بۇل سەنبى كۇنى تاڭەرتەڭ الماتىنىڭ ءار تۇكپىرىندە قالا تۇرعىندارى بەلسەندىلىك تانىتىپ، قىس بويى جينالعان قوقىستى جيناۋعا كىرىستى. ولار كۇرەك، تىرما مەن سىپىرعىشتارىن الىپ، جاپىراقتاردى ءۇيىپ، قاپتارعا سالىپ، جۇك كولىكتەرىنە تيەپ، قالانى تازارتىپ جاتتى.
بۇل يگى ىستەن الماتى قالاسىنىڭ قوعامدىق كەڭەسىنىڭ وكىلدەرى دە شەت قالمادى. تۇسكە دەيىن جاروكوۆ پەن بايكاداموۆ كوشەلەرىنىڭ قيىلىسىندا ورنالاسقان وڭتۇستىك ساياباقتاعى كۇزگى جاپىراقتار مەن قوقىس تۇگەلدەي جينالىپ، شىعارۋعا دايىن بولدى.
اكسياعا قاتىسۋشىلار جۇمىستى ىنتا-جىگەرمەن اتقارىپ، بۇل ىسكە ەرەكشە ىقىلاسپەن كىرىسكەندەرى بايقالدى. قوعامدىق كەڭەس مۇشەسى ايگۇل شوقشىقبايەۆا سەنبىلىككە قاتىستى ويىن بىلايشا جەتكىزدى:
– ءبىز «تازا قالا – تازا ءومىر» دەگەن قاعيدانى قولدايمىز. ءار ادام ءوز اينالاسىنىڭ تازالىعىن ساقتاسا، بۇل وزگەلەرگە دە، اسىرەسە، جاستارعا جاقسى ۇلگى بولار ەدى. تاڭەرتەڭ ەرتە تۇرىپ، سەنبىلىككە قاتىسساق تا، ءوزىمىزدى سەرگەك سەزىندىك. الماتى – شىنايى قامقورلىق پەن ماحابباتقا لايىق قالا. ونى تازا ۇستاپ، قورعاۋ – ءبىزدىڭ ازاماتتىق مىندەتىمىز!
قالا تۇرعىنى بالىم باتايەۆا بولسا، قوعامدىق ىسكە اتسالىسۋدىڭ ادام كوڭىل-كۇيىنە وڭ اسەر ەتەتىنىن اتاپ ءوتتى:
– بۇگىن اۋا رايى كەرەمەت! ارينە، تاڭەرتەڭ توسەكتەن ارەڭ تۇردىم (كۇلىپ)، ءبىراق ءقازىر اتقارعان ەڭبەگىمە ريزا بولىپ تۇرمىن. وسى از عانا ۋاقىتتىڭ ىشىندە قانشاما جاپىراق پەن قوقىس جينادىق! قالا كەلبەتىنىڭ تازا بولعانىن كورگەندە ءوز ۇلەسىڭنىڭ بار ەكەنىن سەزىنۋ – ەرەكشە قۋانىش. بۇل ءىسىمىز وزگەلەرگە ۇلگى بولادى دەپ ويلايمىن. بارشا الماتىلىقتاردى وسىنداي يگى شارالارعا قاتىسىپ، قالامىزدىڭ كوركەيۋىنە ۇلەس قوسۋعا شاقىرامىن.
قوعامدىق كەڭەس ءتورايىمى التىناي كوبەيەۆا مۇنداي شارالاردىڭ قوعامدى بىرىكتىرۋدەگى ماڭىزى زور ەكەنىن اتاپ ءوتتى:
– بۇگىن قوعامدىق كەڭەس مۇشەلەرى قالالىق سەنبىلىككە قاتىسىپ، الماتىنىڭ ەكولوگيالىق مادەنيەتىن قالىپتاستىرۋعا ءوز ۇلەستەرىن قوستى. ءاربىر تۇرعىن ءوز قالاسىنىڭ تازالىعىنا جاۋاپتى ەكەنىن سەزىنۋى كەرەك. وسىنداي شارالارعا قاتىسۋ – ادامدى وزگەلەردىڭ ەڭبەگىن قۇرمەتتەۋگە ۇيرەتەدى، ورتاق ىسكە جۇمىلدىرادى. قۋانىشتىسى، ارىپتەستەرىم بۇل باستامانى قولداپ، ءوز ىستەرىن كەيىنگە قالدىرىپ، قالا تازالىعىنا ۇلەس قوسۋعا اسىقتى. بۇل – الماتىعا دەگەن شىنايى ماحابباتتىڭ كورىنىسى. بارشا تۇرعىنداردى ءوز اۋلاسىن، كوشەلەرىن تازا ۇستاۋعا شاقىرامىن. ەگەر اركىم كىشكەنتاي بولسا دا ءوز ۇلەسىن قوسسا، قالامىز كوركەيە تۇسەدى. الداعى ۋاقىتتا اعاش وتىرعىزۋ جۇمىستارى باستالادى، بۇل ىسكە دە اتسالىسايىق!
76 جاستاعى ەڭبەك ارداگەرى تولەۋتاي جاپپاروۆ تا بەلسەندىلىك تانىتىپ، وزگەلەردەن قالىسپاي ەڭبەك ەتتى. جاسىنا قاراماستان ول ءوز ۇلەسىن قوسۋعا اسىقتى:
– بارلىعى وزىمىزدەن باستالادى. ءۇيىمىزدى، اۋلامىزدى، كوشەلەر مەن ساياباقتاردى تازا ۇستاساق، قوعامداعى جالپى كوڭىل-كۇي دە جاقسارادى. بۇگىن – مەيىرىمدىلىك كۇنى، بۇل ءاربىر الماتىلىقتى، قازاقستاندىقتى ەڭ بولماعاندا ءبىر يگى ءىس جاساۋعا شاقىرادى. ءار جاقسىلىقتىڭ قايتارىمى بولادى، ال ونىڭ ەڭ ۇلكەن سىيى – كوتەرىڭكى كوڭىل-كۇي! – دەپ تۇيىندەدى اقساقال.
ايتا كەتەيىك، «الماتى – ورتاق ءۇيىمىز» اكسياسى اياسىندا سەنبىلىكتەر، تازالىق شارالارى، اعاش وتىرعىزۋ جۇمىستارى جالعاسۋدا. بارشا قالا تۇرعىندارىن وسى باستامالارعا بەلسەندى قاتىسىپ، الماتىنىڭ تازا ءارى كورىكتى بولۋىنا ۇلەس قوسۋعا شاقىرامىز!