بۇيرىق 2022 جىلدىڭ 5 ناۋرىزىنان باستاپ قولدانىسقا ەنگىزىلەدى.
دەنساۋلىق ساقتاۋ ءمينيسترىنىڭ 2022 جىلعى 17 اقپانداعى بۇيرىعىمەن قوعامدىق تاماقتانۋ وبەكتىلەرىنە قويىلاتىن سانيتارلىق-ەپيدەميولوگيالىق تالاپتار بەكىتىلدى، دەپ حابارلايدى Almaty-akshamy.kz
سانيتارلىق ەرەجەلەر كەلەسى تالاپتاردى قامتيدى:
- جاڭا وبەكتىلەردى سالۋ، رەكونسترۋكسيالاۋ، قايتا جابدىقتاۋ، قايتا جوسپارلاۋ جانە قولدانىستاعى وبەكتىلەردى كەڭەيتۋ، قوعامدىق تاماقتاندىرۋ وبەكتىلەرىن جوندەۋ، پايدالانۋعا بەرۋ جانە قايتا بەيىندەۋ ءۇشىن جەر ۋچاسكەسىن تاڭداۋ؛
- سۋمەن جابدىقتاۋ، سۋ بۇرۋ، جىلۋمەن جابدىقتاۋ، جارىقتاندىرۋ، جەلدەتۋ جانە اۋا باپتاۋ؛
- قوعامدىق تاماقتاندىرۋ وبەكتىلەرىنىڭ ءۇي-جايلارىن، عيماراتتارىن، قۇرىلىستارى مەن جابدىقتارىن كۇتىپ-ۇستاۋ جانە پايدالانۋ (ونىڭ ىشىندە ۇيىمداسقان ۇجىمدارعا قىزمەت كورسەتەتىن جانە دايىندايتىن قوعامدىق تاماقتاندىرۋ وبەكتىلەرى)؛
- تاماق ونىمدەرىن ءوندىرۋ، ولشەپ-وراۋ، تاسىمالداۋ، ساقتاۋ، وتكىزۋ جانە كادەگە جاراتۋ شارتتارىنا (ونىڭ ىشىندە قوعامدىق تاماقتانۋدى ۇيىمداستىرۋ بويىنشا كەيتەرينگتىك قىزمەت كورسەتۋدى جۇرگىزۋ كەزىندە قوعامدىق تاماقتاندىرۋ وبەكتىلەرىندە، ۇيىمداسقان ۇجىمدار ءۇشىن قىزمەت كورسەتەتىن، دايىندايتىن قوعامدىق تاماقتاندىرۋ وبەكتىلەرىندە جانە جىلدام قىزمەت كورسەتەتىن ستاسيونارلىق ەمەس قوعامدىق تاماقتاندىرۋ وبەكتىلەرىندە) سايكەس كەلۋگە ءتيىس؛
- تۇتىنۋ قالدىقتارىن جيناۋ جانە ساقتاۋ؛
- وندىرىستىك باقىلاۋدى جۇزەگە اسىرۋ؛
- پەرسونالدىڭ ەڭبەك جاعدايلارىنا، تۇرمىستىق قىزمەت كورسەتۋگە، مەديسينالىق قامتاماسىز ەتۋگە جانە گيگيەنالىق وقىتۋعا؛
- شەكتەۋ ءىس-شارالارىن، ونىڭ ىشىندە كارانتيندى ەنگىزۋ كەزەڭىندە سانيتارلىق-ەپيدەمياعا قارسى ءىس-شارالاردى ۇيىمداستىرۋ جانە جۇرگىزۋ.