الماتىدا ءدارىحانا قورشاۋىنىڭ تەمىر ىستىگى بالانىڭ تاماعىنا كىرىپ كەتكەن، دەپ حابارلايدى aqshamnews.kz.
وقيعا 1 تامىزدا بولعان. 9 جاستاعى بالا ۆەلوسيپەدپەن كەتىپ بارا جاتىپ، ۇشكىر تەمىردەن جاسالعان شارباققا قۇلاپ، دەنەسىنىڭ بىرنەشە جەرىنەن تەمىر كىرىپ كەتكەن. جەدەل جاردەم بالانى دەرەۋ الماتى بالالار شۇعىل مەديسينالىق كومەك كورسەتۋ ورتالىعىنىڭ قابىلداۋ بولىمىنە جەتكىزگەن.
بالا جابىق باس سۇيەك-مي جاراقاتى، ميدىڭ شايقالۋى، تراحەيا مەن اۋىز قۋىسىنىڭ زاقىمدالۋى مەن مويىن جاراقاتىن العان. تومەنگى جاقتىڭ ارتقى كورتيكالدى پلاستينكاسىنىڭ وڭ جاق بۇرىش ايماعى سىنعان. بالانىڭ مويىنىنان 4 مم/10 سم ولشەمدى بوگدە زات - مەتالل قورشاۋدىڭ سىنعان تەمىرى الىندى، – دەيدى دارىگەرلەر.
دارىگەرلەر بالانىڭ دەنەسىنەن نايزانىڭ ۇشى سياقتى مەتالدى الىپ تاستاۋ ءۇشىن 1،5 ساعات وتا جاساعان.
ءقازىر بالانىڭ جاعدايى اۋىر، جانساقتاۋ بولىمىندە جاتقىزىلعان.