قونايەۆ قالاسىنىڭ تۇرعىندارى ماسانىڭ كوپتىگىنەن دالاعا شىعۋدان قالعان
«جۇقپالى اۋرۋ تاراۋى مۇمكىن». وسىلاي دەگەن قونايەۆ قالاسىنىڭ تۇرعىندارى ماسا شاعىپ، اللەرگياعا شالدىعىپ جاتقانىن ايتادى. ولار جاعىمسىز شىركەيلەردىڭ ءتۇرى جىل ساناپ ءوسىپ، كولەمى دە ۇلعايىپ بارادى دەپ الاڭدايدى. ونىڭ ۇستىنە شىركەيدىڭ شاققان جەرى وڭاي جازىلماي، تىرتىق بولىپ قالاتىن كورىنەدى، دەپ حابارلايدى Almaty-akshamy.kz Almaty.tv-گە سىلتەمە جاساپ.
ماسادان مازام قاشتى دەگەن مارجان جاقۇپوۆا ءقازىر دەنساۋلىعىنىڭ ءجيى سىر بەرىپ جۇرگەنىن ايتادى. شىرقىن العان شىركەي شاققان سايىن اللەرگياعا اينالىپ، دەنەسى ءبورتىپ كەتەتىن كورىنەدى. سونداي-اق تۇرعىندار ماسادان جۇقپالى اۋرۋ تاراي ما دەپ قورقادى.
– مەنىڭ كىشكەنتايىمدى تالاپ تاستاعان. جۇعاتىن سياقتى. ولار مالدىڭ دا قانىن سورادى عوي، – دەدى قالا تۇرعىنى گۇلناز وسپانوۆا.
جىلدان-جىلعا جاعدايدىڭ ناشارلاعانىن كورگەن ەل، سانيتارلىق تازالاۋ ماماندارى باقىلاۋدى كۇشەيتۋى ءتيىس دەپ سانايدى. ويتكەنى بيىلعى دەزينفەكسيالاۋ جۇمىسى تىم باياۋ جاسالىپتى.
– مەنىڭ ۇلىمنىڭ دا اللەرگياسى بار. باسىن قىپ-قىزىل شاعىپ تاستاعان. ءۇش جىل بولدى ماسا ۇلعايىپ كەلە جاتىر، – دەدى قالا تۇرعىنى مارجان اتەييەۆا.
اتالعان قالادا الپىس جاساندى سۋ قويماسى بار. سانيتارلىق باقىلاۋ ماماندارى ولاردى نازاردا ۇستايدى.
– قاپشاعاي سۋ قويماسىنىڭ جاعالاۋىندا ورنالاسقاندىقتان كوكتەم مەزگىلىنەن باستاپ، جاز ايىندا وسىنداي ماسەلە بار. قونايەۆ قالاسىنىڭ سانيتارلىق ستانسياسىنىڭ كومەگى ارقىلى جاعاجايلاردى ۋلاۋ جۇمىسىن جۇرگىزدى. ءقازىر ولار ەكىنشى ەتاپىن اياقتاعان. وسى قالانىڭ ءىشىن جانە كوشەلەرىن، كوپقاباتتى ۇيلەردىڭ جەرتولەسىن ۋلاۋ جۇمىستارى جۇرگىزىلىپ جاتىر، – دەدى تۇكش، جولاۋشىلار كولىگى، اۆتوموبيل جولدارى جانە تۇرعىن ءۇي ينسپەكسياسى ءبولىمى باسشىسىنىڭ ورىنباسارى اسحات جەكسەنبەكوۆ.
دارىلەۋ جۇمىستارىنا بىلتىر 10 ميلليون بولىنسە، بيىل 40 ميلليونعا دەيىن قاراجات جۇمسالماق. ەندى قالا عانا ەمەس، تۇرعىن ۇيلەردىڭ جەرتولەسىن دارىلەۋ ءىسى دە قامتىلادى. الايدا جەرگىلىكتى جۇرت، جاسالىپ جاتقان جۇمىستى بايقاماعانىن ايتادى.
– ءتورت جىل بولدى كوشىپ كەلگەلى، شىنىمدى ايتايىن، زالالسىزداندىرۋ جۇمىسىن بايقامادىم. ءۇستى-باسىمىز قىشىپ، جارا بولادى، – دەدى قالا تۇرعىنى تورعىن انياتوۆا.
– ءۇش مەردىگەر ۇيىم جۇمىس ىستەپ جاتىر. توعىز تەحنيكا ونىڭ ىشىندە تراكتور جانە 15-كە جۋىق ءتۇرلى تەحنيكا بار. وتىزعا جۋىق مامان جۇمىس ىستەۋدە، – دەدى تۇكش، جولاۋشىلار كولىگى، اۆتوموبيل جولدارى جانە تۇرعىن ءۇي ينسپەكسياسى ءبولىمى باسشىسىنىڭ ورىنباسارى اسحات جەكسەنبەكوۆ.
جەرگىلىكتى بيلىك ماسانىڭ كەنەت كوبەيۋىن تابيعي فاكتور دەپ باعا بەردى. ويتكەنى قالانىڭ ءوزى قاپشاعاي سۋ قويماسىنىڭ ماڭىندا ورنالاسقان. الايدا قولدان كەلگەن قىزمەتتى جاساپ جاتقانىنا سەندىردى.