قورعانىس ۆەدومستۆوسىندا جىل قورىتىندىسى شىعارىلدى

 جاۋىنگەرلىك دايىندىق باعدارلاماسى قايتا قارالدى

استانادا گەنەرال-پولكوۆنيك رۋسلان جاقسىلىقوۆتىڭ توراعالىعىمەن قورعانىس مينيسترلىگىنىڭ القا وتىرىسى بولىپ ءوتتى. وندا قارۋلى كۇشتەردىڭ 2022 جىلعى جاۋىنگەرلىك دايىندىق قورىتىندىلارى شىعارىلىپ، الداعى جىلعا ناقتى تاپسىرمالار قويىلدى. وڭىرلىك قولباسشىلىقتار مەن اسكەر تەكتەرىنىڭ، قۇرامالار مەن اسكەري بولىمدەردىڭ باسشىلىق قۇرامى القا وتىرىسىنا بەينەكونفەرەنسبايلانىس رەجيمىندە قاتىستى، دەپ حابارلايدى Almaty-akshamy.kz.

قورعانىس ءمينيسترى اتاپ وتكەندەي، وتكەن جىلى قورعانىس ۆەدومستۆوسى قىزمەتىنىڭ نەگىزگى باعىتتارى مەملەكەت باسشىسىنىڭ تاپسىرمالارىن ىسكە اسىرۋ جونىندەگى ءىس-شارالارعا ارنالدى. ونىڭ ىشىندە جاۋىنگەرلىك ازىرلىكتى قولداۋمەن قاتار، اسكەري قاۋىپسىزدىكتىڭ وزەكتى قاتەرلەرىن ەسكەرە وتىرىپ، قارۋلى كۇشتەردىڭ قۇرىلىمى مەن قۇرامىن جاڭعىرتۋ، سيفرلىق تاسىلدەر ارقىلى اسكەري باسقارۋ جۇيەسىن جەتىلدىرۋ، ارميانى قازىرگى زامانعى جوعارى تەحنولوگيالىق قارۋ-جاراق پەن اسكەري تەحنيكانىڭ ۇلگىلەرىمەن قايتا جاراقتاندىرۋ، جاۋىنگەرلىك دايارلىققا اسكەرلەردى قولدانۋدىڭ جاڭا ادىستەرىن ەنگىزۋ نەگىزگى بولىپ تابىلادى. مەريتوكراتيا قاعيداتى نەگىزىندە اسكەري ءبىلىم بەرۋ مەن كادر ساياساتى جۇيەسىن دامىتۋ، جەكە قۇرامنىڭ كاسىبي دەڭگەيىن ارتتىرۋ، اسكەري قىزمەتشىلەردىڭ الەۋمەتتىك مارتەبەسى مەن اسكەري قىزمەتتىڭ بەدەلىن ارتتىرۋ، سونداي-اق جاستاردى اسكەري بورىشىن وتكەرۋگە ىنتالاندىرۋ ماڭىزدى مانگە يە بولدى.

 – «سىرتقى كونتۋرداعى» احۋال كۇردەلى. سول سەبەپتى ءبىز قالىپتاسقان جاعداي مەن بيىلعى جىلى قول جەتكىزگەن ناتيجەلەر نەگىزىندە جوعارعى باس قولباسشىنىڭ تاپسىرماسىن انىق ءتۇسىنىپ، جەكە قۇرامعا ناقتى جەتكىزۋگە ءتيىسپىز. ەڭ باستىسى، ۇكىمەتتىڭ كەڭەيتىلگەن وتىرىسىندا مەملەكەت باسشىسى اتاپ وتكەندەي، باسشىلىقتا الدىمىزعا قويىلعان مىندەتتەردى ساپالى ءارى تولىق ورىنداۋعا قابىلەتتى ادامدار بولۋى ءتيىس، – دەدى گەنەرال-پولكوۆنيك رۋسلان جاقسىلىقوۆ.

2022 جىلى قازىرگى زامانعى سىن-تەگەۋرىندەر مەن قاۋىپ-قاتەرلەرگە سايكەس اسكەري دوكتريناعا وزگەرىستەر ەنگىزىلدى. قارۋلى كۇشتەردىڭ قۇرامىندا جوعارى ءموبيلدى جانە گيبريدتى سوعىستار جۇرگىزۋگە قابىلەتتى ارنايى وپەراسيالار كۇشتەرى قۇرىلدى.

«باتىل تويتارىس – 2022»، «ايبالتا-2022» جانە «بەكەت-2022» سياقتى اۋقىمدى وقۋ-جاتتىعۋلارى بارىسىندا كۇشتىك قۇرىلىمدارمەن، ورتالىق مەملەكەتتىك جانە جەرگىلىكتى اتقارۋشى ورگاندارمەن ءوزارا ءىس-قيمىل پىسىقتالدى. قارۋلى كۇشتەردىڭ بولىمشەلەرى حالىقارالىق جاتتىعۋلارعا قاتىستى. ولاردىڭ كوپشىلىگى ءبىزدىڭ ەلىمىزدىڭ اۋماعىندا ءوتتى.

