قارۋلى كۇشتەردىڭ قىزمەتىن جەتىلدىرۋ جولدارى تالقىلاندى
قورعانىس ۆەدومستۆوسىنىڭ باسشىسى گەنەرال-پولكوۆنيك رۋسلان جاقسىلىقوۆ وقۋ-ادىستەمەلىك جيىندارى شەڭبەرىندە اسكەر تۇرلەرىنىڭ باس قولباسشىلارىمەن، وڭىرلىك قولباسشىلىقتار مەن اسكەر تەكتەرىنىڭ قولباسشىلارىمەن، اسكەري بولىمدەر مەن قۇرامالاردىڭ كومانديرلەرىمەن كەڭەس وتكىزدى، دەپ حابارلايدى Almaty-akshamy.kz.
ورىستەتىلگەن كوماندالىق پۋنكتتى تەكسەرۋ بارىسىندا مينيستر قولباسشىلاردىڭ، قۇرامالار مەن باتالون كومانديرلەرىنىڭ باسقارۋ پۋنكتتەرىن ۇيىمداستىرۋدا وسىنداي تاساداعى ورىنداردىڭ وزەكتىلىگىن اتاپ ءوتتى.
– بەكىندىرىلگەن باسقارۋ پۋنكتتەرى – قازىرگى زامانعى قارۋلى قاقتىعىستاردىڭ ستاندارتى. جوعارى قاۋىپسىزدىك بولىمشەلەرمەن جۇمىستىڭ تيىمدىلىگىن ارتتىرادى، – دەدى ول.
كوماندالىق قۇراممەن وتكەن كەزدەسۋدە مينيستر اسكەرلەردىڭ جاۋىنگەرلىك ازىرلىگىن، جاۋىنگەرلىك قابىلەتتىلىگى مەن ۇتقىرلىعىن ارتتىرۋعا باعىتتالعان قارۋلى كۇشتەردىڭ قىزمەتىن جەتىلدىرۋ جولدارىن تالقىلادى.
وقۋ-ادىستەمەلىك جيىندار شەڭبەرىندە قاتىسۋشىلار جاۋىنگەرلىك ءىس-قيمىلداردى جۇرگىزۋ بارىسىندا اسكەري قۇرالىمدار شتابتارىنىڭ قىزمەت الگوريتمىمەن جانە جەدەل-تاكتيكالىق بۋىننىڭ باسقارۋ ورگاندارى اراسىنداعى بايلانىستى ۇيىمداستىرۋمەن تانىستى.
جيىنعا قاتىسۋشىلار اسكەري قىزمەتشىلەردى بۇۇ بىتىمگەرشىلىك ميسسياسىن ورىنداۋعا دايىنداۋ ماسەلەلەرىن تالقىلاپ، HATO ستاندارتتارىنا سايكەس شتاب جۇمىسىنىڭ ۇيىمداستىرىلۋىمەن تانىستى.
وتكىزىلگەن ساباقتار كومانديرلەرگە اسكەري بولىمدەر مەن قۇرامالاردا جاۋىنگەرلىك دايارلىقتى ۇيىمداستىرۋ، ءار ءتۇرلى جاۋىنگەرلىك ءىس-قيمىلداردا اسكەرلەردى باسقارۋ داعدىلارىن الۋعا مۇمكىندىك بەرەدى. ولار كوماندالىق قۇرامنىڭ الدىندا تۇرعان ماسەلەلەر مەن مىندەتتەردىڭ وزەكتى سپەكترى بويىنشا ءبىرىڭعاي وقۋ-ادىستەمەلىك بازانى ازىرلەۋگە باعىتتالعان.
باسشىلىق قۇرامنىڭ جيىندارى قورعانىس ءمينيسترىنىڭ قولباسشىلىعىمەن وتەتىن كوشپەلى اسكەري القا جۇمىسىمەن اياقتالماق. وندا قارۋلى كۇشتەردىڭ قىسقى وقۋ كەزەڭىندەگى قىزمەتىنىڭ قورىتىندىلارى شىعارىلىپ، كەلەسى كەزەڭگە مىندەتتەر قويىلادى.