استانا پوليسياسى بالالار ارباسىن قولدى قىلعان ازاماتتى انىقتادى
پوليسياعا قالا تۇرعىنى حابارلاسىپ، بەلگىسىز بىرەۋ ونىڭ 200 مىڭ تەڭگە تۇراتىن بالالار ارباسىن ۇرلاپ كەتكەنى جونىندە ارىزدانعان.
جابىرلەنۋشىنىڭ ايتۋىنشا، ول اربانى شامالى ۋاقىتقا قالدىرىپ، قايتا ورالعاندا ورنىندا جوق ەكەنىن كورگەن. استانا قالاسى پد ىزدەۋ ءبولىمىنىڭ قىزمەتكەرلەرى جەدەل-ىزدەستىرۋ ءىس-شارالارىن جۇرگىزۋ بارىسىندا ۇرلىق جاسادى دەگەن كۇدىكپەن 41 جاستاعى قالا تۇرعىنىن ۇستادى.
تەرگەۋ بارىسىندا ەر ادامنىڭ قابانباي باتىر داڭعىلىمەن كەلە جاتىپ، جول بويىندا قاراۋسىز تۇرعان بالالار ارباسىن بايقاعانى بەلگىلى بولدى. قىلمىستىق ويمەن كۇدىكتى ارەكەتتەرىن باقىلاپ تۇرعان كۋاگەرلەردىڭ جوقتىعىنا كوز جەتكىزگەن سوڭ، اربانى كولىگىنە تيەپ الىپ كەتكەن.
اتالعان فاكتى بويىنشا سوتقا دەيىنگى تەرگەۋ امالدارى جۇرگىزىلىپ جاتىر. ەر ادامنىڭ ەلوردا اۋماعىندا جاسالعان وسىعان ۇقساس باسقا دا قىلمىسقا قاتىسى بار-جوعى تەكسەرىلىپ جاتىر. استانا قالاسىنىڭ پوليسيا دەپارتامەنتى ازاماتتارعا قىراعى بولۋعا، باعالى زاتتاردى قاراۋسىز قالدىرماۋعا كەڭەس بەرەدى.