بالانى باقشادان شىعارۋعا ەش نەگىز جوق
التى جاسقا تولعان بالانى بالاباقشادان شىعارۋ تۋرالى زاڭدا ەشقانداي نورما جوق. بۇل تۋرالى وقۋ-اعارتۋ مينيسترلىگىنىڭ جەدەل كەڭەسىندە ايتىلدى، دەپ حابارلايدى Almaty-akshamy.kz Zakon.kz-كە سىلتەمە جاساپ.
مينيستر اسحات ايماعامبەتوۆ وتكەن اپتادا بالاباقشالارعا قاتىستى ماسەلە كوتەرىلگەنىن ايتتى. وندا التى جاسقا تولعان بۇلدىرشىندەر توپتى رەسمي بىتىرۋىنە دەيىن بالاباقشادان شىعارىلادى دەگەن اقپارات ايتىلىپ جاتىر.
وقۋ-اعارتۋ مينيسترلىگى مەكتەپكە دەيىنگى ءبىلىم دەپارتامەنتىنىڭ ديرەكتورى ناتاليا جۇمادىلدايەۆانىڭ ايتۋىنشا، التى جاسقا تولعان بالانى بالاباقشادان شىعارۋعا زاڭدى نەگىز جوق.
"قازاقستان رەسپۋبليكاسىنداعى ءبىلىم تۋرالى" زاڭنىڭ 30-بابىندا مەكتەپكە دەيىنگى تاربيە مەن وقىتۋ مەكتەپ تابالدىرىعىن اتتاعانعا دەيىن بولادى دەپ كورسەتىلگەن. بۇل نورما ءۇش بۇيرىقتا جانە مەملەكەتتىك ءبىلىم بەرۋ ستاندارتىندا بار. بارلىق نورما تۇزەتىلگەن. زاڭدا "مەكتەپكە دەيىنگى تاربيە مەن وقىتۋ مەكتەپ تابالدىرىعىن اتتاعانعا دەيىن جۇزەگە اسىرىلادى" دەلىنگەندىكتەن، التى جاستان كەيىن بالانى باقشادان شىعارۋعا ەش نەگىز جوق"، - دەيدى ناتاليا جۇمادىلدايەۆا.
ول بۇرىن جەلىدە پايدا بولعان وسىنداي فاكتىلەر تۋرالى اقپارات شىندىققا جاناسپايتىنىن ايتتى. وسى ورايدا وقۋ-اعارتۋ ءمينيسترى بۇل ماسەلە بويىنشا جان-جاقتى تۇسىنىكتەمە بەرۋگە كەڭەس بەردى.
"ەگەر مۇنداي فاكتىلەر بولسا، وقۋ-اعارتۋ مينيسترلىگىنە حابارلاسىڭىز. ءبىراق شارتتى تۇردە ەگەر بالا قاڭتاردا التى جاسقا تولسا، وقۋدان شىعارۋعا بولمايدى دەگەن نورما انىق بەكىتىلگەن. بۇل دەگەنىمىز تامىز ايىنا دەيىن مىندەتتى، ياعني ءتيىستى باعدارلامانى مەڭگەرگەنگە دەيىن بالا بالاباقشادا بولادى دەگەن ءسوز. وسىنداي فاكتىلەر بويىنشا راستالماعان اقپارات تاراعان كەزدە دەرەۋ اقپارات بەرۋ قاجەت. ال كەيبىر ۇيىم قابىلدانعان نورمالارعا قايشى كەلەتىن شەشىم قابىلداسا، وندا قاتاڭ شارالار قابىلدانۋى كەرەك"، - دەدى اسحات ايماعامبەتوۆ.
1 قاراشادا قازاقستان بالاباقشالارعا ءبىرىڭعاي كەزەك ەنگىزۋدى كوزدەپ وتىرعانى حابارلانعان ەدى.