ەلەنا رىباكينا ريمدە الەمنىڭ ءبىرىنشى راكەتكاسىمەن وينايدى

ويىن ءبىر جارىم ساعاتقا سوزىلدى

قازاقستاندىق ەلەنا رىباكينا ريم WTA 1000 ءتۋرنيرىنىڭ شيرەك فينالىندا الەمنىڭ 1-راكەتكاسى، پولشا وكىلى يگا شۆەنتەكپەن وينايدى، دەپ حابارلايدى Almaty-akshamy.kz قازاقپاراتقا سىلتەمە جاساپ.

ي. شۆەنتەك ءتورتىنشى اينالىمدا الەمنىڭ 24-راكەتكاسى، حورۆاتيالىق دوننا ۆەكيچتى 6:3، 6:4 ەسەبىمەن ۇتتى.

ءبىر جارىم ساعاتتان استام ۋاقىتقا سوزىلعان باسەكەدە پولياك تەننيسشىسى 3 ەيس جاساپ، 3 برەيك-پوينتتى ءمۇلت جىبەرمەدى. قارسىلاسى 2 ەيس، 1 برەيكپەن (7 برەيك-پوينت) كوزگە ءتۇستى.

وسىلايشا، «ۇلكەن دۋلىعا» جارىسىنىڭ ءتورت دۇركىن چەمپيونى، ريم ماستەرس ءتۋرنيرىنىڭ وتكەن جىلعى جەڭىمپازى ي. شۆەنتەك جارتىلاي فينالعا شىعۋ ءۇشىن قازاقستاندىق ەلەنا رىباكينامەن تالاسادى.

ي. شۆەنتەك پەن ە. رىباكينا وسىعان دەيىن ءوزارا ءۇش رەت كەزدەسكەن. ەسەپ – 2:1، ەلەنا الدا. 2021 جىلى وستراۆادا پولياك سپورتشىسى 7:6، 6:2 ەسەبىمەن باسىم ءتۇستى. ەسەسىنە ە. رىباكينا 2023 جىلى اۋستراليا اشىق چەمپيوناتىنىڭ ءتورتىنشى اينالىمىندا 6:4، 6:4، ينديان-ۋەللس دوداسىنىڭ جارتىلاي فينالىندا 6:2، 6:2 ەسەبىمەن ەسە قايتاردى. بۇل ويىنداردىڭ ءبارى حارد توسەنىشىندە ءوتتى.