قونايەۆ قالاسىنىڭ تۇرعىندارى جىلۋعا جارىماي وتىر

جىلۋ ورتالىعىنىڭ ديرەكتورى «ماسەلەنى مەكەمە ەمەس، تۇرعىنداردىڭ ءوزى شەشۋى كەرەك» دەگەن جاۋاپ ايتتى.

«جىلۋ بەرىلسە دە، ءۇيدىڭ ءىشى ازىناپ تۇرادى». وسىلاي دەگەن قونايەۆ قالاسىنىڭ تۇرعىندارى جىلۋعا جارىماي وتىر. ءۋاجىن ايتقان جۇرتتىڭ سوزىنە سەنسەك، ماسەلە بىرنەشە رەت كوتەرىلسە دە، شەشىمىن تاپپاعان، دەپ حابارلايدى Almaty-akshamy.kz Almaty.tv-گە سىلتەمە جاساپ.

ۆالەنتينا حودەنكو قونايەۆ قالاسىندا 20 جىلدان بەرى تۇرادى. ونىڭ ايتۋىنشا، پاتەردەگى اۋا تەمپەراتۋراسى 18 گرادۋستان اسپايدى.

«وبلىس ورتالىعى اتانىپ، ماسەلە شەشىلەدى دەپ ويلادىق. ءىس جۇزىندە ولاي بولمادى. اكىمدىككە تالاي باردىق. ولار قۇرعاق ۋادە بەرىپ، شىعارىپ سالادى. ەشتەڭە وزگەرمەدى»، – دەيدى قونايەۆ قالاسىنىڭ تۇرعىنى ۆالەنتينا حودەنكو.

بۇرسەڭ قاعىپ وتىرعان وزگە تۇرعىنداردىڭ ايتۋىنشا، جىلۋ جۇيەسىندەگى اقاۋ سالدارىنان پاتەر ازىناپ تۇرادى. ويتكەنى، ىستىق سۋ كەلىپ تۇرسا دا، ۇيدەگى باتارەيالار سۋىق. ال جىلۋ ورتالىعىنىڭ ديرەكتورى «ماسەلەنى مەكەمە ەمەس، تۇرعىنداردىڭ ءوزى شەشۋى كەرەك» دەگەن جاۋاپ ايتتى.

«بۇل – بەتوننان سالىنعان ۇيلەر. تەرەزەسىن اۋىستىرۋ كەرەك. ەسىكتى قاپتاۋ كەرەك. سونىڭ ءبارىن قامتاماسىز ەتەتىن ءۇيدىڭ يەسى. جىلۋ ورتالىعىنان سانيتارلىق نورماعا ساي جىلۋ بەرىلىپ وتىر. ءبىز 80-85 گرادۋسقا دەيىن جىلۋ بەرۋگە مۇمكىندىگىمىز بار. ءبىراق نورمادان اسىرساق، ولاردىڭ قۇبىرى جارىلىپ كەتەدى»، – دەدى قونايەۆ قالاسى جىلۋ ورتالىعىنىڭ ديرەكتورى سەيداحمەت دادامبەكوۆ.

ورتالىق ديرەكتورى «تۇرعىن ۇيلەردەگى قۇبىرلاردى دا تازالاۋ كەرەك» دەيدى. سوزىنە سەنسەك، بۇل جۇمىستاردى پاتەر يەلەرى كووپەراتيۆى باقىلاۋعا الۋى ءتيىس.