بۇل تۋرالى تۇركىستاندا ءوتىپ جاتقان ۇلتتىق قۇرىلتايدىڭ «ادىلەتتى قازاقستان – ادال ازامات» اتتى ەكىنشى وتىرىسىندا پرەزيدەنت قاسىم-جومارت توقايەۆ ايتتى، دەپ حابارلايدى Almaty-akshamy.kz.
«ءبىز مادەني مۇرامىزدى جان-جاقتى دارىپتەۋىمىز قاجەت. ەلىمىزدى جاڭعىرتۋ ءۇشىن «جۇمساق كۇشتىڭ» مۇمكىندىكتەرىن ءتيىمدى پايدالانعان ءجون. سىرتقى ىستەر مينيسترلىگى جانىنداعى «كazAID» حالىقارالىق دامۋ اگەنتتىگى وسى جۇمىسقا ۇيىتقى بولۋعا ءتيىس. كوپتەگەن مەملەكەتتە مۇنداي ۇيىمدار ۇلتتىق برەندتى، تاريحتى جانە مادەنيەتتى ناسيحاتتايدى. سول ارقىلى مەملەكەتتىڭ جاعىمدى ءيميدجىن قالىپتاستىرۋعا ىقپال ەتەدى. سىرتقى ساياسي باستامالاردى جۇزەگە اسىرۋعا قولايلى جاعداي جاسايدى. كاسىپكەرلەردىڭ الەمدەگى بەدەلىن ارتتىرۋعا كومەكتەسەدى. جاڭا عانا ءماجىلىس دەپۋتاتى جۇلدىز سۇلەيمەنوۆا ۇلتتىق قۇندىلىقتاردى دارىپتەيتىن كاسىپكەرلەردى قولداۋ قاجەتتىگىن اتاپ ءوتتى. بۇل دا – وتە ورىندى باستاما»، - دەدى قاسىم-جومارت توقايەۆ.
مەملەكەت باسشىسى شىن مانىندە قازاقتىڭ مادەنيەتى سان ءتۇرلى سالانى قامتيتىندىعىن باسا ايتتى.
«حالقىمىزدىڭ اتا-بابادان ميراس بولعان مول مۇراسى بار. ونى زامان تالابىنا ساي جاڭعىرتىپ، جەر جۇزىنە ناسيحاتتاۋ كەرەك. مىسالى، ءوزىمىز ىرگەسىندە وتىرعان قوجا احمەت ياساۋي كەسەنەسى باي تاريحىمىزدىڭ سيمۆولى سانالادى. ونىڭ ۇلت رۋحانياتىنداعى ورنى ەرەكشە ەكەنىن بىلەسىزدەر. وسى كەسەنەگە ۇلتتىق مادەني-تاريحي ەسكەرتكىش مارتەبەسىن بەرۋ تۋرالى ۇسىنىس ەنگىزىلگەن. مەن مۇنى قولدايمىن»، - دەدى پرەزيدەنت.