قالامىزداعى الاتاۋ اۋدانىنىڭ تورىندە قاسيەتتى ۇلتتىق اسپاپتارىمىزدى دارىپتەپ، ۇلتتىق مادەنيەتىمىزدى ۇلىقتاپ جۇرگەن مۋلتيمەديالىق ءداستۇرلى مۋزىكا ورتالىعى بارىن ءبىرى بىلسە، ءبىرى بىلە بەرمەيدى.
ەل تاۋەلسىزدىگىنىڭ 25 جىلدىعى مەن الماتى قالاسىنىڭ 1000 جىلدىعىنا وراي اشىلعان بۇل ورتالىققا نەبارى 7 جىل تولسا دا، قازاق ان-كۇي الەمىندەگى بەلگىلى ونەر تۇلعالارىنىڭ اسپاپ مۇرالارىن ساقتاپ، ولاردى ۇرپاققا ناسيحاتتاۋدان جالىققان ەمەس. ورتالىقتا بىرەگەي قۇندى جادىگەرلەر ساقتاۋلى. ءار جادىگەردىڭ وتكەنى، تاريحى ءھام ايتارى دا بار.
قوڭىر ۇنگە ەلەڭ ەتەر قازاق بالاسىن وي قۇشاعىنا سۇڭگىتىپ، كۇندەلىكتى كۇيبەڭنەن ءبىر ساتكە بولسا دا سىلكىپ الار ءبىر قۇدىرەت بولسا، ول دومبىرانىڭ شاناعىندا. تالاي كورەرمەنىنە وسىنداي ساۋلەلى ساتتەر سىيلاعان قازاقستاننىڭ ەڭبەك سىڭىرگەن ءارتيسى قوشقاربەك تاسبەرگەنوۆتىڭ دومبىراسى دا مۋلتيمەديالىق ءداستۇرلى مۋزىكا ورتالىعىنان ويىپ تۇرىپ ءوز ورنىن العان. ونەر يەسى 2013 جىلى ومىردەن وتكەن بولاتىن. مارقۇمنىڭ دومبىراسىن مۋزەيگە زايىبى تولەۋ تاسبەرگەنوۆا اكەلىپ وتكىزگەن ەكەن.
قوشقاربەك تاسبەرگەنوۆ سىر وڭىرىندە دۇنيەگە كەلگەن. اكەسى تاسبەرگەن ءوز ايماعىنا بەلگىلى مىقتى كۇيشى بولعان ەكەن. قوشقاربەكتىڭ ونەردەگى العاشقى ۇستازى، دەمەك، اكەسى. اناسى كۇلپان بولسا دۋمان-ساۋىقتىڭ اجارى بولعان دەسەدى. وتباسىندا وسىنداي تاربيەنى كورگەن بالا قوشقاربەك مەكتەپ قابىرعاسىندا ءجۇرىپ-اق كىشىگىرىم وركەستر باسقارعان. كۇيدى جان-تانىمەن ءتۇسىنىپ، جۇرەگىمەن تۇيسىنگەن جاس قوشقاربەك ارمان قۋىپ الماتىعا كەلەدى. 1972 جىلى قازاقتىڭ مەملەكەتتىك قۇرمانعازى اتىنداعى اكادەميالىق حالىق اسپاپتار وركەسترىنىڭ جانىنان اشىلعان 6 ايلىق ستاجورلىق كۋرسقا ءتۇسىپ، كسرو حالىق ءارتيسى، مەملەكەتتىك سىيلىقتىڭ لاۋرەاتى، پروفەسسور، ايگىلى ديريجەر شامعون قاجىعالييەۆتان ءدارىس الادى. كۋرستى بىتىرگەن سوڭ وركەسترگە دومبىراشى بولىپ قابىلدانادى. وندا جۇمىس ىستەي ءجۇرىپ، 1974 جىلى قۇرمانعازى اتىنداعى الماتى مەملەكەتتىك كونسەرۆاتورياسىنىڭ دايىندىق كۋرسىنا تۇسەدى. كونسەرۆاتوريا قابىرعاسىندا كومپوزيتور، دومبىراشى، ديريجەر ءمالعاجدار ابۋباكىروۆ ءدارىس بەرەدى. ول 1981 جىلى كونسەرۆاتوريانى ءبىتىردى. 1983 جىلى وتكەن رەسپۋبليكالىق قۇرمانعازى اتىنداعى ورىنداۋشىلار كونكۋرسىنا قاتىسىپ، جەڭىمپاز اتانادى. 1992 جىلى حالىق قاھارمانى، مەملەكەتتىك سىيلىقتىڭ لاۋرەاتى، كومپوزيتور، ديريجەر ن.تىلەندييەۆتىڭ شاقىرتۋىمەن فولكلورلى-ەتنوگرافيالىق «وتىرار سازى» وركەسترىنە اۋىسادى. مۇندا دا قاجىرلى ەڭبەگىمەن ءوزىنىڭ لايىقتى باعاسىن الادى. وعان 1995 جىلى «قازاقستاننىڭ ەڭبەك سىڭىرگەن ءارتيسى» دەگەن قۇرمەتتى اتاق بەرىلەدى.
