6-8 ايدان كەيىن اعزاداعى انتيدەنە تيترلارى تومەندەيدى
رەسەيدەگى ن. ف. گامالەي اتىنداعى ۇلتتىق ەپيدەميولوگيا مەن ميكروبيولوگيا زەرتتەۋ ورتالىعىنىڭ ديرەكتورى ءارى كوروناۆيرۋس ينفەكسياسىنا قارسى «سپۋتنيك V» ۆاكسيناسىن جاساۋشىلاردىڭ ءبىرى الەكساندر گينسبۋرگ ۆاكسينا العاندار مەن كوروناۆيرۋسپەن اۋىرىپ العاندار نەلىكتەن قايتا ۆيرۋس جۇقتىرىپ جاتقاندارىن ءتۇسىندىردى، دەپ حابارلايدى Almaty-akshamy.kz Baq.kz اگەنتتىگىنە سىلتەمە جاساپ.
«ۆاكسينا العان ادامدار اۋرۋدى جۇقتىرادى، سەبەبى دەلتا شتامى كەزىندە جاسۋشالاردىڭ ەستە ساقتاۋى جۇمىس ىستەپ ۇلگەرمەيدى»،-دەدى دارىگەر جەرگىلىكتى باسىلىمعا بەرگەن سۇحباتىندا.
ونىڭ ايتۋىنشا، دەلتا شتاممى جاسۋشالارمەن ءوزارا ارەكەتتەسۋدى جانە ولاردىڭ ىشىنە ەنۋ ءتاسىلىن وزگەرتكەن.
«ادام اعزاسىنداعى انتيدەنە تومەندەگەن ساتتە ۆيرۋس جاسۋشالار اراسىنا كىرىپ ۇلگەرەدى. ياعني انتيدەنەلەر وعان قارسىلىق كورسەتىپ ۇلگەرە الماي قالادى. كوروناۆيرۋسپەن اۋىرعان سوڭ ارادا التى-سەگىز اي وتكەندە اعزاداعى انتيدەنە تيترلارى تومەندەيدى. الايدا، جاسۋشانىڭ ەستە ساقتاۋى ساقتالادى، ءبىراق ولار ۆيرۋس ەنگەن سوڭ ەكىنشى-تورتىنشى كۇنى عانا جۇمىس ىستەي باستايدى. ول كەزدە كەش بولادى»،-دەدى الەكساندر گينسبۋرگ.
سونىمەن قاتار ول ۆيرۋس ءبىر جاسۋشادان كەلەسىنە ەركىن وتەتىنىن ايتادى، سول سەبەپتى كوپتەگەن جاسۋشانى زاقىمداپ ۇلگەرەدى ەكەن.
دارىگەر، سول ءۇشىن قان قۇرامىنداعى انتيدەنەنى تومەندەتپەي، جارتى جىل سايىن ريەۆاكسينا جاساپ وتىرۋدى اتاپ ءوتتى.