اقجولتاي اقپارات! قازاقستان سۋ سپورتىنان العاشقى التىنىن الدى

قاتار استاناسى دوحادا ءوتىپ جاتقان سۋ سپورتى تۇرلەرىنەن الەم چەمپيوناتىندا قازاقستان سپورتشىلارى تاريحتا العاش رەت التىننان القا تاقتى.

ەدۋارد كيم مەن نارگيزا بولاتوۆا جۇبى تەحنيكالىق باعدارلامادا چەمپيون اتاندى. ۇلتتىق قۇرامانىڭ قوس سپورتشىسى فينالدا 228،0050 ۇپاي جينادى. تورەشىلەر باعدارلاما قيىندىعى جاعىنان ولاردىڭ ونەرىن جوعارى باعالادى (31.5000 بالل).

بۇل قازاقستان اتلەتتەرىنىڭ سۋ سپورتى تۇرلەرىنەن الەم چەمپيوناتىندا قول جەتكىزگەن العاشقى التىن مەدالى. ءبىرىنشى جۇلدەنى بىلتىر جاپونيادا وتكەن الەم چەمپيوناتىندا تەحنيكالىق باعدارلامادا ەدۋارد كيم (قولا مەدال) جەڭىپ العان.

كۇمىس مەدال جۇڭگو قۇراماسىنا (ۆەنتاو چەن مەن حاويۋي شي)، قولا جۇلدە مەكسيكا كومانداسىنا (ميراندا حيمەنەس پەن ديەگو كارريلو) بۇيىردى.

ەدۋارد پەن نارگيزا الداعى كۇندەرى قازاقستان قورجىنىن تاعى ءبىر جۇلدەمەن تولىقتىرا الادى. ول ءۇشىن ەركىن باعدارلامادا وسى قارقىنىنان تايماۋى كەرەك.

ءقازىر قازاقستان جالپى ەسەپتە 1 التىنمەن 5-ورىنعا كوتەرىلدى. كوش باسىندا جۇڭگو تۇر. ءقازىر قاتاردا 17 مەملەكەت جۇلدەگە يە بولدى.

الەم چەمپيوناتىنداعى بۇعان دەيىنگى ەڭ ۇزدىك كورسەتكىشتەرىمىز:

2023 جىل. ارتىستىك ءجۇزۋ. تەحنيكالىق باعدارلاما. ەدۋارد كيم

2015 جىل. 100 مەترگە براسس ادىسىمەن ءجۇزۋ. 4-ورىن (77 قاتىسۋشى). دميتريي بالاندين

200 مەترگە براسس ادىسىمەن ءجۇزۋ. 6-ورىن (52 قاتىسۋشى). دميتريي بالاندين

2019 جىل. 100 مەترگە براسس ادىسىمەن ءجۇزۋ. 7-ورىن (87 قاتىسۋشى). دميتريي بالاندين

2019 جىل. 200 مەترگە براسس ادىسىمەن ءجۇزۋ. 7-ورىن (52 قاتىسۋشى). دميتريي بالاندين

2017 جىل. 25 شاقىرىمعا ءجۇزۋ. 7-ورىن (25 قاتىسۋشى). ۆيتاليي حۋدياكوۆ.