باقىلاۋ كۇشەيتىلدى
ماڭعىستاۋ وبلىسىندا قوقىستى رۇقسات ەتىلمەگەن جەرگە توگەتىندەرگە باقىلاۋ كۇشەيتىلدى. جىل باسىنان بەرى قورشاعان ورتانى لاستاعانى ءۇشىن 6 مىڭ ادامعا شارا قولدانىلدى، دەپ حابارلايدى Almaty-akshamy.kz قازاقپارات-قا سىلتەمە جاساپ.
«اسىرەسە، جاز ايلارىندا قوقىس ماسەلەسى وزەكتى. كۇن ىستىعىنا بايلانىستى اۋاعا جاعىمسىز ءيىس تارايدى. بۇدان قورشاعان ورتا دا، ادامداردىڭ وزدەرى دە زارداپ شەگەدى. جىل باسىنان بەرى تابيعاتتى قورعاۋ پوليسياسى 6 مىڭ ادامعا ايىپپۇل سالدى جانە بۇل جۇمىس الداعى ۋاقىتتا كۇشەيتىلەدى»، - دەيدى جەرگىلىكتى پوليسيا باسقارماسى باستىعىنىڭ مىندەتىن اتقارۋشى ءبىلىمعالي سۇلتانوۆ.
قورشاعان ورتا تازالىعىن ساقتامايتىن تۇرعىندارعا وسى ۋاقىتقا دەيىن 24 ملن 925 مىڭ تەڭگە ايىپپۇل سالىنعان. ايىپپۇل ارقالعانداردىڭ باسىم بولىگى، قارىزدارىنان قۇتىلعان. سونداي-اق، ەكولوگتارمەن بىرىگىپ جۇرگىزىلگەن رەيدتەر ناتيجەسىندە، ءتارتىپ بۇزۋشىلار اراسىندا تەك تابيعاتتى لاستاعاندار ەمەس، جاسىل جەلەككە نۇقسان كەلتىرگەن ازاماتتار انىقتالعان. ولارعا دا ءتيىستى شارا قولدانىلدى.