ەلىمىزدە تاعى 20 پوليگون سالۋ جوسپارلانىپ وتىر
ق ر پرەمەر-مينيسترى ءاليحان سمايىلوۆتىڭ توراعالىعىمەن وتكەن پرەزيدەنت جانىنداعى «جاسىل ەكونوميكاعا» كوشۋ جونىندەگى كەڭەستىڭ وتىرىسىندا كوممۋنالدىق قالدىقتاردى باسقارۋ تيىمدىلىگىن ارتتىرۋ جانە تۇرعىن ءۇي سەكتورىندا، ونەركاسىپتە جانە باسقا دا سالالاردا ەنەرگيا ۇنەمدەۋ تەحنولوگيالارىن ەنگىزۋ جونىندەگى جوسپارلار قارالدى، دەپ حابارلايدى Almaty-akshamy.kz.
ەكولوگيا، گەولوگيا جانە تابيعي رەسۋرستار ءمينيسترى سەرىكقالي برەكەشيەۆ بيىلعى جىلدىڭ ءۇشىنشى توقسانىندا رەسپۋبليكا بويىنشا قاتتى تۇرمىستىق قالدىقتاردى قايتا وڭدەۋ ۇلەسى 24%-دى قۇراعانىن باياندادى. بۇل كورسەتكىش جىل سايىن ارتىپ كەلەدى (2020 – 18%، 2021 – 21%) جانە 2025 جىلعا قاراي 30%-دان اسۋى كەرەك.
ونىڭ ايتۋىنشا، بۇگىندە ەلىمىزدە 3 005 قتق پوليگونى جۇمىس ىستەيدى، بۇدان بولەك اباي، اقمولا، اقتوبە، اتىراۋ، شىعىس قازاقستان، باتىس قازاقستان جانە پاۆلودار وبلىستارىندا تاعى 20 پوليگون سالۋ جوسپارلانىپ وتىر. ءارتۇرلى كەزەڭدەردە قوقىستى ءبولىپ جيناۋ 142، ال سۇرىپتاۋ 101 ەلدى مەكەندە ەنگىزىلدى.
پرەمەر-مينيستر قولدانىستاعى پوليگونداردىڭ ىشىندە تەك 630-عا جۋىعى عانا (21%) ەكولوگيالىق جانە سانيتارلىق نورمالارعا ساي ەكەنىن اتاپ ءوتتى. سونداي-اق ۇكىمەت باسشىسى جىلىنا 4-4،5 ملن توننا تۇرمىستىق قالدىقتار جينالاتىنىن، الايدا جەرگىلىكتى اتقارۋشى ورگاندار قوقىس جيناۋ جۇمىسىن ءتيىستى دەڭگەيدە ۇيىمداستىرا الماي وتىرعانىن ايتتى.
«بۇل ءۇردىس ستيحيالىق پوليگونداردىڭ پايدا بولۋىنا الىپ كەلەدى، ولاردى جويۋ ءۇشىن بيۋدجەت قاراجاتى جۇمسالادى. اتاپ ايتقاندا، قۇرىلىس قالدىقتارىن قايتا وڭدەۋگە ارنالعان ينفراقۇرىلىم قوستاناي وبلىسى مەن ەلوردادا عانا ۇيىمداستىرىلعان. قالعان ايماقتاردا ونداي ينفراقۇرىلىم جوق»، — دەدى ءاليحان سمايىلوۆ.
پرەمەر-مينيستر اكىمدىكتەرگە 2023 جىلعى 1 ماۋسىمعا دەيىن بارلىق رۇقسات ەتىلمەگەن پوليگونداردى جويۋدى جانە جالپى پوليگونداردى ەكولوگيالىق جانە سانيتارلىق نورمالارعا سايكەستەندىرۋ جۇمىستارىن جەدەلدەتۋدى تاپسىردى.
سونىمەن قاتار پرەمەر-مينيستر قالدىقتاردىڭ بارلىق ءتۇرىن قايتا وڭدەۋدى ىنتالاندىرۋ، 5 000-نان 10 000 ادامعا دەيىن تۇراتىن ەلدى مەكەندەر ءۇشىن پوليگونداردىڭ ۇلگىلىك جوبالارىن ازىرلەۋدى جەدەلدەتۋ، سونداي-اق جاڭا قالا قۇرىلىسى كودەكسى اياسىندا قۇرىلىس قالدىقتارىنىڭ اينالىمى جونىندەگى نورمانى قاراستىرۋ قاجەتتىگىن اتاپ ءوتتى.
ەنەرگيا ۇنەمدەۋ جانە ەنەرگيا تيىمدىلىگىن ارتتىرۋ ماسەلەلەرى بويىنشا يندۋستريا جانە ينفراقۇرىلىمدىق دامۋ ءمينيسترى قايىربەك وسكەنبايەۆ باياندادى.
ول «جاسىل ەكونوميكاعا» كوشۋ جونىندەگى تۇجىرىمداماعا سايكەس، 2030 جىلعا قاراي ەكونوميكادا ەنەرگيانىڭ جۇمسالۋىن 30%-عا (2008 جىلعى دەڭگەيدەن) تومەندەتۋ جوسپارلانىپ وتىرعانىن اتاپ ءوتتى. وسىعان بايلانىستى كوپ پاتەرلى تۇرعىن ۇيلەردىڭ، الەۋمەتتىك وبەكتىلەردىڭ، ونەركاسىپ كاسىپورىندارىنىڭ جانە كولىك ينفراقۇرىلىمىنىڭ ەنەرگيا تيىمدىلىگىن ارتتىرۋ جونىندەگى شارالاردى ىسكە اسىرۋ كوزدەلىپ وتىر. ءمينيستردىڭ ايتۋىنشا، باسقارۋدىڭ، ەنەرگومەنەدجمەنتتىڭ اۆتوماتتاندىرىلعان جۇيەلەرى ەنگىزىلەدى، ارنايى قۇرىلعىلار ورناتىلىپ، جابدىقتار اۋىستىرىلادى.
پرەمەر-مينيستر بۇل تاسىلدەردى قولداپ، تۇرعىن ءۇي سەكتورىنا ءبىرىنشى كەزەكتە نازار اۋدارۋ قاجەتتىگىن اتاپ ءوتتى.