وزبەكستان سەناتى ماۋسىم ايىنىڭ سوڭىندا زاڭدى ماقۇلدادى.
وزبەكستان پرەزيدەنتى شاۆكات ميرزيەيەۆ قازاقستانمەن مەملەكەتارالىق شەكارانى دەماركاسيالاۋ تۋرالى كەلىسىمدى راتيفيكاسيالاۋ تۋرالى زاڭعا قول قويدى، دەپ حابارلايدى Almaty-akshamy.kz
وزبەكستان قازاقستانمەن شەكارانى دەماركاسيالاۋ تۋرالى كەلىسىمدى راتيفيكاسيالاۋدى اياقتادى. رەسپۋبليكانىڭ ادىلەت مينيسترلىگى زاڭعا شاۆكات ميرزيويەۆ قول قويعانىن حابارلادى.
كەلىسىمگە تاشكەنتتە 2022 جىلدىڭ 22 جەلتوقسانىندا قازاقستان پرەزيدەنتى قاسىم-جومارت توقايەۆتىڭ وزبەكستانعا ساپارى بارىسىندا قول قويىلعان.
ناۋرىزدا قازاقستان پرەزيدەنتى قۇجاتتى راتيفيكاسيالاۋ تۋرالى زاڭعا قول قويدى. وزبەكستان سەناتى ماۋسىم ايىنىڭ سوڭىندا زاڭدى ماقۇلدادى.
"پرەزيدەنت قول قويعان "قازاقستان رەسپۋبليكاسى مەن وزبەكستان رەسپۋبليكاسى اراسىنداعى وزبەك-قازاق مەملەكەتتىك شەكاراسىن دەماركاسيالاۋ تۋرالى كەلىسىمدى راتيفيكاسيالاۋ تۋرالى" زاڭعا سايكەس كەلىسىم راتيفيكاسيالاندى"، - دەپ جازىلعان وزبەكستان ادىلەت مينيسترلىگىنىڭ Telegram-ارناسىنداعى حابارلامادا.
بۇعان دەيىن وزبەكستان سەناتىنىڭ اقپارات قىزمەتى وزبەك-قازاق شەكاراسىن ايقىنداۋ جونىندەگى كەلىسىمنىڭ جۇمىستى تولىعىمەن اياقتالعانىن، ونى راتيفيكاسيالاۋ ەكى ەل اراسىنداعى كوپ قىرلى ىنتىماقتاستىق قارىم-قاتىناستارىن ودان ءارى نىعايتۋعا جانە كەڭەيتۋگە قىزمەت ەتەتىنىن حابارلادى.
قازاقستان مەن وزبەكستان اراسىنداعى شەكارانىڭ ۇزىندىعى 2،3 مىڭ شاقىرىمنان اسادى. تاراپتار شەكارانى بەلگىلەۋ بويىنشا كەلىسسوزدەردى 2003 جىلى باستاعان.