رجقج قۇتقارۋشىلارى اۋعانستانداعى جەر سىلكىنىسىنىڭ زارداپتارىن جويۋعا قالاي كومەكتەستى؟
قازاقستاندىق قۇتقارۋشىلار قازان ايىنىڭ باسىندا جويقىن جەر سىلكىنىسى بولعان اۋعانستاننىڭ گەرات پروۆينسياسىنداعى گۋمانيتارلىق ميسسياسىن اياقتاپ، ەلگە ورالدى، دەپ حابارلايدى Almaty-akshamy.kz.
ءبىزدىڭ ەلىمىز اۋعانستان تۇرعىندارىنا كومەكتەسۋ ءۇشىن قۇتقارۋشىلارىن جىبەرگەن العاشقىلاردىڭ ءبىرى بولدى. بۇگىنگى كۇن باتىرلارى ءىسساپار بارىسى تۋرالى كەڭىرەك ايتىپ بەردى. ايتا كەتەيىك، بۇل - رەسپۋبليكالىق جەدەل-قۇتقارۋ جاساعىنىڭ وكىلدەرىنىڭ ەكىنشى رەت وسىنداي جاعدايدا كومەككە بارۋى. تۇركيادا بولعان جەر سىلكىنىسى كەزىندە دە ءبىزدىڭ قۇتقارۋشىلار بىردەن وقيعا ورنىنا اتتانعان بولاتىن.
اۋعانستانداعى قۇتقارۋ وپەراسياسىنىڭ قالاي وتكەنىن قۇتقارۋشىلار الماتى قالاسىنىڭ وڭىرلىك كوممۋنيكاسيالار قىزمەتى ۇيىمداستىرعان باسپا ءسوز كونفەرەنسياسىندا ايتىپ بەردى
تجم دەرەكتەرى بويىنشا، الماتىدان ميسسياعا بارلىعى 45 ادام بارعان، ولاردىڭ قاتارىندا قۇتقارۋشىلار، رجقج كينولوگيا ماماندارى، ق ر تجم اپاتتار مەديسيناسى ورتالىعىنىڭ دارىگەرلەرى مەن فەلدشەرلەرى اتتاندى. بۇل ءىسساپاردا قۇتقارۋشىلارىمەن بىرگە ۇيىندىلەر اراسىندا ءۇش قىزمەتتىك يت جۇمىس ىستەدى.
«10 قازاندا ءبىز گەرات پروۆينسياسىنا جەتتىك. ءبىز وزىمىزبەن بىرگە تولىق جابدىقتالعان كاماز، گازەل جانە ۋاز الدىق. حالىقارالىق ستاندارتتارعا ساي، ءبىز اۆتونومدى رەجيمدە ءومىر سۇرە الاتىنداي قۇرعاق اس، سۋ قورى مەن شاتىر الدىق. اۋەجايعا كەلگەننەن كەيىن ءبىزدى جەرگىلىكتى بيلىك قارسى الىپ، ءبىزدى نايبروفي ەلدى مەكەنىنە ءبولدى. بۇل كۇردەلى ۋچاسكەلەردىڭ ءبىرى بولدى، ويتكەنى وندا 700-دەن استام ءۇي بولعان جانە ولاردىڭ بارلىعى قيراعان. ول جەردە شاتىرلار تىگىلىپ، مەديسينالىق پۋنكت ورناتىلدى»، - دەدى ق ر تجم الماتى قالاسى بويىنشا رجقج باسشىسى، حالىقارالىق دەڭگەيدەگى قۇتقارۋشى ۆلاديمير سوي.
قازاقستاندىق قۇتقارۋشىلار كوزبەن كورگەندەرىن سيپاتتاي وتىرىپ، ۆلاديمير سوي بۇل كىسىلەردى تاڭ قالدىرعان جايتتارعا دا توقتالدى. ونىڭ ايتۋىنشا، ءبىر قاراعاندا قۇم اراسىنان تابىلماي قالاتىنداي كورىنەتىن سابان ۇيلەر كەرىسىنشە جۇزدەگەن ادامنىڭ پاناسىنا اينالعان. قۇتقارۋشىلارعا بۇل ورىنداردا ارنايى تەحنيكانىڭ قولدانۋدىڭ قاجەتى دە بوماعان، سەبەبى ول بەتون قۇرىلىستارعا ارنالعان. سوندىقتان جاساق اپاتتان وپات بولعانداردىڭ دەنەلەرىن قولمەن شىعارىپ، امان قالعاندارىن ىزدەدى.
