جىل سايىن 1 مامىر كۇنى اتاپ وتەتىن قازاقستان حالقىنىڭ بىرلىگى كۇنى قارساڭىندا، استانادا قازاقستان حالقى اسسامبلەياسىنىڭ XXXIV سەسياسى بولىپ ءوتتى.
الماتىنىڭ دەلەگاسياسى سەسسيانىڭ جۇمىسىنا بەلسەنە قاتىسىپ، وڭىرلىك كوممۋنيكاسيالار قىزمەتىنىڭ سۇقبات الاڭىندا ول جاقتان قانداي اسەر الىپ قايتقاندارىن ايتتى، دەپ حابارلايدى aqshamnews.kz.
الماتىدان ءسان-سالتاناتى كەلىسكەن – 64 ادامنان تۇراتىن دەلەگاسيا باردى. ارالارىندا – ەتنومادەني ورتالىقتىڭ، جاستار مەن انالار ۇيىمىنىڭ وكىلدەرى مەن ازاماتتىق باستاما كوتەرىپ جۇرگەن بەلسەندىلەر دە بولىپتى.
دەلەگاسيا جاستاردىڭ دامۋى مەن تۇرعىنداردىڭ از قامتىلعان بولىگىن قولداۋعا ارنالعان بىرنەشە جوبا ۇسىندى وندا. اسىرەسە مەدەۋ اۋدانىنىڭ كوميۋنيتي-ورتالىعىنا ەرەكشە ىقىلاس ءبىلدىردى جيىنداعىلار. ءقازىر وسى ورتالىقتا 200 ادام وقىپ، 1200-دەن استام ادام جۇمىسقا تۇرىپ، ءارتۇرلى قاۋىمداستىقتار مەن كلۋبتار دا قۇرىلعان.
«تازا قازاقستان»، «راقمەت جەر-انا» سەكىلدى ەكولوگيالىق اكسيالار، «Jastar Generation» دەيتىن حالىقارالىق لاگەر مەن «بولاشاقتىڭ توپ 50 ماماندىعى» دەگەن ءبىلىم باستاماسى دا كوپ قولداۋعا يە بولدى وسى سەسسيادا. 2024 جىلدىڭ باسىنان بەرى 9400 ادامدى قامتىعان «جومارت جان» ورتالىعىنىڭ جۇمىسى دا ەسكەرۋسىز قالعان جوق.
الماتىداعى قحا ءتوراعاسىنىڭ ورىنباسارى ۆسيەۆولود لۋكاشيەۆتىڭ ايتۋىنشا، وسى جولعى سەسسيا «ءبىر¬لىك. جاسامپازدىق. ورلەۋ» دەگەن اتپەن وتكەن. قحا-نىڭ 2025-2030 جىلدارعا ارنالعان دامۋ كونسەپسياسىن ازىرلەپ، ۇلتارالىق تاتۋلىقتى نىعايتاتىن جۇمىستى جان-جاقتى كۇشەيتىپ، «ەلدەسۋ جانە تاتۋلاسۋ» جوباسىن ءالى دە اۋقىمدى ەتە ءتۇسۋ نەگىزگى مىندەت بوپ قالدى.
«بىرلىگى جاراسقان ەل» ۇستانىمىن مادەنيەت جانە ونەر ارقىلى جۇزەگە اسىرۋ ءۇشىن استانا مەن الماتىدا الەكساندر پۋشكيننىڭ، تاراس شيەۆچەنكونىڭ، فەودور دوستويەۆسكييدىڭ، ميحايل شولوحوۆ مۋزەيلەرىنىڭ كورمەسى وتپەك. قحا-نىڭ 30 جىلدىعىندا الماتىدا قازاقستانداعى ۇلتتاردىڭ ونەرىنە ارنالعان تەاترلاندىرىلعان فەستيۆال دا وتەدى»، — دەدى ۆ. لۋكاشيەۆ.
تۇرىك ەتنومادەني ورتالىعىنىڭ انالار كەڭەسىنىڭ ءتوراعاسى زۋلفيا حۋسەينوۆانىڭ ايتۋىنشا، جيىندا كوتەرىلگەن تاعى ءبىر ماڭىزدى ماسەلە - وتباسىلىق قۇندىلىقتاردى دامىتۋ بولىپتى.
