شاحمات ءتۋرنيرى حالىق قاھارمانىنا ارنالدى

راديوەلەكترونيكا جانە بايلانىس اسكەري-ينجەنەرلىك ينستيتۋتىندا اسكەري قىزمەتشىلەردىڭ بالالارى اراسىندا شاحماتتان تۋرنير ءوتتى.

ۇيىمداستىرۋشىلار جارىستى تاۋەلسىز قازاقستاننىڭ تۇڭعىش قورعانىس ءمينيسترى ارميا گەنەرالى ساعادات نۇرماعامبەتوۆتىڭ مەرەيتويىنا ورايلاستىردى. وعان 8-12 جاس ارالىعىنداعى 15 شاحماتشى قاتىستى، دەپ حابارلايدى اlmaty-akshamy.kz. 

جاس سپورتشىلاردى ينستيتۋت باستىعىنىڭ تاربيە جانە يدەولوگيالىق جۇمىستار جونىندەگى ورىنباسارى پودپولكوۆنيك مەدعات مادراحيموۆ قۇتتىقتادى. ول اسكەري قىزمەتشىلەردىڭ وتباسى مۇشەلەرىمەن جۇمىس جونىندەگى قىزمەتتىڭ ارقاسىندا اسكەري ينستيتۋتتا شاحمات ءتۋرنيرىن وتكىزۋ جاقسى داستۇرگە اينالعانىن اتاپ ءوتتى. سونداي-اق، كەلەسى جىلى ينتەللەكتۋالدى سايىستىڭ اۋقىمى كەڭەيەتىنىنە سەنىم ءبىلدىردى. تۋرنير "بليس" فورماتىندا ءوتتى. سوعان سايكەس، ءار ويىنشىعا شەكتەۋلى ۋاقىت بەرىلدى. شاحماتتىڭ بۇل ءتۇرى سپورتشىدان جىلدام ارەكەت ەتۋ مەن جاقسى دايىندىقتى تالاپ ەتەدى. شاحمات ءتۋرنيرىنىڭ قورىتىندىسى بويىنشا ءبىرىنشى ورىندى 8 جاستاعى مارات راحىمجان جەڭىپ الدى. ەكىنشى ورىنعا الەن ارداق ۇلى، ءۇشىنشى ورىنعا جاسۇلان ەرجان تابان تىرەدى.

- ويىن قىزىقتى، ال قارسىلاستار مىقتى بولدى. ءبىراق مەن جەڭىسكە جەتۋدى ماقسات ەتتىم. ۇيىمداستىرۋشىلارعا تۋرنيرگە قاتىسۋعا مۇمكىندىك بەرگەنى ءۇشىن العىس ايتامىن، – دەدى تۋرنير جەڭىمپازى مارات راحىمجان.

جارىستىڭ جەڭىمپازدارى مەن جۇلدەگەرلەرى گراموتالارمەن جانە باعالى سىيلىقتارمەن ماراپاتتالدى.