ۇرىلار قارجىنىڭ ءبىر بولىگىن كارتوچكالىق شوت ارقىلى شەشىپ العان
الاياقتىق جولمەن «قازپوشتا» اق-دان 294 ملن تەڭگەدەن اساتىن قارجىنى قولدى ەتكەندەر سوتتالدى، دەپ حابارلايدى Almaty-akshamy.kz نۇر-سۇلتان قالالىق سوتىنا سىلتەمە جاساپ.
«27 شىلدەدە نۇر-سۇلتان قالاسى سوتىنىڭ قىلمىستىق ىستەر جونىندەگى سوت القاسى ۇرلىق پەن الاياقتىق ءۇشىن سوتتالعانداردىڭ جازالاۋ ۇكىمىن وزگەرىسسىز قالدىردى. تەك ولاردىڭ اۆتوكولىگىنە قويىلعان ارەست كۇشىن جويدى. سەبەبى، ايىپتىلاردىڭ اۆتوموبيلدەردى قىلمىستىق جولمەن تابىلعان قاراجاتقا ساتىپ الىنعانى تۋرالى دالەل جوق. نۇر-سۇلتان قالاسى الماتى اۋدانىنىڭ №2 سوتىنىڭ شەشىمىمەن ب، ج، د جانە ل 6 جىلدان 7 جىلعا دەيىن باس بوستاندىعىنان ايىرىلدى. ولار «قازپوشتا» اق-دان 294 ملن تەڭگەدەن اساتىن اسا ءىرى كولەمدە قارجى ۇرلاعانى ءۇشىن كىنالى دەپ تانىلدى»، - دەلىنگەن سوتتىڭ حابارلاماسىندا.
سوتتا انىقتالدى: سوتتالعاندار بەلگىسىز ادامدارمەن بىرگە الدىن الا ءسوز بايلاسىپ، پاندەميانى پايدالانىپ، ازاماتتارعا ەكىنشى دەڭگەيدەگى بانكتەردەن شوت اشۋدى جانە اقشالاي سىياقى ءۇشىن 10 000-نان 100 000 تەڭگەگە دەيىن بانك كارتالارىن ساتىپ الۋدى ۇسىنعان جانە دەرەكتەردى بەلگىسىز «حاكەرلەرگە» جىبەرگەن.
حاكەرلەر «قازپوشتا» اق ينتەرنەت-رەسۋرسىندا قىزمەتتەردى پايدالانۋشى رەتىندە رەسەيلىك IP مەكەنجايلاردان تولەم جۇيەسىنە كىرۋ ءۇشىن 14 اككاۋنتتى تىركەگەن. وسىلايشا، تولەم وپەراسيالارىن جۇرگىزەدى جانە «قازپوشتا» اق شوتىنان اقشا قاراجاتىن ەسەپتەن شىعارىپ، ولاردى الدىن الا دايىندالعان كارتوچكالىق شوتتارعا جانە ۇيالى وپەراتورلاردىڭ ابونەنتتىك نومىرلەرىنە اۋدارعان.
ب، ج جانە د بىرنەشە رەت الاياقتىق جاساعانى ءۇشىن كىنالى دەپ تانىلدى. بەلگىسىز تۇلعالار «قازپوشتا» اق فيليالدارىنىڭ شالعاي بولىمشەلەرىنە قوڭىراۋ شالىپ، وزدەرىن باس كەڭسەنىڭ IT ءبولىمىنىڭ قىزمەتكەرىمىز دەپ تانىستىرعان. سودان سوڭ تولەم جۇيەسىن باپتاۋ نەمەسە جاڭارتۋ سىلتاۋىمەن بولىمشە وپەراتورلارىن جاڭىلىستىردى، ولار بوگدە بىرەۋلەردىڭ بەرگەن نۇسقاۋلارىن ورىنداي وتىرىپ، ءىس جۇزىندە اقشا قاراجاتىن ەسەپتەن شىعارۋ بويىنشا زاڭسىز وپەراسيالار جۇرگىزدى.
سودان كەيىن ولار ۇرلانعان قارجىنى قولما-قول ەتۋ ءۇشىن باسقا شوتتارعا اۋىستىردى. ۇرىلار قارجىنىڭ ءبىر بولىگىن كارتوچكالىق شوت ارقىلى شەشىپ العان.
ال قالعان بولىگى كريپتوۆاليۋتا ساتىپ الۋعا باعىتتالعان. «قازپوشتا» اق كەلتىرىلگەن زالالدى وتەۋ ماقساتىندا سوتقا جۇگىنۋ تۋرالى شەشىم قابىلدادى. ۇكىم زاڭدى كۇشىنە ەندى.