يسلام دىنىندەگى بەس پارىزدىڭ ءبىرى – قاجىلىققا بارۋ. بۇل – ماتەريالدىق مۇمكىندىگى بار مۇسىلمانعا پارىز امال. بيىل ەلىمىز بويىنشا 4000 ادام قاجىلىققا بارادى. بۇل تۋرالى قمدب قاجىلىق ءبولىمى ايتتى، دەپ حابارلايدى Almaty-akshamy.kz BAQ.KZ-كە سىلتەمە جاساپ.
وسى جىلى 9-12 قاڭتاردا قازاقستان مۇسىلماندارى ءدىني باسقارماسىنىڭ ءتوراعاسى ناۋرىزباي قاجى تاعان ۇلى باستاعان دەلەگاسيا ساۋد ارابيا كورولدىگىنىڭ (ساك) قاجىلىق جانە ۇمرا ءمينيسترى تاۋفيك يبن فاۋزان ار-رابيا مىرزامەن كەزدەسىپ، قاجىلىققا بايلانىستى ماسەلەلەردى قازاقستان ازاماتتارىنىڭ مۇددەسى ءۇشىن تالقىلاپ، قاجىلىقتى ۇيىمداستىرۋعا بايلانىستى ەكى جاقتى كەلىسىمشارتقا قول قويدى. بيىل 4 مىڭ وتانداسىمىزدىڭ قاجىلىق جاساۋىنا رۇقسات الىندى.
ءار جىل سايىن وسىنداي كەلىسىمشارت اياسىندا قمدب قاداعالاۋىمەن جانە كونكۋرستىق نەگىزدە قاجىلىق ورىندارىن العان وتاندىق تۋروپەراتورلاردىڭ ۇيىمداستىرۋىمەن قازاقستاندىق ءار قاجىنىڭ دەنساۋلىعى مەن ساپارداعى قاۋىپسىزدىگىنە باسا نازار اۋدارىلىپ، ءتيىستى تۇسىندىرمە جۇمىستارى جانە ۋاعىز-ناسيحات جۇرگىزىلىپ، قاجىلىق امالدارى ورىندالادى، - دەپ جازدى قمدب.
مىسالى، 2022 جىلى كونكۋرستىق نەگىزدە 4000 قاجىلىق ورىندارىن 14 تاجىريبەلى قازاقستاندىق تۋرفيرمالار الىپ، قاجىلىق ساپارىن ۇيىمداستىرعان.
ولار: حيكمەت تريەۆەل، اتلاس تۋريزم، قىزمەت ساياحات، Tawaf Travel، Qazaq Travel، حيدايات-نۋر، نۇر-قازاقستان، Nurkhan travel، سەمبەكوۆا ي ك، Sanabl، Mina travel، ال-مارۋا، ورداباسى-نج، Robinzon.
قازاقستان مۇسىلماندارى ءدىني باسقارماسىنىڭ قاجىلىقتى ۇيىمداستىرۋعا قاتىسۋى قمدب جارعىسىنىڭ 2.2 تارماعىندا جانە ءدىني تۋريزم سالاسىنداعى تۋروپەراتورلىق قىزمەت تۋرالى تالاپ ەرەجەلەرىمەن (ق ر ءدىن ىستەرى جانە ازاماتتىق قوعام ءمينيسترىنىڭ 2017 جىلعى 22 قاراشاداعى №166 بۇيرىعى) رەتتەلگەن.
الايدا، قاجىلىق ماۋسىمىنان بولەك ايلاردا جىل بويى 20-25 مىڭعا جۋىق قازاقستاندىق ازاماتتار تاراپىنان ۇمرا امالدارى ورىندالادى، - دەلىنگەن اقپاراتتا.
بۇگىنگى تاڭدا ۇمرانى ءار تۋروپەراتور نەمەسە تۋراگەنت قمدب قاتىسۋىنسىز ءوز قالاۋى بويىنشا ۇيىمداستىرا الادى. سەبەبى ساۋد ارابياسى الەمنىڭ ەلۋدەن اسا ەلىنە ءبىر جىلدىق تۋريستىك ۆيزا راسىمدەۋگە رۇقسات بەرگەن. ۆيزا ءبىر جىلعا بەرىلەدى. اتالعان ەلگە بىرنەشە رەت كىرىپ-شىعۋعا مۇمكىندىك بار. بارعان كەزدە ءۇش ايعا دەيىن قالۋعا بولادى.
وسى ورايدا سىرتقى ىستەر مينيسترلىگى ەكى ەل اراسىنداعى تىعىز قارىم-قاتىناستى نىعايتۋ جولىندا وراسان زور شارۋالار اتقارعاندىعىن ەسكەرگەن ءجون. اتالمىش تۋريستىك ۆيزامەن مەككە مەن ءمادينا قالالارىنا كىرۋ، ۇمرا جاساۋ مۇمكىندىگى جانە ساك-نىڭ بارلىق ولكەلەرىنە ساياحات جاساۋ قاراستىرىلعان.
ۆيزا اشىلعان ساتتەن باستاپ ۇمراعا اپارۋشى قازاقستاندىق تۋرفيرمالاردىڭ سانى ارتىپ كەلەدى. ساۋد ارابياسىنا ۇمراعا جول تارتقان ازاماتتارعا ساپالى قىزمەت كورسەتۋ جانە جولدا جەكە باسىنىڭ قاۋىپسىزدىگىن قامتاماسىز ەتۋ اتالمىش تۋرفيرمالاردىڭ جاۋاپكەرشىلىگىندە.
دەگەنمەن، بۇگىندە «كاۋسار تريەۆەل» تۋرفيرماسىنىڭ (اتالعان كونكۋرستىق نەگىزدە قاجىلىق ساپارىن ۇيىمداستىرعان تۋرفيرمالاردىڭ اراسىندا جوق) كۇماندى ىس-ارەكەتتەرىنە قاتىستى ءبىرقاتار ازاماتتار ءدىني باسقارماعا كەلىپ، شاعىمدانۋدا.
جوعارىداعى ايتىلعان نەگىزدەمەلەرگە سۇيەنە وتىرىپ، قمدب-عا قاتىسى جوق جەكە تۋرفيرمالار ارقىلى ۇمراعا بارۋشىلاردى باقىلاۋعا الۋعا جانە ولارعا تۋرفيرمالار تاراپىنان جاسالاتىن قىزمەتتى قاداعالاۋعا ءدىني باسقارمانىڭ زاڭدى قۇزىرەتى جوق ەكەنىن مالىمدەيمىز، - دەدى قمدب قاجىلىق ءبولىمى.