءىس-قيمىلدارىنىڭ ارقاسىندا جەدەل تۇردە جويىلدى. قازىرگى ۋاقىتتا وڭىردە شامامەن 260 مىڭ گا نەمەسە جوسپارلانعان الاڭنىڭ 70%-ى وڭدەلدى. زيانكەستەرمەن كۇرەسكە 31 ارنايى تەحنيكا جۇمىلدىرىلدى: ونىڭ ىشىندە 9 جەلدەتكىش بۇرىككىش، 13 اەروزولدى گاز گەنەراتورى، 6 اسا جەڭىل اۆياسيالىق كەمە جانە 3 جەڭىل ۇشاق.
اۋىل شارۋاشىلىعى مينيسترلىگى تەكسەرىلمەگەن اقپاراتتى تاراتپاۋعا شاقىرادى. سەنىمدى دەرەكتەر مەملەكەتتىك ورگانداردىڭ رەسمي ينتەرنەت-رەسۋرستارىندا جاريالاندى.