قوشقاربەك تاسبەرگەنوۆ ن.تىلەندييەۆ اتىنداعى فولكلورلى-ەتنوگرافيالىق «وتىرار سازى» وركەسترىنىڭ باس كونسەرتمەيسترى بولدى. تىنىمسىز ەڭبەگى ناتيجە بەرىپ، «قازاقستان رەسپۋبليكاسىنىڭ ءبىلىم بەرۋ ءىسىنىڭ قۇرمەتتى قىزمەتكەرى» اتاندى. قازاقتىڭ بولمىسىمەن بىتە قايناسىپ كەتكەن تاسبەرگەنوۆ دومبىرانى شەتەل ساحنالارىندا شەرتىپ، سىرتتىڭ جۇرتىن تاڭ-تاماشا ەتكەن. ول ماسكەۋ، چەحوسلوۆاكيا، شۆەيساريا، شۆەسيا، اۋستريا، فيليپپين ارالى، سينگاپۋر، ءۇندىستان، پورتۋگاليا، پاكىستان، تۇركيا سياقتى باسقا دا ەلدەردە بولىپ، قازاق ونەرىن اسپانداتتى.
ءمولدىر جاڭبىرباي قىزى، مۋلتيمەديالىق ءداستۇرلى مۋزىكا ورتالىعىنىڭ عىلىمي قىزمەتكەرى:
– قوشقاربەك تاسبەرگەنوۆ ونەر الەمىندە، مۋزىكانتتار اراسىندا، وركەستر قۇرامىندا، جالپى الماتى قالاسىندا بەك دەگەن اتپەن تانىمال بولعان. ونى نۇرعيسا تىلەندييەۆ وركەستردىڭ بەگى، تورەسى ساناعان. «وتىرار سازىنىڭ» «كۇي شاشۋ» اتتى كونسەرتىندە ن.تىلەندييەۆ تۇرىپ: «مىنا مەن ومىرىمدە احاڭسىز (احمەت جۇبانوۆ) سويلەمەيتىنمىن، ديريجەرلىق ەتپەيتىنمىن. احاڭنىڭ ارقاسىندا ونەرىمىز دامىدى. احاڭ ومىرىمدە قادىرلەيتىن ادامىم، مەنىڭ ومىرىمدە باعىناتىن پايعامبارىم. كوپتەگەن تالانتتار دۇنيەگە كەلدى. احاڭ بولماسا، انا تۇرعان قارشىعا، مىنا تۇرعان بەك تۋا ما؟! قۇرمانعازى، «وتىرار سازى» تۋار ما ەدى؟ قولىمداعى دومبىرانى 1937 جىلى ماعان احمەت جۇبانوۆتىڭ ءوزى سىيلاعان. ەندى وسى دومبىرامەن باياعى «ءالقيسسانى» تارتىپ بەرەيىن. «ءالقيسسا»، ورىندايتىن نۇرعيسا» دەپ، كۇيدى كۇمبىرلەتە جونەلگەن ەدى. سوندا بەك وركەستر قۇرامىندا ءبىرىنشى دومبىرادا ويناپ «ءالقيسسانىڭ» يىرىمدەرىن ءبىر قايىرىپ، ونى نۇرعيسا جالعاپ كەتىپ، ودان ەكەۋى قوسىلا كەتىپ، سوسىن وركەستر قوستاي كەتكەندە «ءالقيسسا» كۇيىنىڭ شەجىرەسى شەرتىلگەندەي، سازدى ءۇن سانامىزعا قۇيىلعانداي بولعانى راس. قوشقاربەك تاسبەرگەنوۆ جايىندا ءالى تالاي ايتىلارى دا، جازىلارى دا ءسوزسىز. قازاقتىڭ كۇي ونەرىن جالعايتىن وسىنداي دارىنداردىڭ ءىزىن باسار، قادامىن جالعار ونەرپازدار كوپ بولسا ەكەن.