اسابا كۇلدىرەم دەپ ءبۇلدىردى...

كەشەگى تويدىڭ اساباسى كۇلدىرەم دەپ ءبۇلدىرىپ، كوپ تۇستا سوزدەن سۇرىنە بەردى. ونىسى، ارينە، ءبىراز مەيمانعا ۇناي قويعان جوق.

– ال كانە، ەكى جاس باقىتتى بولسىن دەسەك، وڭ قولىمىزدى جوعارى كوتەرەيىك. شانىشقى ۇستايمىز ءبارىمىز. كانە، كانە، جوعارىراق. قىمسىنبايىق. كىمنىڭ قولتىعىندا جاعىمسىز ءيىس بولسا، سول كوتەرمەيدى. ال ەندى شانىشقىنى سول جاعىمىزدا وتىرعان ادامنىڭ باسىنا تىعىپ الامىز. ويناپ ايتامىن، – دەپ، شالت بۇرىلىپ، قاتىردىم دەگەندەي ءۇزىلىس جاساپ العان اسابا قوناقتارعا ءسوز بەرۋگە كوشتى. تىلەكتەردەن سوڭ ءۇزىلىس جاريالادى دا، «ال ەندى بۇتتان بۋ شىققانشا بيلەڭىزدەر!» دەگەنى...

ءقازىر جاز مەزگىلى. توي ماۋسىمى. ال ءسىز قانداي اسابا كورىپ ءجۇرسىز؟ جالپى، اسابالارعا كوڭىلىڭىز تولا ما؟ وسى جازبامىزدى جانە ساۋالىمىزدى Facebook الەۋمەتتىك پاراقشامىزدا جاريالاعان بولاتىنبىز.

عازيزحان ءادىلحانوۆ:

– وتىز جىل بويى توي باسقارىپ كەلەمىن. تويدا ادامدار شارشاماي، دەمالىپ، تاماشا ءازىل، اسەم اۋەندەر تىڭداپ، ۇلتتىق ويىندار ويناپ قايتۋى كەرەك. جالپى، اسابانىڭ ءبىلىمدى، مادەنيەتى جوعارى، ونەرلى، سوزگە شەشەن بولعانى دۇرىس. وكىنىشكە قاراي، قازىرگى كوپ اساباعا كوڭىلىم تولا بەرمەيدى. ولاردىڭ ماقساتى – اقشا تابۋ. ءبىز كەزىندە اقشا الماي-اق حالىق الدىنا شىعىپ ونەرىمىزدى كورسەتكەنىمىزگە، تەگىن جۇرگىزىپ، ەل العىسىن العانىمىزعا ريزا بولاتىنبىز.

جازيرا ەلشىبايەۆا:

– توي تىزگىنىن ەڭ الدىمەن ينتەللەكتۋالدىق دەڭگەيى جوعارى، مادەنيەتتى، سوزگە شەشەن، تاپقىر، ازىلمەن قوناقتاردى شوشىتىپ ەمەس، باۋراپ الاتىن ادام ۇستاعانى ءجون. توي باسقارۋ ويىنشىق ەمەس، جينالعان جۇرتتى شارشاتپاي، جالىقتىرماي، سول ءۇش-تورت ساعاتتا بارلىعىن قىزدىڭ جيعان جۇگىندەي ەتىپ وتكىزۋ – ۇلكەن ەڭبەك. ءقازىر ەكىنىڭ ءبىرى – اسابا. «شاشتارىن ءتۇيىپ، ادەمى كويلەك كيىپ» دەگەن سياقتى جۇتاڭ ۇيقاستارمەن تويدى باستايتىنداردى ءجيى كورەمىن. ارعى جاعى بەلگىلى... شاقىرعان ادامنان ۇيالعانىڭنان وتىراسىڭ. ۇيىمداستىراتىن ويىندارى دا تىم قارابايىر، دورەكى. كەيدە «دەڭگەيىمىز نەگە سونشالىق تومەن» دەپ ويلاپ قايتامىن.

جۇماحمەت جايلاۋبايەۆ:

– «ءبىر ءتامپىشتى سىنايمىن دەپ، بۇكىل پۇشىق جاۋ بولدى» دەپتى ءبىر اعامىز. بىرەۋىن سىناساڭ، ءبىرازى جاۋ بولىپ شىعا كەلەدى. ءبىراق ءۇزىلىس كەزىندە ءوتى جارىلىپ كەتسە دە ايتىپ ءجۇرمىن.

ماحات سادىق:

– الگى اسابانى شاقىرىپ الىپ، سىباعاسىن بەرۋ كەرەك قوي، فەيسبۋكتا ماسقارا ەتەم دەپ. كەيىن اتىن ايتپاي جازعانىڭنان نە پايدا؟ بىردەن ايتۋ كەرەك بەتىنە. مەن سولاي جاسايمىن، قويدىرام اۋسەلەسىن بىردەن!

داريعا نۇراشيەۆا:

– اۋىزىنا كەلگەنىن ايتاتىن دورەكى اسابالاردىڭ اتىن اتاپ، ءتۇسىن تۇستەۋ كەرەك. سوندا كەلەسى تويدا جاۋاپكەرشىلىكتى سەزىنەتىن بولادى.