«بيىل وتباسى ينستيتۋتىن قولداۋعا عانا ەمەس، جاستاردىڭ باستاماشىلدىعىنا، جاستاردى الەۋمەتتىك، ەتنومادەني جوبالارعا تارتۋعا دا نازار اۋداردىق. جاستاردى ۇيىستىرىپ، ۇلتارالىق بايلانىستى نىعايتۋعا باعىتالعان بۇل باعدارلامالاردى ەرەكشە اتاپ وتكىم كەلەدى»، — دەدى ءتوراعا.
«قازاقستانداعى ۇيعىر جاستارى وداعىنىڭ» ءتوراعاسى رۋستام قايرىيەۆ تە ءوز كەزەگىندە سەسسيانىڭ جۇمىسىندا قاراپايىم ماماندىقتاردى قادىرلەۋگە، جاستاردىڭ ماماندىق تاڭداۋىنا كوپ كوڭىل ءبولىنىپ جاتقانىن اتاپ ءوتتى.
«ءقازىر ققا-نىڭ جاستار قاناتى مەملەكەتتىك ماڭىزى بار جوبالاردى جۇزەگە اسىرۋعا اتسالىسىپ جاتىر. سەسسيا بارىسىندا پرەزيدەنتىمىز قاسىم-جومارت توقايەۆ جاستاردىڭ اراسىندا جۇمىسشى ماماندىقتاردى بەدەلدى ەتۋگە كوپ كوڭىل ءبولۋ كەرەكتىگىن اتاپ ءوتتى. بەتى جىلتىراعان ادامدارى عانا ەمەس، ناعىز جۇمىستىڭ بەل ورتاسىندا جۇرگەن دانەكەرلەۋشىلەردى، قۇرىلىسشىلاردى، ەكونوميكانىڭ وسۋىنە اتسالىسىپ جۇرگەن ادامداردى كوپ كورسەتۋ كەرەك. نارىقتا بىلىكتى جۇمىسشىلار جەتىسپەي جاتقاندا، وقۋشىلار ءالى ەكونوميست، قارجىگەر بولۋدى ارمانداپ ءجۇر»، — دەدى.
قازاقستان ۇيعىرلارىنىڭ رەسپۋبليكالىق مادەني ورتالىعىن باسقاراتىن ابدۋلحاليل دولقۋنتاي دا بىرلىك بولسا عانا جەتىستىككە جەتەتىنىمىزدى ايتادى.
«پرەزيدەنتىمىز قاسىم-جومارت توقايەۆ ءوز سوزىندە جاستار تاربيەسىنە اقساقالداردى تارتۋدىڭ ماڭىزىن اتاپ ءوتتى. ءار ۇلت اقساقالدارى ارقىلى جاستاردى تاربيەلەۋگە اتسالىسۋى كەرەك. ولارعا دۇرىس ءبىلىم بەرىپ، دۇرىس تاربيە بەرىپ، دۇرىس جولعا سالۋىمىز كەرەك. ءبىز الماتىدا جاستارمەن كەزدەسىپ، وقۋ ورىندارىندا، ۇيىمداردا ءارتۇرلى ءىس-شارا وتكىزىپ جاتىرمىز ءقازىر. الماتىدا اقساقالدار كەڭەسى مەن «جومارت جان» جوباسى وسى باعىتتا جاقسى جۇمىس ىستەپ جاتىر»، — دەپ اتاپ ءوتتى ول.
سەسسيا بارىسىندا كوتەرىلگەن وسىنداي وزەكتى ماسەلەلەردەن سوڭ، الماتى انا مەن بالانى قولداۋعا باعىتتالعان، ققا جاستار كلۋبتارىنىڭ جەلىسىن ۇلعايتىپ، جاڭادان ۇلتارالىق ىنتىماقتى ارتتىراتىن بىرنەشە قالالىق باستامانى جۇزەگە اسىرۋدى جوسپارلاپ وتىر.