"الماتى – ءبىزدىڭ ورتاق ءۇيىمىز" قالالىق ناۋقانىنا بۇگىن “الماتى اۋەندەرى” ونەر بىرلەستىگىنىڭ ءانشىسى عاريفا يگىسىنوۆا دا كەلىپ قوسىلدى.
– الماتى – جىلدىڭ ءتورت مەزگىلىندە دە اسەمدىگىن جوعالتپايتىن كوركەم قالا. ەندى از كۇندە جەر-الەم جاسىل جەلەك جامىلادى. سوعان دەيىن اينالانى تازارتۋ، جەردى دە جاڭا تىرشىلىككە دايىنداۋ – ازاماتتىق پارىزىمىز دەپ بىلەمىن. ونەر ادامى رەتىندە مەنى ادەمىلىك اتاۋلىنىڭ ءبارى شابىتتاندىرادى. ءبىزدى قورشاعان ورتانىڭ تازا بولۋى – ءوزىمىزدىڭ جايلى ءومىرىمىزدىڭ كەپىلى، – دەدى ەكوناۋقان قاتىسۋشىسى عاريفا يگىسىنوۆا.
“الماتى اۋەندەرىنىڭ” ءانشىسى تۇركسىب اۋدانىندا ورنالاسقان "رادار" ەكوبەكەتىنىڭ كەزەكشى ەكولوگ-وپەراتورى ماعجان ىدىرىسوۆ جانە الماتى قالاسى پد جەرگىلىكتى پوليسيا قىزمەتىنىڭ ينسپەكتورى دانيار نۇرسادىقپەن بىرگە جۇمىس ىستەپ، گاز قۇرامىن انىقتايتىن قۇرىلعىلاردىڭ كومەگىمەن قالاعا كىرگەن كولىكتەردەن شىعاتىن زياندى زاتتاردىڭ مولشەرىن تەكسەرۋگە اتسالىستى.
– ءبىز ءقازىر كۇرەجولدا تۇرمىز. بۇل ەكوبەكەتتىڭ قالا اۋاسىنىڭ تازا بولۋىنا قوسىپ جاتقان ۇلەسى ۇلكەن. مىنە، بايقاپ تۇرعاندارىڭىزداي، الدىنان سان مىڭ كولىك ءوتىپ جاتىر. ولاردان اۋاعا بولىنەتىن ءتۇرلى زياندى زاتتاردى ايتپاساق تا بەلگىلى. سوندىقتان تەمىر تۇلپار تىزگىندەگەن جۇرتشىلىق كولىگىنىڭ تەحنيكالىق احۋالىنا مۇقيات بولعانى دۇرىس دەپ ويلايمىن. الماتى جالعىز، ال ءبىز كوپپىز. قورشاعان ورتانىڭ، ءوزىمىز جۇتاتىن اۋانىڭ تازا بولۋى – ءوز قولىمىزدا! – دەيدى ءانشى.
وسى ورايدا مەگاپوليسكە كىرەبەرىستەگى كۇرەجولداردا بۇگىندە 19 ەكوپوست جۇمىس ىستەپ تۇرعانىن تىلگە تيەك ەتسەك ارتىق بولماس. ءبارى دە ارنايى گاز تالداعىش جانە ءتۇتىن ولشەگىش قۇرالدارمەن جابدىقتالعان. وپەراتورلاردىڭ ەش كەدەرگىسىز قولايلى جۇمىس ىستەۋىنە مۇمكىندىكتەر جاسالعان.
- ەكوبەكەتتەردىڭ مىندەتى – ەكولوگيالىق تالاپتارعا ساي كەلمەيتىن اۆتوكولىكتەردى انىقتاۋ، كولىك جۇرگىزۋشىلەرىنە ءتۇسىندىرۋ جۇمىستارىن جۇرگىزۋ، جولدا ءجۇرۋ قوزعالىسىن رەتتەۋ، سول ارقىلى الىپ شاھار اۋاسىنىڭ لاستانۋىنا جول بەرمەۋ. ءبىر كۇندە تەحنيكالىق تالاپتارعا ساي كەلمەيتىن جەتى-سەگىز كولىك انىقتالادى. بۇرىنعىداي ەمەس، جۇرگىزۋشىلەر دە جاۋاپكەرشىلىكتى سەزىنەدى. سايىپ كەلگەندە، بۇل ءوزىمىز، وتباسىمىز جۇتاتىن اۋا عوي، سوندىقتان ءبارىمىز تابيعاتقا، اينالاعا جاناشىر بولا بىلسەك نۇر ۇستىنە نۇر بولادى، - دەيدى ەكولوگ-مامان ماعجان ىدىرىسوۆ.
ەسكە سالا كەتەيىك، ءقازىر "تازا قازاقستان" رەسپۋبليكالىق ەكوباعدارلاماسى اياسىندا الماتى ساياباقتارىندا، سكۆەرلەردە، وزەن جاعالاۋلارىندا جانە ەكوبەكەتتەردە اۋقىمدى ەكولوگيالىق اكسيالار ۇيىمداستىرىلۋدا. وندا قالا تۇرعىندارى مەن ونەر، مادەنيەت، سپورت جۇلدىزدارى نيەت، تىلەك بىرىكتىرىپ، قوقىستاردى جيناپ، ارىقتاردى تازارتىپ، اعاش وتىرعىزۋدا.