قمدب كوللاگەن قوسىلعان كوسمەتيكالىق ونىمدەرگە قاتىستى ۇكىم شىعاردى، - دەپ حابارلايدى aqshamnews.kz ءتىلشىسى.
كوللاگەن (گرەك. kolla – جەلىم جانە گەن) – دانەكەر ۇلپالارىن بىرىكتىرەتىن اقۋىزدىڭ ءبىر ءتۇرى. ءقازىر كوللاگەن كوسمەتيكالىق ونىمدەر قۇرامىنا، تاعام قوسپالارىنا قولدانىلادى. كوللاگەن جانۋارلاردىڭ سۇيەكتەرىنەن، تەرىلەرىنەن، سىڭىرلەرىنەن، بالىقتىڭ قابىرشاعىنان، قۇستىڭ شەمىرشەكتەرى مەن سۇيەكتەرىنەن الىنادى. سول ءۇشىن ونىڭ شاريعاتتاعى ۇكىمى قانداي نارسەدەن الىنعانىنا بايلانىستى ءارقالاي بولادى.
قمدب مالىمەتىنشە، شوشقادان الىنعان كوللاگەن ءناجىس، حارام سانالادى. شاريعاتتا شوشقانىڭ ەتىن، مايىن جەۋگە، تەرىسىن قولدانۋعا تىيىم سالىنعان.
ال بالىقتان الىنعان كوللاگەندى قولدانۋعا رۇقسات. سەبەبى بالىق ادال ءارى باۋىزداۋدى قاجەت ەتپەيدى. سيىر، قوي سەكىلدى ەتى جەلىنەتىن ءارى شاريعاتقا ساي سويىلعان جانۋارلار مەن قۇستاردان الىنعان كوللاگەن. بۇنى قولدانۋعا بولادى.
"ال ەتى جەلىنبەيتىن جانۋاردان نەمەسە ەتى جەلىنەتىن، ءبىراق شاريعات جولىمەن باۋىزدالماعان مالدان جانە قۇستان الىنعان كوللاگەندى قولدانۋعا بولمايدى. تەك حيميالىق قۇرىلىمى وزگەرىپ، باسقا نارسەگە اينالىپ كەتسە نەمەسە تۇبىمەن جويىلىپ، بولمىسىنان ايىرىلسا قولدانۋعا بولادى. ال ءوزىنىڭ قۇرامىن تۇبەگەيلى وزگەرتپەسە، وندا ونى قولدانۋعا رۇقسات جوق"، - دەلىنگەن ۇكىمدە.