2022 جىلعى قاڭتار-مامىر ارالىعىندا 28،75 ملن توننا مۇناي ەكسپورتتالعان.
2022 جىلدىڭ قاڭتار-مامىر ايلارىندا قازاقستان 28،75 ملن توننا مۇناي ەكسپورتتاعان. ونىڭ 27،814 ملن تونناسى نەمەسە 97%-ى رەسەيدىڭ تەڭىز پورتتارى ارقىلى سىرتقا شىعارىلعان، دەپ حابارلايدى Almaty-akshamy.kz قازاقپاراتقا سىلتەمە جاساپ.
بۇل تۋرالى ق ر ەنەرگەتيكا مينيسترلىگىنىڭ باسپا ءسوز قىزمەتى رەداكسيانىڭ رەسمي ساۋالىنا جولداعان جاۋابىندا ايتتى.
«مۇناي مەن گازدىڭ اناليتيكالىق ورتالىعى» اق-نىڭ دەرەگى بويىنشا 2021 جىلى كاسپيي قۇبىر كونسورسيۋمى ارقىلى 53،1 ملن توننا قازاقستان مۇنايى ەكسپورتتالعان. ال 2022 جىلعى قاڭتار-مامىر ارالىعىندا كقك ارقىلى 23،76 ملن توننا قازاقستان مۇنايى ەكسپورتتالدى»، - دەپ جازىلعان جاۋاپتا.
ۆەدومستۆو بەرگەن دەرەككە سۇيەنسەك، جىلدىڭ العاشقى 5 ايىندا قازاقستان كاسپيي قۇبىر كونسورسيۋمىنان باسقا رەسەيلىك تەڭىز پورتتارى 4 ملن توننادان استام مۇناي ەكسپورتتاعان.
«مۇناي مەن گازدىڭ اناليتيكالىق ورتالىعى» اق-نىڭ مالىمەتى بويىنشا 2022 جىلعى قاڭتار-مامىر ارالىعىندا 28،75 ملن توننا مۇناي ەكسپورتتالدى. ونىڭ ىشىندە 27،814 ملن توننا مۇناي (ەكسپورتقا شىعارىلعان مۇنايدىڭ شامامەن 97%-ى) رەسەيدىڭ تەڭىز پورتتارى ارقىلى سىرتقا جونەلتىلدى»، - دەپ جازادى مينيسترلىك ماماندارى.
سونداي-اق، مينيسترلىك وكىلدەرى قازاقستاننىڭ ەكسپورتتالاتىن مۇناي باعاسىن كوتەرۋگە نيەتتى ەكەنى تۋرالى تاراعان مالىمەتكە پىكىر ءبىلدىردى.
«الەمدىك ساۋدا نارىقتارىندا مۇناي باعاسىن نارىق بەلگىلەيدى جانە ول پلاتس، ارگۋس، رەفينيتيۆ سياقتى تاۋەلسىز حالىقارالىق اگەنتتىكتەرى بەلگىلەگەن مەجەنىڭ نەگىزىندە قالىپتاسادى»، - دەلىنگەن مينيسترلىكتىڭ جاۋابىندا.
بۇعان دەيىن كاسپيي قۇبىر كونسورسيۋمىنىڭ جۇمىسىن توقتاتۋ تۋرالى سوت شەشىمى ايىپپۇلعا الماستىرىلعانى حابارلانعان بولاتىن.