قورشاۋعا ءىلىنىپ قالعان قىز بالكوننان قۇلاپ تۇسكەن
ارقالىقتا بەسىنشى قاباتتىڭ بالكونىنان قۇلاعان قىزدى قۇتقارعان پوليسەيگە پاتەر كىلتى تابىستالدى، دەپ حابارلايدى Almaty-akshamy.kz Polisia.kz-كە سىلتەمە جاساپ.
پاترۋلدىك پوليسيا قىزمەتكەرى المات ءامىرحانعا ارقالىق قالاسىنىڭ اكىمى ءامىرحان اسانوۆ قىزمەتتىك تۇرعىن ءۇي كىلتىن تابىستادى.
بۇعان دەيىن پوليسيا قىزمەتكەرى تۋىستارىمەن بىرگە تۇرىپ كەلگەن. ەسكە سالايىق، وقيعا 7 قاڭتاردا بولعان. قورشاۋعا ءىلىنىپ قالعان قىز بالكوننان قۇلاپ تۇسكەن. بۇل تۋرالى قالالىق جبو-عا ءوتىپ بارا جاتقان ادامدار تاڭعى ساعات 5:30-دا حابارلاعان. وقيعا ورنىنا پاترۋلدىك پوليسيا قىزمەتكەرلەرى المات ءامىرحان مەن رۋسلان قاپساماتوۆ بارىپ، جاعدايدى باعالاپ، قىزدى قۇتقارۋ ءۇشىن بارلىق شارالاردى قابىلداعان.
«پوليسيا قىزمەتكەرلەرى وڭىردەگى قوعامدىق ءتارتىپتى قامتاماسىز ەتەدى جانە كۇندەلىكتى جۇمىستا قيىن جاعدايلارعا تاپ بولادى. كەيدە ادام ءومىرى ءتارتىپ ساقشىلارىنىڭ كاسىبي ارەكەتتەرىنە بايلانىستى بولادى. وسىنداي ەرلىك ارەكەتى ءۇشىن المات ءامىرحاندى قىزمەتتىك تۇرعىن ۇيمەن قامتاماسىز ەتۋ تۋرالى شەشىم قابىلداندى»، - دەپ اتاپ ءوتتى ارقالىق قالاسىنىڭ اكىمى.
ازىرگە پوليسيا قىزمەتكەرى ەم قابىلداپ جاتىر. قۇتقارۋ كەزىندە ول اياعىن جاراقاتتاپ العان ەدى.