جاۋىنگەرلىك دايىندىق باعدارلاماسى قايتا قارالدى. اسكەري قىزمەتشىلەردى كەزەڭ-كەزەڭمەن دايارلاۋدى جانە وقۋ كەزەڭىندە بولىمشەلەردى ۇيلەستىرۋدى كوزدەيتىن جەكە قۇرامنىڭ جارتى جىلدىق جاۋىنگەرلىك وقۋ جۇيەسى ەنگىزىلدى. قازىرگى زامانعى قارۋلى قاقتىعىستاردىڭ تاجىريبەسىن، ۇشقىشسىز ۇشۋ اپپاراتتارى مەن جوعارى دالدىكتەگى قارۋدى قولدانۋدى ەسكەرە وتىرىپ، اسكەرلەردە جاۋىنگەرلىك ءىس-قيمىلداردىڭ جاڭا تاكتيكالىق تاسىلدەرىن يگەرۋ قولعا الىندى.

اسكەرلەر جوسپارلى تۇردە وزىق قارۋ-جاراقپەن جانە باسقارۋ جۇيەلەرىمەن جابدىقتالۋدا. بيىل 170-تەن استام اسكەري تەحنيكا ساتىپ الىندى. 100-گە جۋىق اسكەري تەحنيكا جوندەۋ مەن جاڭعىرتۋدان ءوتتى.

نەگىزگى باعىتى قارۋ مەن وق-دارىلەردى ساقتاۋ قاۋىپسىزدىگىن قامتاماسىز ەتۋ بولىپ تابىلاتىن اسكەري ينفراقۇرىلىمدى دامىتۋ جالعاسۋدا. «ءقاۋىپسىز ەل» ۇلتتىق جوباسى اياسىندا زاماناۋي اسكەري قويمالار سالۋ، سونداي-اق قولدا بار نىسانداردى جەتىلدىرۋ ۇيىمداستىرىلدى.

اسكەردىڭ بارلىق سالاسىنا، ونىڭ ىشىندە اسكەرلەردى باسقارۋ جۇيەسىنە سيفرلىق تەحنولوگيالاردى ەنگىزۋگە ەرەكشە نازار اۋدارىلدى. اسكەري مىندەتتىلەر مەن اسكەرگە شاقىرىلۋشىلاردىڭ ەسەبى سيفرلىق فورماتقا كوشىرىلدى. بۇل ءوز كەزەگىندە جەرگىلىكتى اسكەري باسقارۋ ورگاندارىنىڭ جۇمىسىن اۆتوماتتاندىرۋعا مۇمكىندىك بەردى.

قورعانىس ۆەدومستۆوسى اسكەري قىزمەتشىلەردىڭ قازا بولۋىن بارىنشا ازايتۋعا باعىتتالعان «ءومىرىڭدى ساقتا» باعدارلاماسىن ازىرلەپ، ىسكە اسىرۋدا. وعان ورتالىق مەملەكەتتىك ورگاندار مەن جۇرتشىلىق كەڭىنەن تارتىلعان.

اسكەري قىزمەتتىڭ قوعامداعى بەدەلىن ارتتىرۋعا باعىتتالعان شارالار قابىلداندى. «جاس سارباز» اسكەري-پاتريوتتىق قوزعالىسىنا جاستاردى تارتۋ جۇمىسى جانداندى. قورعانىس مينيسترلىگى ەلىمىزدىڭ 50-دەن استام جەتەكشى جوعارى وقۋ ورىندارىمەن مەموراندۋمعا قول قويدى. وسىعان سايكەس، مەرزىمدى اسكەري قىزمەتىن وتكەرگەن ازاماتتار ۇبت-نى تاپسىرماي وقۋعا قابىلدانادى. ال ۇزدىكتەرگە تەگىن وقۋعا گرانتتار بەرىلەتىن بولادى.

قورعانىس ۆەدومستۆوسىنىڭ باسشىلىعى اسكەري قىزمەتشىلەردىڭ الەۋمەتتىك قامتاماسىز ەتىلۋىن جاقسارتۋدى نازاردان تىس قالدىرعان ەمەس. مەملەكەت باسشىسىنىڭ تاپسىرماسىنا سايكەس، 2021-2023 جىلدارى جەكە قۇرامنىڭ اقشالاي ۇلەسىن جوسپارلى تۇردە ارتتىرۋ جۇرگىزىلۋدە. 2023 جىلى لاۋازىمدىق جالاقىنىڭ 3 جىلداعى جالپى ءوسۋى 2020 جىلعى مولشەرىنىڭ 60 پايىزىن قۇرايدى.

