الماتىدا سەمسەرلەسۋدەن قازاقستان چەمپيوناتى اياقتالدى.
ءتۋرنيردىڭ سوڭعى مەدالدارى سەمسەر قارۋىمەن ايقاسۋدا ساراپقا سالىندى، دەپ حابارلايدى aqshamnews.kz ۇوك-كە سىلتەمە جاساپ.
ەرلەر اراسىندا شىعىس قازاقستان وبلىسىنىڭ سپورتشىسى ۆاديم شارلايموۆ جەڭىسكە جەتتى. كۇمىس جۇلدەنى شىمكەنت قالاسىنىڭ وكىلى ەلمير ءالىمجانوۆ ەنشىلەدى. قولا مەدالداردى شىمكەنتتەن عابيدەن مۇستافين مەن استانادان الەكساندر فەدوتوۆ يەلەندى.
ايەلدەر اراسىنداعى جارىستا الماتى قالاسىنىڭ سپورتشىسى سوفيا نيكولايچۋك توپ جاردى. كۇمىس جۇلدە پولينا ليسوۆسكاياعا بۇيىرسا، سوفيا اكتايەۆا مەن ۋليانا پيسوۆا ءۇشىنشى ورىنعا تۇراقتادى. بارلىق سپورتشى الماتىنىڭ اتىنان ونەر كورسەتتى.
جارىستىڭ جالپى كوماندالىق ەسەبى بويىنشا ءبىرىنشى ورىندى الماتى قۇراماسى يەلەندى. ەكىنشى ورىن — شىمكەنتكە، ال ءۇشىنشى ورىن — قاراعاندى وبلىسىنا بۇيىردى.