بىلىكتىلىك نورماتيۆتەرىنە قاراي جەڭىمپازدارعا «قازاقستان رەسپۋبليكاسىنىڭ سپورت شەبەرى» اتاعى بەرىلەدى.
استاناداعى جاقسىلىق ۇشكەمپىروۆ اتىنداعى جەكپە-جەك سارايىندا ءوتىپ جاتقان رەسپۋبليكالىق دوداعا قارۋلى كۇشتەردىڭ جانە كۇشتىك قۇرىلىمداردىڭ سپورتشىلارى قاتىسىپ جاتىر، دەپ حابارلايدى Almaty-akshamy.kz.
ءتۋرنيردىڭ اشىلۋ سالتاناتىنا پارلامەنت دەپۋتاتتارى، مينيسترلىكتەر مەن وزگە دە قۇزىرلى مەكەمەلەر وكىلدەرى، قارۋلى كۇشتەردىڭ ارداگەرلەرى قاتىستى.
– مەملەكەت باسشىسى تۇرعىنداردىڭ بارلىق جاس ساناتىندا بۇقارالىق سپورتتى دامىتۋعا، ۇلت دەنساۋلىعىن نىعايتۋ ماسەلەسىنە ەرەكشە نازار اۋدارىپ كەلەدى. بۇل تۇرعىدا قويان-قولتىق ۇرىستىڭ بارلىق كۇشتىك قۇرىلىمداردا دامىپ جاتقانىن ايتا كەتكەن ءجون. ول اسكەري قىزمەتشىلەردى شىمىر ەتىپ قانا قويماي، توزىمدىلىككە، مىقتىلىققا ۇيرەتەدى. بارلىق قاتىسۋشىلارعا ساتتىلىك، تارتىستى باسەكە، مىقتى كوماندالىق رۋح تىلەيمىن. شىن مىقتىلار جەڭىسكە جەتسىن!، – دەدى ءتۋرنيردىڭ اشىلۋ سالتاناتىندا قورعانىس ءمينيسترى، گەنەرال-پولكوۆنيك رۋسلان جاقسىلىقوۆ.
جارىستى قورعانىس مينيسترلىگىنىڭ ورتالىق سپورت كلۋبى، مادەنيەت جانە سپورت مينيسترلىگىنىڭ سپورت جانە دەنە شىنىقتىرۋ ىستەرى كوميتەتى جانە بۇكىلقازاقستاندىق قويان-قولتىق ۇرىس قاۋىمداستىعى قولداۋىمەن ۇيىمداستىرىپ وتىر.
قورعانىس ءمينيسترىنىڭ كۋبوگىندا ەلىمىزدىڭ بارلىق كۇشتىك قۇرىلىمدارىنىڭ 15 كومانداسى، 160-تان استام سپورتشىسى قاتىسىپ، باعىن سىنايدى. ەرلەر سەگىز، ايەلدەر ءۇش سالماق دارەجەسىندە ونەر كورسەتەدى.
ءتۋرنيردىڭ جەڭىمپازدارى مەن جۇلدەگەرلەرى جەكە جانە كوماندالىق ەسەپتە ايقىندالادى. سونداي-اق «ۇزدىك تەحنيكاسى ءۇشىن» جانە «جەڭىسكە دەگەن جىگەرى ءۇشىن» جەكەلەي اتالىمدارى بويىنشا دا ارنايى ماراپاتتار كوزدەلگەن.
بىلىكتىلىك نورماتيۆتەرىنە قاراي جەڭىمپازدارعا «قازاقستان رەسپۋبليكاسىنىڭ سپورت شەبەرى» اتاعى بەرىلەدى.
قازاقستاننىڭ قارۋلى كۇشتەرىندە قويان-قولتىق ۇرىس اسكەري قىزمەتشىلەردىڭ دەنە شىنىقتىرۋ دايارلىعى باعدارلاماسىنىڭ ماڭىزدى بولىگى ەكەنىن ايتا كەتۋ كەرەك. ونى اسكەرلەردە جانە وسكەلەڭ ۇرپاق اراسىندا كەڭىنەن ناسيحاتتاۋعا قورعانىس ۆەدومستۆوسىنىڭ باسشىلىعى تاراپىنان دا ءجىتى نازار اۋدارىلىپ وتىر.