بۇدان بۇرىن قانتتىڭ قىمباتتىعىنان كاسىپكەرلەردىڭ بانكروتقا ۇشىراۋى مۇمكىن ەكەنىن حابارلاعانبىز.
نۇر-سۇلتان، الماتى جانە شىمكەنت قالالارىنا قوسىمشا قانت جونەلتىلەدى، دەپ حابارلايدى Almaty-akshamy.kz
اۋىل شارۋاشىلىعى مينيسترلىگىندە ساۋدا جانە ينتەگراسيا مينيسترلىگى، ەلوردا اكىمدىگى جانە قوعامدىق تاماقتانۋ قاۋىمداستىعى وكىلدەرىنىڭ قاتىسۋىمەن بيزنەس سۋبەكتىلەرىن قانتتىڭ قاجەتتى كولەمىمەن قامتاماسىز ەتۋ ماسەلەلەرى بويىنشا كەزدەسۋ ءوتتى.
بۇعان دەيىن قوعامدىق تاماقتانۋ قاۋىمداستىعى قانتپەن قامتاماسىز ەتۋدەگى قيىندىقتارعا بايلانىستى كاسىپورىندار بانكروتقا ۇشىراۋى مۇمكىن ەكەنىن مالىمدەگەن بولاتىن.
«تالقىلاۋ قورىتىندىسى بويىنشا، شاعىن جانە ورتا بيزنەستى قوسىمشا قولداۋ جانە قوعامدىق تاماقتانۋ وبەكتىلەرىنىڭ يندۋستريالىق قانت قاجەتتىلىگىن تولىق قامتاماسىز ەتۋ تۋرالى شەشىم قابىلداندى»، - دەپ جازدى رrimeminister.kz سايتى.
بۇگىن قوعامدىق تاماقتانۋ وبەكتىلەرىنە قاجەت قانتتىڭ كولەمى ايقىندالادى.
ءبىرىنشى كەزەڭدە حالىق سانى نەعۇرلىم كوپ ءۇش وڭىرگە مىڭ توننادان استام قانت جەتكىزىلەدى.
«اۋىل شارۋاشىلىعى مينيسترلىگى قانتتىڭ قوسىمشا كولەمىن نۇر-سۇلتان، الماتى جانە شىمكەنت قالالارىنا جونەلتەدى. وسى قالالارداعى شاعىن بيزنەس وكىلدەرى قانتتىڭ قاجەتتى كولەمىن الا الادى. سونداي-اق قاۋىمداستىق باسقا قالالار بويىنشا ءتىزىم جاساپ، قاجەتتى قانت كولەمىن ەسەپتەيدى. بۇل ورايدا قاۋىمداستىق پەن اكىمدىكتەر اتالعان قانتتى بەرۋ الگوريتمىن ازىرلەيدى»، - دەدى اۋىل شارۋاشىلىعى ۆيسە-مينيسترى جەڭىس وسەرباي.