دەپۋتات قولدى بولعان بالاباقشا عيماراتتارىن تۇگەندەۋدى ۇسىندى
ءماجىلىس دەپۋتاتى ەرلان سايروۆ «Amanat» اتىنان سايلانعان ءماسليحات دەپۋتاتتارىنىڭ رەسپۋبليكالىق فورۋمىندا كەزىندە قولدى بولعان بالاباقشا عيماراتتارىن تۇگەندەۋدى ۇسىندى، دەپ حابارلايدى قازاقپارات ءتىلشىسى.
«ماجىلىستەگى «Amanat» فراكسياسىنىڭ دەپۋتاتتارى «زاڭسىز يەلەنگەن كاپيتالدى قايتارۋ» جونىندە زاڭدى قابىلداعانىن بىلەسىزدەر. بۇل ءبىزدىڭ اتا-بابا، اكە-شەشەمىزدىڭ بارشا ۇرپاعىنا قالدىرعان يگىلىكتەرىن الداپ-ارباپ، ءارتۇرلى قۇيتىرقى ارەكەتتەرمەن حالقىمىزدىڭ اۋزىنان جىرىپ العان بايلىقتى مەملەكەتكە قايتارۋدىڭ ناقتى قادامى. ات توبەلىندەي توپ «وزىمشىلدىكتەن وزەگى ورتەنىپ»، شەت ەلگە ميللياردتاعان دوللاردى شىعارىپ اكەتكەن.اشىعىن ايتقاندا، ءوز ۇلتىنىڭ، ءوز حالقىنىڭ قازىنا–بايلىعىن اياۋسىز ۇرلاعان! ال ەندى، كەيىنگى وتىز جىل ىشىندە تەك قانا ءىرى زاۋىت، فابريكا، ونەركاسىپ نىساندارى عانا قولدى بولدى ما؟ ارينە، جوق»، - دەدى ەرلان سايروۆ.
ونىڭ سوزىنشە، ايماقتىق دەڭگەيدە بالاباقشا، مادەنيەت وشاقتارى، جەرگىلىكتى ەلەكتر جەلى ماگيسترالدارى دا قولدى بولىپ كەتكەن.
«جەرگىلىكتى جەردە ادامدار سول ناقتى بالاباقشا مەن مادەنيەت وشاعىنىڭ، مەكتەپ وقۋشىلارىنىڭ جازعى دەمالىس ورىندارىن ەل يگىلىگىنە جۇمىس ىستەگەنىن كورگىسى كەلەدى. وسى ماسەلە بويىنشا ءبىزدىڭ پارتيا مۇشەلەرى بارلىق دەڭگەيدە جۇمىس ىستەگەنى ءجون ءتارىزدى. ەلىمىز بويىنشا قانشا بالاباقشانىڭ قولدى بولعانى جونىندە ريەۆيزيا جاساپ، ولاردى مەملەكەتكە قايتارۋدىڭ جولىن قاراستىرعان ءجون.قولدى بولعان وقۋشىلاردىڭ جازعى دەمالىس ورىندارىن دا مەملەكەتكە قايتارۋ قاجەت. ءبىز قولدى بولعان قاراجاتتى ەلگە قايتارۋ جۇمىسىن اياعىنا دەيىن جەتكىزۋىمىز كەرەك»، - دەدى دەپۋتات.