بۇدان وزگە، پارلامەنت ءماجىلىسىنىڭ حالىقارالىق ىستەر، قورعانىس جانە قاۋىپسىزدىك كوميتەتىنىڭ دەپۋتاتتارى قورعانىس ءمينيسترى گەنەرال-پولكوۆنيك رۋسلان جاقسىلىقوۆتىڭ وتان الدىنداعى بورىشتى وتەۋدە ورتاق مىندەتتەردى ورىندايتىن اسكەري قىزمەتشىلەر مەن كۇشتىك قۇرىلىمدار قىزمەتكەرلەرىنىڭ اقشالاي ۇلەس مولشەرىن تەڭەستىرۋ تۋرالى باستاماسىن قولدادى. مەديسينا قىزمەتكەرلەرىنىڭ، اسكەري وقۋ ورىندارى وقىتۋشىلارىنىڭ جانە جالپى ازاماتتىق پەرسونالدىڭ جالاقىسىن ارتتىرۋ بويىنشا جۇمىس جۇرگىزىلىپ جاتىر.

القا وتىرىسىندا اسكەري ءتارتىپ پەن قۇقىقتىق ءتارتىپ، سىبايلاس جەمقورلىققا قارسى قىزمەت ماسەلەلەرى قارالدى. وتكەن جىلمەن سالىستىرعاندا، اسكەري قىزمەتشىلەردىڭ قازا بولۋ جاعدايلارىنىڭ 21 پايىزعا، اسكەري قىلمىستاردىڭ، ونىڭ ىشىندە قول جۇمساۋدىڭ 26 پايىزعا، اكىمشىلىك قۇقىق بۇزۋشىلىقتاردىڭ 46 پايىزعا تومەندەۋى بايقالدى. سىبايلاس جەمقورلىق قىلمىستار سانى ەكى ەسەگە جۋىق (44%) قىسقاردى.

جىل قورىتىندىسى بويىنشا بارلىق قۇرىلىمدىق بولىمشەلەرگە جالپى قىزمەت ناتيجەلەرىنە سايكەس باعا بەرىلدى. اتاپ ايتقاندا، اسكەر تۇرلەرى اراسىندا قۇرلىق اسكەرلەرى، وڭىرلىك قولباسشىلىقتار مەن اسكەر تەكتەرى بويىنشا دەسانتتىق-شابۋىلداۋ اسكەرلەرى، قۇرامالار مەن اسكەري بولىمدەردىڭ ىشىندە 38-دەسانتتىق-شابۋىلداۋ قۇراماسى ۇزدىك اتاندى.

القا وتىرىسىنىڭ قورىتىندىسىندا الداعى 2023 جىلعا مىندەتتەر قويىلدى. قورعانىس ءمينيسترى بارلىق لاۋازىمدى تۇلعالار قىزمەتىنىڭ تيىمدىلىگىنىڭ باستى ينديكاتورى رەتىندە ەلدىڭ قورعانىس قابىلەتىن قامتاماسىز ەتۋ ءۇشىن وتكىزىلەتىن ءىس-شارالاردىڭ پراكتيكالىق ماڭىزدىلىعىن ايقىندادى.

باستى نازار ماقساتى بويىنشا مىندەتتەردى ورىنداۋدا جەكە قۇرامنىڭ، قارۋ-جاراق پەن اسكەري تەحنيكانىڭ ماتەريالدىق قۇرالداردىڭ دايىندىعىنا باعىتتالاتىن بولادى. جاۋىنگەرلىك دايارلىق باعىتىندا كۇش-جىگەردى اسكەري قاۋىپسىزدىككە، قازىرگى زامانعى قاتەرلەر تۇرعىسىنان اسكەري قىزمەتشىلەردى وقىتۋ ساپاسىنا، وقۋ-ماتەريالدىق بازانى جەتىلدىرۋگە جۇمىلدىرۋ كەرەك.

كۇندەلىكتى جانە وقۋ-جاۋىنگەرلىك قىزمەتتى ۇيىمداستىرۋ پروسەسىندە تاكتيكالىق باسقارۋ بۋىنى رەتىندە كومانديرلەرگە كوبىرەك دەربەستىك بەرۋ، ولاردىڭ كەز كەلگەن جاعدايدا شەشىم قابىلداۋ قابىلەتىن دامىتۋ قاجەت ەكەندىگى اتاپ ءوتىلدى.

بۇدان وزگە، شالعايداعى گارنيزونداردا قىزمەت وتكەرىپ جاتقان اسكەري قىزمەتشىلەردىڭ الەۋمەتتىك ءال-اۋقاتىن جاقسارتۋ جونىندەگى شارالار كەشەنى جوسپارلانعان. ول ءۇشىن مۇددەلى ورتالىق مەملەكەتتىك ورگاندار مەن كۇشتىك قۇرىلىمداردى تارتا وتىرىپ، جۇيەلى جۇمىس ۇيىمداستىرىلاتىن بولادى.