سولاردىڭ ىشىندە دىنمۇحاممەد احمەت ۇلى مىنگەن «چايكا» اۆتوكولىگىنىڭ ورنى بولەك
بۇل جەردە وتكەن عاسىردا شىعارىلعان 50-دەن استام اۆتوموبيل، ونداعان موتوسيكل مەن جۇزدەگەن تۇرمىستىق بۇيىم جينالعان، دەپ حابارلايدى Almaty-akshamy.kz «حابار 24» تەلەارناسىنا سىلتەمە جاساپ.
ءار زات كەشەگى كۇننەن سىر شەرتەدى. شەبەر قۇراستىرۋشىلاردىڭ ارقاسىندا كونە اۆتوكولىكتەر جوندەلىپ، ارلەنىپ-سىرلاندى. سولاردىڭ ىشىندە دىنمۇحاممەد احمەت ۇلى مىنگەن «چايكا» اۆتوكولىگىنىڭ ورنى بولەك.
رەترواۆتو مۇراجايىندا نەگىزىنەن وتكەن عاسىردىڭ 40-80 جىلدارى كەڭەس وداعى مەن شەت ەلدەردە شىعىرىلعان كولىكتەر بار. سونىڭ ىشىندە موتوسيكلدەر، ۆەلوسيپەد پەن ارنايى تەحنيكانى دا كورەسىز. سونداي اق مۋزەيدە الەمدە سيرەك كەزدەسەتىن رەتروكولىكتەردى تاماشالاپ، تاريحىمەن تانىسۋعا بولادى.
ءقازىر اينەگى جىلتىراپ، شامدارى جارقىراپ تۇرعانكولىكتەر ءدال وسى قالپىندا بولماعان. ولار ەلىمىزدىڭ ءار ايماعىنان اكەلىنىپ، قايتا جاسالدى. ەسكى ماشينالارعا جاڭا بولشەكتەر سالىنىپ، سالونى بىلعارى مەن برەزەنتپەن قاپتالدى. ماسەلەن «گاز-20» ماركالى كولىگى گوركيي اتىنداعى زاۋىتتان 1946-1958 جىلدار ارالىعىندا شىعارىلدى. ءقازىر بۇل ناعىز راريرەت. ال، ديماش احمەت ۇلىنىڭ «چايكا گاز-14» تەمىر تۇلپارىنىڭ ۇزىندىعى 6 جارىم مەتردەن اسادى.
بۇل اۆتوكولىكتى ديماش احمەت ۇلى 1983-84 جىلدارى الماتىدا ءمىندى. كەيىن «چايكا» جەكە قولعا ءوتىپ، كوپ جىل قاراۋسىز قالدى. 8 جىل بۇرىن مۇراتبەك امانتاي ۇلى كولىكتى ساتىپ الىپ قالپىنا كەلتىردى. جاڭادان سىرلاپ، قوسالقى بولشەكتەرىن سالىپ، جاڭالادى.
«چايكا» جولعا ءجيى شىعا بەرمەيدى. ونى تەك مەرەكە كۇندەرى عانا جۇرگىزەدى. جالپى سالونداعى بارلىق كولىك جۇرىسكە جارامدى. وتكەن سايلاۋ كۇنى قالا كوشەلەرىمەن ونشاقتى رەتروكولىك ءجۇرىپ ءوتتى. ءارقايسىنىڭ باعاسى قىمبات. ءبىراق، ساتىلمايدى. ال «چايكا» 8 جىلدا قالپىنا كەلتىرىلىپتى.
«العاشقى ساپارىمىزدى دىنمۇحاممەد احمەت ۇلىنىڭ تۋعان جەرى باقاناس اۋىلىنا جاسادىق. بارىس-كەلىس قاشىقتىعى300 شاقىرىم بولدى. كولىكتى قالپىنا كەلتىرۋگە ۇزاق ۋاقىت كەتتى»،- دەدى رەترو-سالون ديرەكتورى مۇراتبەك سىرگەبايەۆ.
سالون ديرەكتورى مۇراتبەك امانتاي ۇلى بۇل ىسكە جان-تانىمەن بەرىلگەن ادام. ءار كولىكتىڭ شىعۋ تاريحى، جوندەۋ جۇمىستارى تۋرالى جالىقپاي اڭگىمە ايتۋعا بار. الداعى ۋاقىتتا سالوندى كەڭەيتىپ، رەترو كولىكتەرمەن تولىقتىرماق. بۇعان قوسا مۋراجايدا كەڭەس وداعى كەزىندە حالىق قولدانعان تۇرمىستىق زاتتار، مۋزىكالىق اسپاپتار مەن سان-الۋان بۇيىمدار قويىلعان.