الماتىدا ەل پرەزيدەنتىنىڭ باستاماسىمەن «كەلەشەك مەكتەپتەرى» ۇلتتىق جوباسى اياسىندا بوي كوتەرىپ جاتقان مەكتەپ اۋماعىنا 500-دەن استام ءىرى كولەمدى اعاش ەگىلدى. كوگالداندىرۋ جۇمىستارى تۇركسىب اۋدانىنداعى قايرات شاعىناۋدانى اۋماعىندا سالىنىپ جاتقان مەكتەپتىڭ جانىندا جۇرگىزىلدى. يگى ءىستى «Azimut» ج ش س كومپانياسى قارجىلاندىرىپ، «تازا قازاقستان» رەسپۋبليكالىق باعدارلاماسىنا قولداۋ كورسەتتى.
جوبالىق شەشىمگە سايكەس، قۇرىلىسشى كومپانيا بار بولعانى 50 تال ەگۋگە ءتيىس ەدى. الايدا كومپانيا باستامانى كەڭەيتىپ، كولەمدى ارتتىرۋ تۋرالى ۇسىنىس جاساپ، قالانىڭ كوگال قورىن كوبەيتۋگە ۇلەس قوستى.
ءساناعاش، ۇلپاسىز تەرەك، ارشا، مويىل، شاعان، قاراعاي جانە ساندىك بۇتالار سىندى ەگىلگەن جاسىل جەلەكتەر قالا جاعدايىنا بەيىمدەلگەن. تاڭدالعان كوشەتتەر بولاشاق مەكتەپ اۋماعىن كوركەيتىپ قانا قويماي، وقۋشىلار مەن ماڭايداعى تۇرعىندار ءۇشىن قولايلى ەكولوگيالىق ورتا قالىپتاستىرادى.
ايتا كەتەيىك، پرەزيدەنت باستاماسىمەن جۇزەگە اسىرىلىپ جاتقان «كەلەشەك مەكتەپتەرى» ۇلتتىق جوباسى اياسىندا قالادا 23 100 وقۋ ورنىنا ارنالعان 13 جاڭا جايلى مەكتەپ سالىندى. بيىل تاعى 11 700 وقۋشىعا ارنالعان 8 مەكتەپتى پايدالانۋعا بەرىلەدى. ولار ءۇشىنشى توقساندا اشىلادى دەپ جوسپارلانىپ وتىر.