الماتىداعى ءال-فارابي داڭعىلىنىڭ وڭتۇستىك قاپتالىنداعى جول جوندەۋ جۇمىستارى اياقتالدى: داڭعىلدىڭ سولتۇستىك جاعى جوندەلىپ جاتىر، دەپ حابارلايدى Almaty-akshamy.kz
الماتىدا ءال-فارابي داڭعىلىنداعى جول جوندەۋ جۇمىستارى كەستەگە سايكەس جۇرگىزىلىپ كەلەدى جانە جاڭا وقۋ جىلىنا دەيىن اياقتالادى. قازىرگى ۋاقىتتا تورايعىروۆ كوشەسىنەن دوستىق داڭعىلىنا دەيىنگى جولدىڭ وڭتۇستىك جاعىندا جوندەۋ جۇمىستارى اياقتالدى – قوزعالىس اشىق. نازاربايەۆ جانە دوستىق داڭعىلدارىنا بۇرىلىستار دا جوندەلدى.
كەلەسى كەزەڭ - ءال-فارابي داڭعىلىنىڭ سولتۇستىك قاپتالىنداعى كولىك جولاعىن جوندەۋ.
22 شىلدە ساعات 23:00-دەن 24 شىلدە ساعات 07:00-گە دەيىن ءال-فارابي داڭعىلىنىڭ جاربۇلاق وزەنىنەن سەيفۋللين داڭعىلىنا دەيىنگى اۋماقتا پوليمەرلى اسفالتبەتون جابىنىن توسەۋگە بايلانىستى باتىس باعىتتا كولىك قوزعالىسى تولىق شەكتەلەدى.
جول قوزعالىسى قاۋىپسىزدىگىن قامتاماسىز ەتۋ ءۇشىن جاربۇلاق وزەنىنەن ماركوۆ كوشەسى ارالىعىندا ريەۆەرسيۆتى قوزعالىس بولادى.
قوزعالىس قاۋىپسىزدىگىن پاترۋلدىك پوليسيانىڭ قىزمەتكەرلەرى قامتاماسىز ەتەدى. جول جوندەۋ جۇمىستارى جايلى سوڭعى جاڭالىقتار قالا اكىمدىگى مەن قالالىق موبيلدىلىك باسقارماسىنىڭ رەسمي پاراقشالارىندا، سونىمەن قاتار، 2گيس قوسىمشاسىندا قولجەتىمدى.
ەستەرىڭىزگە سالا كەتەيىك، الماتىداعى ماگيسترالدىق كوشەلەرگە جول توسەمىن توسەۋدە العاش رەت جاڭا تەحنولوگيالاردى قولدانىلدى. اسفالتبەتونداردىڭ قۇرامىندا پوليمەرلەر قولدانىلادى. مۇنداي قوسپالار توزۋعا ءتوزىمدى، جۇمسارۋ تەمپەراتۋراسى جوعارى (65-70°C)، ىستىققا توتەپ بەرىپ، الدەقايدا ۇزاعىراق قىزمەت ەتەدى. قازىرگى 5 جىلدىڭ ورنىنا 8-10 جىل پايدالانۋعا بولادى.
جول جوندەۋ جۇمىستارى 2023 جىلعا جوسپارلانعان جۇمىستار اياسىندا جۇرگىزىلىپ وتىر. ۋاقىتشا قولايسىزدىقتار ءۇشىن كەشىرىم وتىنەمىز. بۇل قالا جولدارى ۇزاعىراق پايدالانۋعا قاجەتتى شارا. مارشرۋتتى الدىن الا جوسپارلاپ الىڭىزدار.