«ءبىز مۇندايدى ءبىرىنشى رەت كوردىك، ساۋ قالعان بىردە-بىر ءۇي بولمادى. ءبىز وزىمىزبەن بىرگە الىپ كەلگەن گيدراۆليكالىق جانە پنيەۆماتيكالىق اپاتتىق-قۇتقارۋ قۇرالدارىنىڭ بىزگە پايداسى تيمەدى. كۇرەكپەن، قايلا جۇمىس ىستەدىك، ءبارى قولمەن تىرمالاندى»، - دەپ جالعاستىردى ۆ.سوي.
11 قازاندا قۇتقارۋشىلار 6،3 باللدىق افتەرشوكتى سەزگەن. جاعدايدىڭ كۇردەلىلىگىنە قاراماستان، قۇتقارۋشىلار ورنالاسقان ورىندارىنان 10 شاقىرىم جەردەگى ۆوياكي مەن سياحابتا قىستاۋلارىندا قۇتقارۋ جۇمىستارىن جالعاستىردى. بۇل جەردە دە ەلدى-مەكەننىڭ ءبارى قيراندى استىندا قالعان، تەك زارداپ شەككەندەر بولماعان، ويتكەنى العاشقى جەر سىلكىنىسىنەن كەيىن جەرگىلىكتى تۇرعىندار ۇيلەرىن تاستاپ، كوشەگە شاتىرلارعا كوشكەن. وندا قازاقستاندىق قۇتقارۋشىلار زارداپ شەككەن 10 ادامعا كومەك كورسەتتى، ولاردىڭ اراسىندا ايەلدەر مەن بالالار دا بولدى. ال كەلەسى كۇنى تاڭەرتەڭ ولار باستاپقىدا كەلگەن ورنىنا ورالىپ، ول جەردە 5 جاسار بالانى ۇيىندىلەردىڭ استىنان شىعارىپ العان.
ىزدەۋ جۇمىستارىن قۇبىلمالى اۋا-رايى دا قيىنداتتى، كۇندىز ىستىق، كەشكە سۋىق، ءتىپتى ولەكسەلەردىڭ ءيىسىنىڭ ءوزى كەرى اسەر ەتتى، سەبەبى كوپتەگەن مال قىرىلعان بولاتىن. يتتەرگە تەك مايىتتەردى ىزدەپ قانا قويعان جوق، ولار ءتىرى ادامداردى دا ىزدەۋگە ۇيرەتىلگەن، ءبىراق ءتورت اياقتىلار وزدەرىنە ارتىلعان مىندەتەرىن ويداعىداي اتقاردى، تىنىس الماي جاتقانداردى دا تاپتى. ولار مۇنى تۇركيادا ءىسساپاردا جۇرگەندە ۇيرەندى.
سونىمەن قاتار، ءبىزدىڭ قۇتقارۋشىلار زارداپ شەككەندەردى ىزدەۋ ءۇشىن تاعى 9 ەلدى مەكەندى ارالادى. اۋعان تۇرعىندارىنىڭ شاتىرلارىن قۇلاتىپ كەتەتىن شاڭدى داۋىل دا جۇمىستى قيىنداتتى.
قۇتقارۋشىلاردىڭ وزدەرى دە وزدەرىمەن بىرگە الىپ بارعان شاتىرلاردا تۇردى. ۆلاديمير سويدىڭ ايتۋىنشا، ولار شەتەلدىك ءىسساپارلارعا بارعاندا، ولار سول ەلگە ەشقاشان اۋىرتپالىق سالمايدى، بارلىعىن وزدەرىمەن بىرگە الىپ جۇرەدى، كەرىسىنشە، ءتىپتى زارداپ شەككەن پروۆينسيالاردىڭ تۇرعىندارىمەن سۋلارىن بولىسكەن. اۋعانستانداعى جاعداي تۇراقسىز بولعاندىقتان، قازاقستاندىق قۇتقارۋشىلاردى پيكاپتاردا قارۋلانعان كۇزەتپەن ءجۇردى. ءبىراق جەرگىلىكتى تۇرعىندار جىلى شىراي تانىتىپ، قازاقستاننان كەلگەن قۇتقارۋشىلارعا جاقسى قاراعان.
ايتا كەتەيىك، اۋعانستاندا يراننان، تۇركيادان، تۇركىمەنستاننان قۇتقارۋشىلار دا جۇمىس ىستەگەن.
ق ر تجم دەرەكتەرى بويىنشا اۋعانستاندا ىزدەستىرۋ-قۇتقارۋ جۇمىستارىن جۇرگىزۋ بارىسىندا قازاقستان قۇتقارۋشىلارىنىڭ كۇشىمەن 83 جەرگىلىكتى تۇرعىنعا مەديسينالىق كومەك كورسەتىلدى، ۇيلەردىڭ 211 فراگمەنتى بولشەكتەلدى، نايبروفي ەلدى مەكەنىندەگى قيراعان ۇيلەردىڭ بارلىق 700 ۋچاسكەسى تەكسەرىلدى.