قازاقستاندا العاش رەت 2023 جىلدىڭ 22-23 شىلدەسىندە قونايەۆ قالاسىندا «مىڭ بوياۋلى اسپان» اۋە شارلارى فەستيۆالى وتۋدە.
الماتى وبلىسىنىڭ تۋريزم يندۋسترياسى - ورنالاستىرۋ، كىرۋ جانە ىشكى تۋريزم بويىنشا رەسپۋبليكادا الدىڭعى قاتاردا.
ەلىمىزدە العاش رەت الەمنىڭ تۇكپىر-تۇكپىرىنەن 30 شار اسپانعا كوتەرىلىپ، بارلىعىن جارقىن اسەرلەرىمەن قۋانتتى، دەپ حابارلايدى Almaty-akshamy.kz.
حالىقارالىق شارلار فەستيۆالىن ۇيىمداستىرۋشىلاردىڭ باستى ماقساتى – قالدىقتاردى بولەك جيناۋ، قايتا وڭدەۋ، ەكولوگيالىق تازا قايتا وڭدەۋگە بولاتىن ىدىس-اياقتار مەن باسقا دا ەكوماتەريالداردى پايدالانۋ ارقىلى تابيعاتقا جانە ونىڭ رەسۋرستارىنا قۇرمەتپەن قاراۋدى ناسيحاتتاۋ.
فەستيۆالدە الماتى وبلىسىنىڭ اكىمى مارات سۇلتانعازييەۆ قۇتتىقتاۋ ءسوز سويلەدى.
– «وبلىستا ءتۋريزمدى ىلگەرىلەتۋ جانە دامىتۋ وقيعالى (سوبىتيينىي) تۋريزمىنە نەگىزدەلگەن. وسىعان وراي، بۇگىنگى «Konayev international balloon fest» شار فەستيۆالىنىڭ ءىس-شاراسى ءبىزدىڭ وڭىرىمىزدەگى ايتۋلى وقيعا بولماق، بۇل ءبىزدىڭ قوناقتارىمىز ءۇشىن تابيعاتتىڭ سۇلۋلىعىن تاماشالاۋعا تاماشا مۇمكىندىك بولىپ تابىلادى جانە ءسىز مۇندا بىر-بىرىڭىزبەن تانىسۋعا، دوستىق قارىم-قاتىناس ورناتۋعا جانە ۇمىتىلماس اسەر الۋعا ۋاقىت تاباسىز. بۇگىن تاڭعى ساعات 5-تەن باستاپ فەستيۆالگە جينالعان كورەرمەندەر وسىنداي سۇلۋلىقتى تاماشالاۋعا شابىتتاندى، ءتىپتى ساعات 7-گە تامان شارلارمەن بيىكتىككە شىعۋعا نيەت بىلدىرگەندەردىڭ ۇلكەن كەزەگى پايدا بولدى. ياعني، وسى ارقىلى ءبىز وقيعالى ءتۋريزمنىڭ جۇمىس ىستەي باستاعانىن كورسەتەمىز.
ءبىز بۇل شاراعا 6 اي بويى دايىندالدىق، تالداي كەلە، قازاقستاندا شارلارعا ارنالعان ءىس-شارالار بولماعانىن كوردىك. الەۋمەتتىك جەلى قولدانۋشىلارى تۇسىنىكتەمەلەردە قونايەۆ تۇرعاندا كاپپادوكياعا بارۋدىڭ قاجەتى جوق دەپ جازىپ جاتىر»- دەدى ءوز سوزىندە ايماق باسشىسى.
سونداي-اق، ءوڭىردىڭ تۋريستىك الەۋەتىن وڭىردە كەڭىنەن ناسيحاتتاۋ ماقساتىندا «تەنگري ۋلترا» حالىقارالىق ۇلى دالا مارافونى، حالىقارالىق ىلە-بالقاش رەگاتاسى وتكىزىلدى، «BBC News» حالىقارالىق تەلەارناسىندا (450 ميلليون اۋديتوريا) ءوڭىردىڭ اسەم دە باي تابيعاتى تۋرالى جارنامالىق ناۋقان باستالعانىن اتاپ وتەمىز.