قالدىباي دۇيسەمبايەۆ:

– سول جەردە وتىرعاندار تىيىپ، توقتاتىپ وتىرۋ كەرەك. ەشكىم ەسكەرتپەگەسىن قايتالاي بەرەدى.

ناعيما باراق:

– توست اراسىندا ۇلكەندەر ەسكەرتۋ جاساۋ كەرەك ەدى. ءيا، كۇلدىرەم دەپ ءبۇلدىرىپ جۇرگەندەر كوپ.

قۋات اديس:

– سول جەردە ارنايى ءسوز سۇراپ، ورتاعا شىعىپ، بەتىنە ايتۋىڭىز كەرەك ەدى. ءاربىرىمىز «توي يەسىنەن ۇيات بولار» دەمەي، ونداي اسابالاردىڭ ابەس ارەكەتتەرى مەن ۇياتقا تيەتىن سوزدەرىن ايتۋىمىز كەرەك. سوندا تىيىلادى.

رايحان يماحانبەت:

– ادەپسىز اساباعا ەسكەرتۋ ايتامىن دەپ، قۇداعيىمىزدى رەنجىتىپ العانىم بار.

شۇكىراللا شەرىمبەتوۆ:

– وسىنداي اسابالاردىڭ كەسىرىنەن تويدان ءسان كەتتى، كوڭىلدەنىپ ەمەس، مۇڭايىپ قايتاسىڭ.

جانار حالىقبەرگەنوۆا:

– اسابانى تاڭداعاندا تويدى قالاي جۇرگىزەتىن، قالاي باسقاراتىنىن وزىنەن سۇراۋ كەرەك. دورەكى سوزدەر، جامان قىلىقتار كورسەتپە دەپ ەسكەرتكەن ءجون دەپ ويلايمىن. ويتكەنى،  ءسىز جالداپ وتىرسىز. اقشاسىن تولەپ وتىرسىڭ، ايتۋعا مىندەتتىسىڭ. جينالعان جۇرتتى كۇلكىگە قارق قىلامىن دەپ كەيبىر اسابا ەرسى ارەكەتتەر جاسايدى. كەلگەن مەيماندار ءبىر اسابانىڭ وزىنەن دە ۇلگى الىپ كەتەتىندەي بولىپ جاتسا، كانەكەي. تويعا جينالعان اعايىن كۇيكى تىرلىكتەن ءبىر ءسات دەمالامىن دەپ كەلەدى، سوندىقتان ولار شارشاماي، ريزا بولىپ تاراۋى كەرەك.

ەرجەڭىس تاستىباي:

– تويدىڭ كوبىنەن كوڭىلسىز قايتام...

زامزاگۇل مۇقانوۆا:

– مەن قاسىنا بارىپ تۇرىپ، ەسكەرتۋ ايتام، ايتىپ قانا قويمايمىن، ميكروفوندى الىپ، حالىققا دا ۇندەۋ جاسايمىن. «قىمباتتى اعايىن، مىنا اسابا تارتىپتەن كەتىپ، اۋزىنا يە بولماعان جاعدايدا، ورتامىزدان، ءوز اسابامىزدى شىعارامىز» دەپ. سوسىن بىردەن بۋى بۇرق ەتىپ، تاۋبەسىنە تۇسە قالادى. ال ءسىز بەن ءبىزدىڭ ۇندەمەي قالعاندىعىمىزدان، اسابالار ەسىرىپ بارادى. ايتقان انايى سوزدەرىنەن قۇلاعىڭ تۇنادى، ال ويىن ويناتقاندارىن كورگەندە، جاعاڭدى ۇستايسىڭ. سوندىقتان توي يەلەرى بىردەن كەلىسىم جاساۋ كەرەك، ورنىمەن سويلە دەپ. كوپ نارسە وزىمىزگە دە بايلانىستى-اۋ. «ۇندەمەگەن ۇيدەي بالەدەن قۇتىلار» دەپ وتىرا بەرەمىز. جالپى، توي جونىندە ويلانار ماسەلە كوپ.

ولجاس وتار:

– اسحات قىلىشبەك، بولاتبەك مەيىربەك ۇلى دەگەن مىقتى اسابالار بار. سوزدەرىنىڭ اراسىنا قىل سيمايدى!

نۇرزيا الىمبەكوۆا:

– اسابالارعا ارنايى ىزدەنىس، رۋحاني ساباقتار، جان-جاقتى دامۋ قاجەت دەپ ويلايمىن. مەن ءوزىم اماندوس دەگەن اسابا جىگىتكە وتە ريزامىن، مادەنيەتتى، جان-جاقتى دامىعان ونەر يەسى.

بەكمىرزا سىرىمبەت ۇلى:

– مەن ءوزىم جاساعان تويلاردا اساباعا دورەكى ويىنداردى ويناتپاۋىن، ەرسى قىلىقتاردى كورسەتپەۋىن، ادەپسىز ازىلدەردى ايتپاۋىن الدىن الا ەسكەرتەمىن. ولاي ەتسەڭ، اقىڭدى قىسقارتامىن دەيمىن. ءبارىمىز سولاي ەتۋىمىز كەرەك!