ءال-فارابي اتىنداعى قازاق ۇلتتىق ۋنيۆەرسيتەتىنىڭ عالىمدارى قاتەرلى ىسىككە قارسى قولدانىلاتىن دارىلىك پرەپاراتتاردى ازىرلەۋ تاسىلدەرىن جەتىلدىردى.
ۋنيۆەرسيتەت ماماندارى ىلە-بالقاش وڭىرىندە وسەتىن ءبۇرشاقتۇستى تۇيەتابان وسىمدىگىن زەرتتەپ، ونىڭ قاتەرلى ىسىك اۋرۋىنا قارسى بەلسەندىلىگىن انىقتادى، دەپ حابارلايدى aqshamnews.kz وقۋ-اعارتۋ
ءبۇرشاقتۇستى تۇيەتابان ەرتەدەن حالىق مەديسيناسىندا كەڭىنەن قولدانىلعان. دەگەنمەن اتالعان وسىمدىك عىلىمي تۇرعىدا تولىق زەرتتەلمەگەن. قازۇۋ عالىمدارى العاش رەت ونىڭ قۇرامىنداعى فيتوحيميالىق جانە بيولوگيالىق بەلسەندى زاتتاردى انىقتاۋعا باعىتتالعان اۋقىمدى زەرتتەۋ جۇمىستارىن جۇرگىزدى. زەرتتەۋشىلەردىڭ ايتۋىنشا، بۇل جوبا الداعى ۋاقىتتا وتاندىق فارماسيەۆتيكانى دامىتۋعا سەپتىگىن تيگىزبەك.
«جوبا ناتيجەسىندە ءبۇرشاقتۇستى تۇيەتابان وسىمدىگىنىڭ بيولوگيالىق بەلسەندىلىگى جوعارى ەكەنى انىقتالدى. وسىمدىك سىعىندىلارى انتيوكسيدانتتىق، انتيميكروبتىق جانە سيتوۋىتتىلىق قاسيەتتەرىمەن ەرەكشەلەندى. ماسەلەن، ەتانول سىعىندىسى كۇشتى انتيوكسيدانتتىق بەلسەندىلىك كورسەتتى، ال ەتيل اسەتاتى سىعىندىسى باكتەريالارعا قارسى تيىمدىلىك تانىتتى. سونداي-اق وسىمدىكتىڭ بەلگىلى ءبىر سىعىندىلارى لەيكەميا جاسۋشالارىنا قارسى تۇرا الاتىنى دالەلدەندى. مۇنى بولاشاقتا قاتەرلى ىسىك اۋرۋىنا قارسى دايىندالاتىن دارىلەرگە پايدالانۋعا بولادى»، – دەيدى قازۇۋ-دىڭ اعا وقىتۋشىسى، دوكتورانت گۇلزات قايرانوۆا.
عىلىمي جوبا بويىنشا قاۋىمداستىرىلعان پروفەسسور اسەم مامۋروۆا، PhD دوكتور، تۇركيا پروفەسسورى احمەت بەياتلى جانە قازۇۋ دوكتورانتى گۇلزات قايرانوۆا جۇمىس ىستەۋدە. بولاشاقتا ماماندار پاتەنت الۋدى جانە جوعارى رەيتينگتىك عىلىمي جۋرنالدارعا ماقالا دايىنداۋدى جوسپارلاپ وتىر.
