مينيستر ءاسكەري قالاشىقتاردىڭ ينفراقۇرىلىمىن تەكسەردءى.
قورعانىس ۆەدومستۆوسىنىڭ باسشىسى، گەنەرال-پولكوۆنيك رۋسلان جاقسىلىقوۆ الماتىعا جۇمىس ساپارى اياسىندا جوعارى اسكەري وقۋ ورىندارىنداعى وقۋ پروسەسىن، اسكەري بولىمدەردەگى جاۋىنگەرلىك دايارلىقتىڭ بارىسىن، اسكەري تەحنيكانى ساقتاۋ مەن پايدالانۋدىڭ جاي-كۇيىن، سونداي-اق اسكەري قالاشىقتاردىڭ ينفراقۇرىلىمىن تەكسەردى، دەپ حابارلايدى Almaty-akshamy.kz.
مەملەكەت باسشىسىنىڭ «ادىلەتتى مەملەكەت. ءبىرتۇتاس ۇلت. بەرەكەلى قوعام» جولداۋىندا قويىلعان تاپسىرمالار اياسىندا قورعانىس مينيسترلىگىنە قاراستى وقۋ ورىندارىنا ەرەكشە كوڭىل ءبولىندى.
قۇرلىق اسكەرلەرىنىڭ اسكەري ينستيتۋتى مەن راديوەلەكترونيكا جانە بايلانىس اسكەري-ينجەنەرلىك ينستيتۋتىندا وقۋ ورىندارىنىڭ باستىقتارى قورعانىس مينيسترىنە وقۋ-تاربيە پروسەسىنىڭ بارىسى تۋرالى باياندادى. وقۋ پوليگوندارىنداعى بولاشاق وفيسەرلەردى پراكتيكالىق دايارلاۋعا ارنالعان وقۋ-ماتەريالدىق بازانىڭ جاعدايى دا نازاردان تىس قالمادى.
قورعانىس ءمينيسترىنىڭ بۇعان دەيىن بەرگەن نۇسقاۋلارىنا سايكەس جاڭارتىلىپ، جەتىلدىرىلگەن وقۋ كورپۋستارى، كافەدرالار، كازارمالىق ءۇي-جايلار، اسحانالار مەن سپورت كەشەندەرى كورسەتىلدى.
قۇرلىق اسكەرلەرى اسكەري ينستيتۋتىنىڭ وقۋ-جاتتىعۋ ورتالىعىندا قورعانىس ءمينيسترى ءبولىم كومانديرلەرىنىڭ جيىندارىن ۇيىمداستىرۋدى قاداعالاپ، ولاردىڭ جەدەل جانە تاكتيكالىق دايىندىق بويىنشا بىلىمدەرىن تەكسەرۋگە قاتىستى.
دەسانتتىق-شابۋىلداۋ اسكەرلەرىنىڭ بولىمدەرىندە گەنەرال-پولكوۆنيك رۋسلان جاقسىلىقوۆ جەكە قۇرامنىڭ جاۋىنگەرلىك وقۋ پروسەسىمەن، اتاپ ايتقاندا، ارنايى ترەناجەرلارمەن جابدىقتالعان اۋە-دەسانتتىق دايارلىق وقۋ كەشەنىندەگى ساباقتاردىڭ بارىسىمەن تانىستى.
اسكەري تەحنيكانى تەكسەرۋ بارىسىندا قورعانىس ۆەدومستۆوسىنىڭ باسشىسى ونى ۇقىپتى ۇستاۋعا، ساقتاۋ مەن قىزمەت كورسەتۋ ءۇشىن قاجەتتى جاعدايلار جاساۋعا باستى نازار اۋداردى.
«اسكەري تەحنيكا كەز كەلگەن ۋاقىتتا جاۋىنگەرلىك تاپسىرملاردى ورىنداۋعا دايىن بولۋى كەرەك. بۇل اسكەرلەردىڭ جاۋىنگەرلىك دايىندىعى مەن جاۋىنگەرلىك قابىلەتىنىڭ نەگىزگى قۇرامداس بولىگى»، – دەپ اتاپ ءوتتى كومانديرلەرمەن اڭگىمە بارىسىندا گەنەرال-پولكوۆنيك رۋسلان جاقسىلىقوۆ.
قورعانىس ءمينيسترىنىڭ الماتى گارنيزونىنداعى جۇمىسىنىڭ جەكە باعىتى قارۋلى كۇشتەر ارداگەرلەرىمەن كەزدەسۋ بولعانىن اتاپ وتكەن ءجون. قورعانىس ۆەدومستۆوسىنىڭ باسشىسى ارداگەرلەرگە اسكەري بولىمشەلەردىڭ جاۋىنگەرلىك ازىرلىگىنىڭ جاي-كۇيى، قارۋلى كۇشتەردى قارۋ-جاراق پەن اسكەري تەحنيكانىڭ زاماناۋي ۇلگىلەرىمەن جاراقتاندىرۋ، اسكەري ينفراقۇرىلىمدى جەتىلدىرۋ بويىنشا قابىلدانىپ جاتقان شارالار تۋرالى كەڭىنەن اڭگىمەلەپ بەردى.
سونىمەن بىرگە ولاردىڭ قۇرمەتتى دەمالىسقا شىققاننان كەيىنگى بەيىمدەلۋى، ارداگەرلەر ۇيىمدارىنىڭ الەۋەتىن اسكەري-پاتريوتتىق تاربيەگە تارتۋ ماسەلەلەرى دە قارالدى.
ءوز كەزەگىندە قارۋلى كۇشتەردىڭ ارداگەرلەرى رقب الماتى فيليالىنىڭ باسشىلارى ەلىمىزدىڭ اسكەري قاۋىپسىزدىگىنە تونەتىن زاماناۋي قاۋىپ-قاتەرلەر اياسىندا قازاقستان اسكەرىن ودان ءارى دامىتۋ تۋرالى ءوز ۇسىنىستارىن ورتاعا سالدى.