قورعانىس ۆەدومستۆوسىنىڭ باسشىسى گەنەرال-پولكوۆنيك رۋسلان جاقسىلىقوۆ گەنەرالدار مەن وفيسەرلەرگە قورعانىس ءمينيسترىنىڭ ءبىرىنشى ورىنباسارى – قارۋلى كۇشتەر باس شتابىنىڭ باستىعى گەنەرال-لەيتەنانت سۇلتان قامالەتدينوۆتى تانىستىرا وتىرىپ، وعان جاڭا ىستە تابىس تىلەدى.
مينيستر باس شتاب پەن قارۋلى كۇشتەر قولباسشىلىعى گەنەرال-لەيتەنانت سۇلتان قامالەتدينوۆتىڭ باسشىلىق ەتۋىمەن ورىندالاتىن اسكەرلەردىڭ جاۋىنگەرلىك ازىرلىگى مەن جاۋىنگەرلىك قابىلەتىن ودان ءارى نىعايتۋعا باعىتتالعان ءبىرقاتار مىندەتتەردى بەلگىلەدى، دەپ حابارلايدى Almaty-akshamy.kz قورعانىس مينسيترلىگىنە سىلتەمە جاساپ.
ول سۇلتان بۇركىتباي ۇلىنىڭ جۇكتەلگەن ىسكە قۇزىرەتتىلىگى، ۇيىمداستىرۋشىلىق قاسيەتتەرى مەن جاۋاپتى كوزقاراسى ەلدىڭ ەگەمەندىگى مەن اۋماقتىق تۇتاستىعىن قورعاۋ جونىندەگى مىندەتتەردى ناتيجەلى ىسكە اسىرۋ ءۇشىن جۇمىس ىستەيتىنىنە سەنىم ءبىلدىردى.
ودان بولەك مينيستر وسى لاۋازىمدا كادرلىق وزگەرىستەرگە دەيىن قىزمەت اتقارعان گەنەرال-لەيتەنانت مارات قۇسايىنوۆقا العىسىن ءبىلدىرىپ، ونىڭ قارۋلى كۇشتەردىڭ دامۋىنا جانە ەلدىڭ قورعانىس قابىلەتىن نىعايتۋعا قوسقان ەلەۋلى ۇلەسىن اتاپ ءوتتى.
ەستەرىڭىزگە سالا كەتسەك، مەملەكەت باسشىسىنىڭ وكىمىمەن 2024 جىلعى 15 قاڭتاردا قورعانىس ءمينيسترىنىڭ ءبىرىنشى ورىنباسارى – ق ر قارۋلى كۇشتەرى باس شتابىنىڭ باستىعى بولىپ قامالەتدينوۆ سۇلتان بۇركىتباي ۇلى تاعايىندالدى. وسىعان دەيىن ول قورعانىس ءمينيسترىنىڭ تاربيە جانە يدەولوگيالىق جۇمىس جونىندەگى ورىنباسارى قىزمەتىن اتقارعانىن ايتا كەتكەن ءجون.