بارلىق وڭىردە شەگىرتكەگە قارسى وڭدەۋ اياقتالدى – جۇمىس قورىتىندىسى پرەمەر-مينيستردىڭ ورىنباسارى سەرىك ءجۇمانعاريننىڭ توراعالىعىمەن وتكەن ۇكىمەتتەگى ورتالىق شتاب وتىرىسىندا شىعارىلدى.
وڭدەلگەن القاپتاردىڭ جالپى كولەمى 3،1 ملن گەكتاردى قۇرادى، بۇل بيىل بولجانعان 2،5 ملن گەكتار كورسەتكىشتەن 23%-عا جوعارى، دەپ حابارلايدى aqshamnews.kz قورعانىس مينيسترلىگىنە سىلتەمە جاساپ.
بولجامدى كولەمنىڭ ءىس جۇزىندە اسىپ كەتۋى جاڭا تارالۋ وشاعى انىقتالعان جەرلەردى قايتا وڭدەۋگە بايلانىستى قالىپتاستى.
تۇراقتى مونيتورينگ، دروندارمەن قوسا تەحنيكانى زيانكەستەردىڭ بەلسەندى تارالۋ ورىندارىنا جەدەل كوشىرۋ، ورتالىق ۇكىمەتتىك جانە وڭىرلىك دەڭگەيلەردەگى جاعدايدى قولمەن باسقارۋ جانە باقىلاۋ، شەكارا ماڭى مەملەكەتتەرىنىڭ اگرارلىق ۆەدومستۆولارىمەن تىعىز ءوزارا ءىس-قيمىل ءوز ناتيجەسىن بەردى – بيىل فەرمەرلەردىڭ ەگىستىكتەرى شەگىرتكەدەن زارداپ شەككەن جوق.
نەگىزگى قورعانىس ءىس-شارالارىنىڭ اياقتالۋىنا قاراماستان، تاعى ءبىر اپتا بويى جەكەلەگەن وڭىرلەردە شەگىرتكەنىڭ پايدا بولۋىن باقىلاۋ بويىنشا جۇمىس جۇرگىزىلەتىن بولادى.
ۇكىمەت شەگىرتكەگە قارسى بەلسەندى جۇمىس كەزەڭىن اياقتاپ، كەلەسى جىلعا دايىندىقتى باستايدى. بيىلعى جوسپاردا – شەگىرتكەنىڭ تارالۋ كولەمى بويىنشا بولجام جاساۋ جانە وڭىرلەردە فيتوسانيتاريالىق ينسپەكسيالار پايدالاناتىن دەرناسىلدەردىڭ پايدا بولۋ ورىندارىن مونيتورينگتەۋ ءۇشىن 100 درون ساتىپ الۋ قاراستىرىلعان. 2025 جىلى القاپتاردى وڭدەۋ ءۇشىن دروندار ساتىپ الۋ جوسپارلانۋدا.
سونداي-اق كەلەسى جىلى پەستيسيدتەرگە، ولاردى تاسىمالداۋعا، ساقتاۋعا جانە قولدانۋعا ارنالعان شىعىنداردى قامتيتىن شەگىرتكەگە قارسى ءبىرىڭعاي قىزمەتتى ورتالىقتاندىرىلعان ساتىپ الۋعا كوشۋ كوزدەلىپ وتىر. بۇل جەردى وڭدەۋدىڭ ساپاسى مەن تيىمدىلىگىن باقىلاۋعا، ورىنداۋشىلاردىڭ جاۋاپكەرشىلىگىن ارتتىرۋعا جانە بيزنەستىڭ ساتىپ الۋعا قاتىسۋىن تارتىمدى ەتۋگە مۇمكىندىك بەرەدى.