الماتى وبلىسىندا تاۋەلسىزدىكتىڭ 30 جىلدىعىنا وراي ءتۇرلى شارا وتكىزىلىپ كەلەدى. سولاردىڭ ءبىرى رەتىندە بولاشاعىن عىلىممەن بايلانىستىراتىن جاس دارىنداردى قولداۋ ماقساتىندا ۇيىمداستىرىلعان «جاس عالىم» عىلىمي-يننوۆاسيالىق جوبالار بايقاۋىن ايتۋعا بولادى، دەپ حابارلايدى Almaty-akshamy.kz Aikyn.kz سايتىنا سىلتەمە جاساپ.
سىندارلى سىناققا قاتىسقان 30-دان استام جاس عالىم قازىلار القاسىنىڭ تالقىسىنا وزدەرىنىڭ ءتۇرلى سالاداعى عىلىمي ەڭبەگىن ۇسىندى. ولاردى جاسىل ەنەرگەتيكانى دامىتۋ، ءبىلىم سالاسىنا يننوۆاسيا ەنگىزۋ، مۇمكىندىگى شەكتەۋلى جانداردىڭ قوعامعا بەيىمدەلۋىن جەڭىلدەتۋ جانە باسقا دا باعىتتار قىزىقتىرادى ەكەن. بايقاۋدا توپ جارعان جەڭىمپازداردى وبلىس اكىمىنىڭ ورىنباسارى ارسلان داندىبايەۆ قۇتتىقتاپ، ماراپاتتادى.
الماتى وبلىستىق جاستار ساياساتى ماسەلەلەرى جونىندەگى باسقارماسى ما-ماندارىنىڭ ايتۋىنا قاراعاندا، «جاس عالىم» عىلىمي-يننوۆاسيالىق بايقاۋى وڭىردەگى بولاشاعىن عىلىممەن بايلانىستىراتىن تالانتتى جاستاردىڭ باستامالارىن قولداۋ مەن ولاردىڭ عىلىمي الەۋەتىن ارتتىرۋدى ماقسات ەتەدى.
ەرتەڭگى ەل عىلىمىنىڭ كوسەگەسىن كوگەرتەتىن جاستاردىڭ اراسىنداعى بايقاۋدا 8 جاس دارا شىعىپ، ولار 300 مىڭنان 1 ملن تەڭگەگە دەيىن اقشالاي سىيلىقتارمەن ماراپاتتالدى.
قاتارلاستارىنان وزا شاپقان تيمۋر راقىسبايەۆ «مەكتەپ جاسىنا دەيىنگى بالالارعا ارنالعان Zerdeli bala وقىتۋ ءموبيلدى قوسىمشاسى» جوباسىن بايگەگە قوسىپ، باس جۇلدەگە يە بولسا، سۇلەيمەن دەميرەل اتىنداعى ۋنيۆەرسيتەتتىڭ كومپيۋتەر عىلىمدارى ماماندىعى بويىنشا PhD دوكتورلىعى بويىنشا ءبىلىم الۋشى ءايمولدىر الدابەرگەننىڭ ينكليۋزيۆتى ءبىلىم بەرۋ ۇيىمدارىنىڭ جۇمىسىن جەڭىلدەتۋگە ارنالعان جوباسى ءبىرىنشى ورىننان كورىندى.
ءايمولدىر الدابەرگەن ديسلەكسياسى بار بالالارعا ارنالعان جاساندى ين-تەللەكتكە نەگىزدەلگەن انيماسيالىق گەنەراتور الگوريتمىن قۇرۋ تۋرالى جوباعا كىرىسۋ جايىنداعى وي العاش دوكتورانتۋرادا وقي باستاعاندا كەلگەنىن ايتادى.
– قازاقستاندا ديسلەكسياسى بار بالالاردى تاربيەلەيتىن 19 مەكتەپ بار. جوباعا كىرىسەر الدىندا سول مەكتەپتەرمەن بايلانىس ورناتىپ، سالا ماماندارىنىڭ وي-پىكىرىن تىڭدادىم. ولار مۇنداي جوبانىڭ قاجەت ەكەنىن ايتتى. ءقازىر پەداگوگتەر بالالارعا ءماتىندى سۋرەتتەر ارقىلى ۇعىندىرۋ ءۇشىن ونى پلاستيليننەن جاساپ كورسەتەدى. بۇل ەداۋىر ۋاقىتتى الادى جانە شىعىنى كوپ. ال مەنىڭ جوبامدا ءماتىن بويىنشا سۋرەتتەردى انيماسيا ارقىلى جىلدام كورسەتۋگە مۇمكىندىك بار، – دەيدى جاس عالىم.
ينكليۋزيۆتى ءبىلىم بەرۋدى دامىتۋعا قوسىلعان ەلەۋلى ۇلەس دەۋگە تۇراتىن بۇل جوبانى ءبىلىم جۇيەسىنە ەنگىزسە، تەحنولوگيالىق جاڭالىق سالانىڭ جۇگىن ەداۋىر جەڭىلدەتپەك.
سول سياقتى «قازاقستاننىڭ 100 جاڭا ەسىمى» جوباسىنىڭ جەڭىمپازى دامير نۇركەجانوۆ Future-IT روبوتوتەحنيكا مەكتەبى، تالدىقورعان جوعارى پوليتەحنيكالىق كوللەدجىنىڭ ستۋدەنتى جىگەر بەرلىعوجا Eko Green، س.اسفەندياروۆ اتىنداعى قازاق ۇلتتىق مەديسينا ۋنيۆەرسيتەتىنىڭ ستۋدەنتى گۇلىم سەرعالى «مۇمكىندىك» (Opportunities)، س.دەميرەل اتىنداعى ۋنيۆەرسيتەتىنەن قامار بەگايىم «قازاقستاننىڭ جوو-دا وقۋعا ارنالعان گرانتتاردى تالداۋ»، ءى.جانسۇگىروۆ ۋنيۆەرسيتەتىنىڭ جانىنداعى كوللەدج ستۋدەنتى ساپار سۇلتان «ەنەرگيا وندىرەتىن يننوۆاسيالىق تاقتايشا»، يۋليا ليم «جاستار مەن مۇمكىندىگى شەكتەۋلى جاندارعا ارنالعان «پوتەنسيال» ۋاقىت كلۋبى» جوبالارىمەن ۇزدىكتەر قاتارىنان ورىن الدى.