قىزىلوردالىق كوپبالالى انا ۆەنەرا تايلاقبايەۆا ەۋروپا نارىعىنا قامىس شىعارىپ، قوماقتى پايدانىڭ كوزىن تاپتى، - دەپ حابارلايدى اlmaty-akshamy.kz Massaget.kz-كە سىلتەمە جاساپ.
ۆەنەرانىڭ جاسى 37-دە، جولداسى رايىسبەك اياپبەرگەنوۆپەن بىرگە ون بالا تاربيەلەپ وتىر. ەكەۋى تەمىرجول سالاسىندا ەڭبەك ەتكەن. ءبىراق تاپقانى كۇنەلتكەنگە جەتپەي، باسقا كىرىس كوزىن ىزدەپتى. بۇل تىڭ يدەيا وعان كوروناۆيرۋس پاندەمياسى كەزىندە كەلگەن. وسىلايشا، ءوزى تۇراتىن قازالى اۋدانىندا قاۋلاپ وسكەن قامىستى كادەگە جاراتۋ جولدارىن جان-جاقتى قاراستىرادى.
"بۇل نارىقتى ۇزاق ءارى مۇقيات زەرتتەدىك. اۋەلى گەرمانيا كاسىپكەرلەرىنە قامىس ساتىپ الۋدى ۇسىندىق. شەت ەلدە ونى جوعارى باعالايدى. تۇرعىن ءۇي قۇرىلىسىندا قولدانادى. كوپ ۇزاماي نيدەرلاند، دانيا، فرانسيا، پولشادان تاپسىرىستار تۇسە باستادى. ۇلىبريتانيا، بەلارۋستەن دە ساتىپ الۋشىلار تابىلدى. تمد مەملەكەتتەرىمەن دە بايلانىس ورناتقىمىز كەلەدى"، - دەدى كاسىپكەر.
جۇمىسى العا جىلجىعان ولار "ازياقامىس" شارۋاشىلىعىن قۇرىپ، قاراماعىنا اۋىلداستارىن جيناعان. 10-15 شاقتى ادام تۇراقتى ەڭبەككە تارتىلسا، ۋاقىتشا جۇمىسقا 300-گە جۋىق ادام جۇمىلادى ەكەن. ءبىر ماۋسىمدا ورتا ەسەپپەن 60-70 جۇك كولىگى ەۋروپا اسادى.
ءونىمدى جيناۋ، قابىلداۋ سياقتى شارۋا ۆەنەرا تايلاقبايەۆانىڭ جۇبايىنىڭ موينىندا. ال شەتەلدىكتەرمەن كەلىسسوز جۇرگىزۋ، قۇجاتتاردى رەتتەۋ، قامىس ساتۋدى ۆەنەرا ءوز مىندەتىنە العان. كاسىپكەر ايەل وسى كاسىپ ءۇشىن اعىلشىن ءتىلىن دە از ۋاقىت ىشىندە ۇيرەنىپ العان. ءقازىر نەمىس، فرانسۋز تىلدەرىن مەڭگەرىپ ءجۇر. وسىلايشا، بيزنەسىنىڭ گەوگرافياسىن كەڭەيتكىسى كەلەدى.
شەتەلدىكتەر تۇزدى توپىراقتا وسكەن قامىستى قۋانا-قۋانا قابىلداپتى.
"گەرمانيادان كەلگەن ينۆەستور قازالىداعى قامىس وسەتىن جەردى كوردى. ساپاسى جاعىنان تالاپقا ساي كەلگەنىنە قۋانىپ كەتتى. بەرىك، قۇرعاق ءارى ۇزىن. ولارعا كەرەگى وسىنداي ەدى"، - دەيدى كاسىپكەر.
ۆەنەرا تايلاقبايەۆا - قوس قىزىل ديپلومنىڭ يەسى. سويتە تۇرا، قامىس كاسىبىنەن بەرەكە تاۋىپ ءجۇر. الداعى ۋاقىتتا قامىستى ءوز ەلىمىزدىڭ كادەسىنە جاراتۋدى دا ويلاستىرىپ ءجۇر.