قونايەۆتا «ۇكىلى دومبىرا» رەسپۋبليكالىق سايىسىنىڭ جەڭىمپازدارى انىقتالدى

جەڭىمپازدارعا قارجى سەرتيفيكاتتارى تابىستالدى

بۇگىن قونايەۆ قالاسىندا ەلىمىزدىڭ ەڭ ۇزدىك كۇيشىلەرى جينالدى. الماتى وبلىستىق ىشكى ساياسات باسقارماسى مەن «رۋحاني جاڭعىرۋ ورتالىعى»  كمم ۇيىمداستىرعان «ۇكىلى دومبىرا» رەسپۋبليكالىق بايقاۋعا ەلىمىزدىڭ تۇكپىر-تۇكپىرىنەن 14 ۆيرتۋوزدى دومبىراشى قاتىستى، دەپ حابارلايدى Almaty-akshamy.kz.

جالپى، بايقاۋ جاس دومبىراشىلاردىڭ شەبەرلىگىن جەتىلدىرۋ، جاستارعا پاتريوتتىق جانە رۋحاني تاربيە بەرۋ جانە ۇلتتىق مادەني قۇندىلىقتاردى ناسيحاتتاۋ ماقساتىندا ءوتتى. جارىس ەكى كەزەڭنەن تۇردى. I، II كەزەڭدە قاتىسۋشىلار ءتۇرلى شىعارمالاردى ورىنداپ، شىعارمالاردىڭ   تاريحىن ايتىپ بەردى.
قازاقستاننىڭ ەڭبەك سىڭىرگەن قايراتكەرى، «قۇرمەت»  وردەنىنىڭ كاۆالەرى، قازاق ۇلتتىق ونەر ۋنيۆەرسيتەتىنىڭ پروفەسسورى جانعالي ءجۇزباي، ق ر مادەنيەت قايراتكەرى، ق ر كومپوزيتورلار جانە كۇيشىلەر وداعىنىڭ مۇشەسى  تولەپبەرگەن توعجانوۆ، ق ر مادەنيەت قايراتكەرى ، كۇيشى مۇرات ءابۋعازى جانە ق ر مادەنيەت قايراتكەرى تالعات ورازايەۆ سىندى قازىلار القاسى بايقاۋعا قاتىسۋشىلاردىڭ ونەرىن  باعالادى. 14 ۇمىتكەردەن تەك 3ء-ى فينالعا ءوتتى.
قازىلار القاسىنىڭ شەشىمىمەن باس جۇلدەنى  جامبىل وبلىسىنان كەلگەن مەيىربەك ازىمبايەۆ الدى. ءبىرىنشى ورىندى تيمۋر ۇمبەتجان، ەكىنشى ورىندى تۇرعىنى مۇحيت مۇكەن يەلەندى. ال، ءۇشىنشى ورىندى لۋنارا ماۋەتبەك قانجىعاسىنا بايلاپ قايتتى. جەڭىمپازدارعا 100 مىڭ، 200 مىڭ، 300 مىڭ جانە 400 مىڭ تەڭگە كولەمىندە سەرتيفيكاتتار تابىستالدى.