جاڭا ماۋسىمداعى جوبالار قانداي بولادى؟
«الماتى» تەلەارناسى رەبرەندينگ وتكىزىپ، جاڭا ماۋسىمدا وزىندىك ءونىم رەتىندە 26 باعدارلاما ۇسىنباق. ونىڭ ىشىندە ون ءبىرى – جاڭا جوبا، دەپ حابارلادى Almaty-akshamy.kz.
تەلەارنانىڭ باس ديرەكتورى تيمۋر بازاربايەۆتىڭ ايتۋىنشا، «الماتى» تەلەارناسى ەرەسەكتەر اۋديتورياسىن دا، الەۋمەتتىك جەلىلەر مەن ونلاين رەسۋرستاردى كەڭىنەن قولداناتىن جاس كورەرمەندەردى دە قامتي الاتىن «زاماناۋي كلاسسيكاعا» بارىنشا كوڭىل بولمەك.
«حابار تاراتۋدىڭ جاڭعىرعان تۇجىرىمداماسى جاستاردى كوبىرەك قامتۋدى كوزدەيدى. سوندىقتان ءبىزدىڭ باعدارلامالارىمىزدا وتباسىلىق قۇندىلىقتاردى نىعايتۋعا جانە وتباسى مۇشەلەرىنىڭ ىنتىماعىن ارتتىرۋعا باسا كوڭىل بولىنەدى. تەلەارنا باعدارلامالارىندا وتانعا دەگەن ماحاببات، جاقىنعا جاناشىرلىق، تاريحىمىزعا، مادەنيەت پەن ونەرىمىزگە قۇرمەتپەن قاراۋ سياقتى سياقتى قاسيەتتەر دارىپتەلىپ وتىرادى. وندىرىلەتىن باعدارلامالار مەن تەلەحيكايالاردىڭ 75 پايىزى قازاق تىلىندە بولادى. ءبىزدىڭ باستى مۇراتىمىز – كورەرمەنگە دەر كەزىندە ءارى شىنايى اقپارات بەرۋ. ءبىز حالىقتى الاڭداتاتىن وزەكتى ماسەلەلەردى كوتەرۋمەن قاتار، كوپتەگەن ساۋالدارعا كورەرمەندەرمەن بىرگە جاۋاپ ىزدەيمىز. ءبىزدىڭ باستى مىندەتىمىز – وسى»، – دەدى تيمۋر بازاربايەۆ.
Almaty TV جاڭا ماۋسىمدا ۇسىنىپ وتىرعان جوبالاردىڭ ىشىندە اينۇر ءىلياسوۆا، ءىنجۋ انۋاربەك، ايىم بەگماتتىڭ ايەل مەن بالا دەنساۋلىعى تۋرالى «انا مەن بالا» باعدارلاماسى، سەرىك اقىشيەۆتىڭ «IQ Almaty» اتتى مەكتەپ وقۋشىلارىنا ارنالعان ينتەللەكتۋالدىق ۆيكتوريناسى، دەمالىس كۇنگى تاڭعى شوۋ «سالەم، الماتى!»، «جۇلدىزدى تاكسي» اتتى مۋزىكالىق-ازىل باعدارلاماسى، سونداي-اق، «الماتىداعى اڭگىمە»، «تاڭعى ستۋديو»، «الماتينسكيە يستوريي»، «الماتى سو ۆكۋسوم»، «وبو ۆسەم بەز كۋپيۋر»، «شەشىمى بار»، «تەمىر تۇلپار» سياقتى جوبالار بار.
سونداي-اق جاڭا ماۋسىمدا ايتىس جانرىنا ارنالعان «ءبىرجان – سارا ىزىمەن» اتتى ەرەكشە فورماتتاعى باعدارلامانىڭ تۇساۋى كەسىلمەك.
بيىلعى كۇزدە «الماتى» تەلەارناسى وزىندىك ءونىم رەتىندە بىرنەشە تەلەحيكايا ۇسىنباق. ولاردىڭ ىشىندە مۇحتار اۋەزوۆتىڭ پوۆەسى جەلىسىمەن تۇسىرىلگەن «قيلى زامان» تەلەحيكاياسى، «جازمىش» مەلودرامالىق تەلەحيكاياسى، «اق پەن قارا»، «مەدەۋدەگى كەزدەسۋ»، «مەنىڭ باپكەرىم – 2» جانە «تايتالاس»، «مەنىڭ ءۇيىم» سيتكومى، سونىمەن قاتار، بايان الاگوزوۆا ۇسىنعان «تومپي» كومەدياسى بار.