«جاس سارباز» اسكەري-پاتريوتتىق قوزعالىسىنىڭ ءۇش تاربيەلەنۋشىسى ماراپاتتالدى.
مەملەكەت باسشىسى جاريالاعان بالالار جىلىنا ورايلاستىرىلعان ءىس-شارالار اياسىندا قورعانىس ۆەدومستۆوسىنىڭ باسشىسى، گەنەرال-پولكوۆنيك رۋسلان جاقسىلىقوۆ «جاس سارباز» قوزعالىسىنىڭ 2022 جىلى ەرەكشە كوزگە تۇسكەن تاربيەلەنۋشىلەرىمەن كەزدەستى، دەپ حابارلايدى Almaty-akshamy.kz.
قورعانىس ءمينيسترى مادەنيەت جانە سپورت مينيسترلىگى ۇيىمداستىرعان رەسپۋبليكالىق جاس پاتريوتتار فورۋمىنىڭ لاۋرەاتى اتانعان «جاس سارباز» اسكەري-پاتريوتتىق قوزعالىسىنىڭ ءۇش تاربيەلەنۋشىسىن ماراپاتتادى.
تالدىقورعان قالاسى مۇحتار ارىن اتىنداعى №24 دارىندى بالالارعا ارنالعان مامانداندىرىلعان ليسەيدىڭ 7 سىنىپ وقۋشىسى نۇراسىل ءشارىپوۆ «جاس روبوتوتەحنيك» نوميناسياسى بويىنشا ۇزدىك اتاندى. الماتى وبلىسىنىڭ شامالعان كەنتىندەگى التىنسارين اتىنداعى ورتا مەكتەپتىڭ 7 سىنىپ وقۋشىسى ءالي دوسمان «جاس سپورتشى» نوميناسياسىن جەڭىپ الدى. ال اتىراۋ قالاسىنداعى № 3 مەكتەپ-گيمنازيانىڭ 3 سىنىپ وقۋشىسى دىنمۇحاممەد جاڭبىربايعا «جاس باتىر» نوميناسياسى بەرىلدى.
– جاس پاتريوتتار فورۋمىنا قاتىسقان ەكى جۇزدەن استام كانديداتۋرانىڭ اراسىنان «جاس سارباز» اسكەري-پاتريوتتىق قوزعالىسىنىڭ تاربيەلەنۋشىلەرى، سەندەردىڭ جەڭىمپاز بولعاندارىڭ - ءبىز ءۇشىن ۇلكەن ماقتانىش. سەندەردى بۇگىنگى جەڭىستەرىڭمەن قۇتتىقتايمىن! ءارقاشان بىلىمگە، جاڭا جەتىستىكتەرگە ۇمتىلا بەرىڭدەر! اقىلدى، قايراتتى ءارى باتىل بولىپ وسىڭدەر. ءاردايىم يگى دە ۇلى ىستەردى جاساۋعا دايىن بولىڭدار. سەندەردى مەكتەپتەن سوڭ بولاشاق وتان قورعاۋشىلار رەتىندە، اسكەري وقۋ ورىندارىنىڭ كۋرسانتتارى قاتارىنان كورەمىن دەپ ۇمىتتەنەمىن، – دەدى قورعانىس ءمينيسترى رۋسلان جاقسىلىقوۆ.
گەنەرال-پولكوۆنيك رۋسلان جاقسىلىقوۆ سالتاناتتى جاعدايدا نۇراسىل ءشارىپوۆ پەن ءالي دوسمانعا گراموتالار تابىس ەتتى. دىنمۇحاممەد جاڭبىرباي قورعانىس ءمينيسترىنىڭ قولىنان «ەل قورعانى» ۆەدومستۆولىق مەدالىن الدى.
دىنمۇحاممەد 2022 جىلعى 3 جەلتوقساندا جايىق وزەنىندە ويناپ ءجۇرىپ، مۇز استىنا ءتۇسىپ كەتكەن توعىز جانە ون ءتورت جاستاعى ەكى بالانى قۇتقارىپ قالعان بولاتىن. نەبارى سەگىز جاستاعى ول قيىن ساتتە ابدىراپ قالماي، ءوزىن ناعىز باتىر رەتىندە كورسەتە ءبىلدى.