180 پاتەرلىك 3 كوپقاباتتى تۇرعىن ءۇي پايدالانۋعا بەرىلدى
قورداي اۋدانى گۆاردەيسك قالاشىعىنداعى بيولوگيالىق قاۋىپسىزدىك پروبلەمالارى عىلىمي-زەرتتەۋ ينستيتۋتى قىزمەتكەرلەرىنە ارنالىپ سالىنعان جالپى 180 پاتەرلىك 3 كوپقاباتتى تۇرعىن ءۇي پايدالانۋعا بەرىلدى، دەپ حابارلايدى Almaty-akshamy.kz قازاقپارات اگەنتتىگىنە سىلتەمە جاساپ.
ەل تاۋەلسىزدىگىنىڭ 30 جىلدىعىنا وراي وتكەن پاتەر كىلتىن تاپسىرۋ سالتاناتتى شاراسىنا قاتىسقان وبلىس اكىمى بەردىبەك ساپاربايەۆ قونىس توي يەلەرىن قۇتتىقتاپ، عالىم-مامانداردىڭ، قۇرىلىسشىلاردىڭ ەلەۋلى ەڭبەگىن اتاپ ءوتتى.
«جاقىندا عانا وبلىسىمىزعا جۇمىس ساپارىمەن كەلگەن ق ر پرەزيدەنتى قاسىم-جومارت توقايەۆ ايتقانداي، شىن مانىندە بۇل ۇلكەن جەتىستىك. ەلىمىز ءۇشىن قاجەتتى ءوندىرىس. سىزدەر قازاقستاندى الەمگە تاعى ءبىر تانىتتىڭىزدار. ءبىزدىڭ ەلىمىزدە دە بيوتەحنولوگيانىڭ دامىعانىن، جوعارى بىلىكتى عالىمداردىڭ بار ەكەنىن دالەلدەڭىزدەر.
شەتەلدە مۇنداي ءوندىرىستى قۇرۋعا 3-4 جىل جۇمسالسا، ءبىز توعىز ايدىڭ ىشىندە ۇلكەن زاۋىت سالا الدىق. ۆاكسينامىز دۇنيە جۇزىندە مويىندالىپ جاتىر.
مەملەكەت باسشىسى عالىمدارعا، ماماندارعا بارلىق قاجەتتى جاعداي جاساۋ، ولاردىڭ ەشتەڭەگە الاڭداماي جۇمىس ىستەۋىنە، عىلىممەن اينالىسۋىنا قولايلى ورتا قالىپتاستىرۋ، باسپانامەن، بالالارىن مەكتەپ جانە بالاباقشامەن كەدەرگىسىز قامتۋ، ۋاقىتتارىن ءتيىمدى وتكىزۋ بويىنشا ناقتى تاپسىرما بەرگەن بولاتىن. سول تاپسىرمانىڭ نەگىزىندە جالاقىلارىڭىز ارتتى، سىزدەرگە ارنالىپ سالىنعان 180 پاتەرلى تۇرعىن ۇيلەر بۇگىن پايدالانۋعا بەرىلۋدە. بۇل ينستيتۋت پەن زاۋىت قىزمەتكەرلەرىن تولىعىمەن باسپانامەن قامتۋعا مۇمكىندىك بەرەدى.
سىزدەردىڭ قاجىرلى ەڭبەكتەرىڭىزدىڭ ارقاسىندا ءوندىرىلىپ جاتقان وتاندىق ۆاكسينانىڭ كوروناۆيرۋس ىندەتىنە قارسى كۇرەسكە جانە حالىقتىڭ دەنساۋلىعىن نىعايتۋعا زور ۇلەس قوساتىنىنا سەنەمىن»،- دەگەن ايماق باسشىسى قىزمەتكەرلەر مەن قۇرىلىسشىلارعا ريزاشىلىعىن جەتكىزدى.
بيولوگيالىق قاۋىپسىزدىك پروبلەمالارى عىلىمي-زەرتتەۋ ينستيتۋتىنىڭ باس ديرەكتورى كۇنسۇلۋ زاكاريا بارىنشا قولداۋ كورسەتىپ جاتقان ەل، وبلىس باسشىلىعىنا، قۇرىلىسشىلارعا دەگەن ىقىلاسىن ءبىلدىردى.
«وبلىس اكىمى ەكى جىلدا وتىز رەتتەن استام جۇمىس ساپارىمەن كەلىپ، بىزدەگى قۇرىلىس بارىسىمەن، ماسەلەلەرىمىزبەن، جاعدايىمىزبەن ءجيى تانىسىپ وتىردى. سونىڭ ناتيجەسىندە بارلىق جۇمىستار دەر كەزىندە ءارى ساپالى ورىندالدى. ينستيتۋت قىزمەتكەرلەرى ءۇشىن بارلىق قاجەتتى جاعدايلار جاسالۋدا. اتاپ ايتار بولساق، تۇرعىن ۇيلەر، بالالار ويىن الاڭشالارى، دەنە شىنىقتىرۋ-ساۋىقتىرۋ كەشەنى سالىندى. تالاي جىلدان بەرى ينستيتۋت قىزمەتكەرلەرىن تۇرعىن ۇيمەن قامتاماسىز ەتۋ ماسەلەسى العاش رەت شەشىمىن تاپتى. ەلىمىزدىڭ جانە وبلىس باسشىلىعىنا ۇلكەن العىسىمىزدى بىلدىرەمىز!»، – دەي كەلە كۇنسۇلۋ زاكاريا جۇمىستاردى ساپالى ءارى جوعارى دەڭگەيدە جالعاستىرا بەرەتىندىكتەرىن جەتكىزدى.
پايدالانۋعا بەرىلگەن تۇرعىن ۇيلەردەگى پاتەرلەر تولىعىمەن تۇرمىسقا قاجەتتى جيھازدارمەن جابدىقتالعان، بارلىق ينجەنەرلىك جەلىلەرمەن قامتىلعان.
ينستيتۋت جانە زاۋىت قىزمەتكەرلەرى مەن ولاردىڭ بالالارى ءۇشىن 120 ادامعا ارنالعان دەنە شىنىقتىرۋ-ساۋىقتىرۋ كەشەنى، ويىن الاڭشالارى سالىنعان.